Read Zeme Naga EZRA 7 Bible Online

EZRA 7 - Zeme Naga bible

EZRA 7

¹Aipau châng dege, Persiaram gu heguang Artakserksezbe ne kaheguangbe ting ge, Seraiabe na Ezrabe, Azariabe na, Hilkiabe na,

²Shallumbe na, Zadokbe na, Ahitubbe na,

³Amariabe na, Azariabe na, Moraiothbe na,

⁴Zerahiabe na, Uzzibe na, Bukkibe na,

⁵Abishuabe na, Phinehabe na, Eleazarbe na, tingku dilangpeu Aaronbe na—

⁶aipau Ezrabe ze Babilonram gene hang de lei. Pa â Israelme Rapeu Tingwang ne peigaibe Mosabe gu hingde ze chî’mmilube kau leisirawpeu de lei; zai pe Rapeu Tingwang ba pe peireige bam dadege, pa ne kiebeibe leine heguang ne pechu pei bei de lei.

⁷Zai heguang Artakserksezbe ne kaheguangbe pasenabe tingkum ge Jerusalem ’mbe aime ze du hang de lei, Israelme hanggesame, tingkume benai Lebime hanggesame, heleutewme, kemuireîme, zai kellumki guâ ka’ngguame, aime ze de lei.

⁸Zai heguang gu pasenabe kum, pamengeube kêu ge Jerusalem ge pa wang de lei;

⁹raîlangbe kêu gu tingnaimikpui raîlangbe ge Babilonram gene pa tatchu di de lei, zai pamengeube kêu gu raîlangbe tingnaimikpui ge, pe Rapeu gu katinggeube ba keyibe pe peireige bambe ziegene Jerusalem ge pa wangchang de lei.

¹⁰Ezrabe â Tingwang gu hingde getei ra, zai chize tew ra, zai Israelram lungge pe gu hingde rawdiakkaibe benai hingde ramme geteilia ra pe lung peipat kai ze bambe ziegeneu.

¹¹Aize Tingwang gu hingde ramme benai Israelme hangge diegai’ndibe ramme tedeu ramme ge geteilupeu, leisirawpeu, zai tingkupeu Ezrabe hangge Heguang Artakserksezbe ne langgaibe leisikuak ramme de lei:

¹²“Artakserksezbe, heguangme gu heguang ne, tingkupeu Ezrabe, tinggîm Rapeu gu hingde rawpeu dage—zai chunage

¹³I kaheguangbe heram lungge Israelme ruage mige mei nune penui gu tingkume mei nune Lebime mei ze Jerusalem ’mbe tat ra pe lung peigaibe kau â ning dage tat’mpam duî lei be I ne die gai de lei.

¹⁴Heguang benai pe gu ziemmena kaningchingme hangsena ne ning Rapeu gu hingde ning dage bambe sie luigum ze Juda benai Jerusalem deu ge ’mmêt ra ningchu â lang gai,

¹⁵zai Jerusalem ge bambepeu, Israelme Rapeu hangge heguang benai pe gu ziemmena kaningchingme ne gepût benai gechâk peipatkaibe hesuiyibe kela teichanggairabe hangge,

¹⁶Babilon ram pebâm’nsangne gene gepût benai gechâk nang ngaube leine, zai Jerusalem ge bambe Rapeu ki hangge baudime benai tingkume ne misuiyibe kela ramme ze du teichang ra ningchu â lang gai bei daseu.

¹⁷Chidaze aipau rangkâng zene tei’ntîngteî ze getumsei ramme, meli’nsei ramme, zai melipoine ramme, penui gu heleirachi peipatbe ramme benai kesakbe kela peipatbe ramme lui le lau, zai Jerusalem ge bambe ning Rapeu ki gu herâtewbe-kaira ge chiramme nang peipat kai ra de lei.

¹⁸Gepût benai gechâk ze ning Rapeu ne luneibe luigum ze nang benai ning puiname ne yira-rabe hang ’nninggaibe ze a nang tew le dui lei.

¹⁹Ning Rapeu ki ge ka’nnangbe ’ngguarabe hangge ning dage peigaibe merua ramme ze â, Jerusalem Rapeu masuage nang peipat kai ra lei.

²⁰Zai ning Rapeu ki ge ka’nnang-nangbe ze â, nang ne pei ra ka’nnangbe ting ge ze, heguang heubung gene lu lu pei gai le duî lei

²¹“Dezaine I, heguang Artakserksezbe ne ’Nggeuki ze Wîgiamram ge rangkâng reîme dage die gai de lei: Tingkupeu Ezrabe, tinggîm Rapeu gu hingde rawpeu ne ningnui dage ka’nnang-nangbe ze â ’ngnginsin bam mak ze tâtewpui gai be lau,

²²gepût talent haî kat riâ, dekuîmeu ka’ndeube kor haî kat riâ, wain bung haî kat riâ, taudui ka’ndeube bung haî kat riâ, zai ’nchaî â periâ ’ndeu mak ze pei gai be lau.

²³Tinggîm Rapeu ne samdiegai’ndibe ze â, tinggîm Rapeu ki hangge tâtew’nsang gai be lau, heguang je buâme benai pe name dage pe lumpum gai mak ra hangge zeu.

²⁴Tingkume, Lebime, heleutewme, kemuireîme, kellumki guâ ka’ngguame, mei nune Hera ki guâ ka’ngguame kêdame mei be peireige ’mpuâ lu ra, kahezakbe kerua mî lu ra, ’mpuîki gu ’mpuâ lu ra hingde gene tâu mak lei be anui ne ningnui je chilia gai de lei.

²⁵“Zai nang, Ezrabe gau, ning ba ge ning Rapeu gu kaningchingbe bambe luigum ze, ’Nggeuki ze Wîgiam ram ge bamme je samramchi le ra, hingde teime ramme benai samramme je ling gai lau, ning Rapeu gu hingde ramme chibe kau ramme leine hangge zeu; zai chiramme chimakme je â nang ne geteilia ra de lei.

²⁶Ning Rapeu benai heguang gu hingde pheumakbe kau je â pe peireige samrambe peranchibe ne peize tâtew gai be lau, tewchat ra mei, nune kelitua’nderabe hangge mei nune pe gu merua ramme sut’nderabe hangge mei, nune kebangki ge kairabe hangge mei ze tew gai be lau,” ze kacheube zeu.

²⁷Heguang lung ge aigumbe riâ ’nningchi le ra tew gai ze, Jerusalem ge Tingwang ki bambe ze peluiyi ra teleu ra pe lung hangge peigaipeu,

²⁸zai heguang benai pe gu ziemmena kaningchingme, zai heguang gu reziechibe saibe ramme masuage pe gu hungka’ntipbe achu peigaibeipeu, anui paume Rapeu Tingwang je peize pengêudi bam lau. A Rapeu Tingwang gu pe baranchibe a peireige bambe ziegene, I a lung di ra chang de lei, zai a dage nguatat ra hangge Israelme ruage pemuipuame je I ne teiheruawang gai de lei.