Read Zeme Naga EZRA 8 Bible Online

EZRA 8 - Zeme Naga bible

EZRA 8

¹Aime je penui peume ki ramme ge bepeî changme de lei, zai aize heguang Artakserksezbe kaheguangbe ting Babilonram gene a dage nguahangka’mpamme gu reheika’ntibe de lei:

²Phinehabe, Gershombe chaname. Ithamarbe chaname, Danielbe chaname, Dabidbe chaname, Hattusbe chaname.

³Shekaniabe chaname. Parosbe chaname, Zekariabe chaname, penui dagene heji riamgaime ’mpeumi haî kat ze rengeu.

⁴Pahath-moabbe chaname, Zerahiabe na Eli-e-ho-enaibe, zai pe dage ’mpeumi haî na bamme bau.

⁵Zattube chaname, Jahazielbe na Shekaniabe, zai pe dage bamme ’mpeumi haî chum.

⁶Adinbe chaname gene Jonathanbe na Ebedbe, zai pe dage ’mpeumi rengeu bamme bau.

⁷Elambe chaname gene, Athaliale na Jeshaiabe, zai pe dage ’mpeumi riaksena bamme bau.

⁸Shephatiabe chaname gene, Mikaelbe na Zebadiabe zai pe dage ’mpeumi riakdesat bamme bau.

⁹Joabbe chaname gene, Jehielbe na Obadiabe, zai pe dage bamme ’mpeumi haî na ze kereu ze desat.

¹⁰Banibe chaname gene, Josiphiabe na Shelomithbe, zai pe dage bamme ’mpeumi haî kat ze riakseruk.

¹¹Bebaibe na Zekariabe, zai pe dage bamme ’mpeumi ’ngkai ze desat.

¹²Azgadbe name gene, Hakkatanbe na Johananbe, zai pe dage bamme ’mpeumi haî kat ze kereu.

¹³Adonikambe chaname, bechâng dezaine wanggaime, penui ji ramme â, Eliphelet, Jeuel, zai Shemaia, zai penui dage bamme ’mpeumi riakseruk.

¹⁴Bigbaibe, Uthaibe zai Zakkurbe name gene, zai penui dage bambe ziemmena ’mpeumi riaksena lei.

¹⁵Ahaba ’mbe luagaibe ’nggeuki ge I ne penui je kûwang’ndui gai de lei, zai chige hezie kechumne anui rêu ze bam de lei. Baudime benai tingkume je I hezêupie gai dege, Lebibe name hangkatte chige I ngau mak te lei.

¹⁶Chidadege kanguame besuitewme Eliezerbe, Arielbe, Shemaiabe, Elnathanbe, Jaribbe Elnathanbe, Nathanbe, Zekariabe zai Meshullambe, zai mâ-chika’mmime Joiaribbe benai Elnathanbe je kûwang ra I ne lang gai de lei,

¹⁷zai Kasiphia kacheube bâm ge besuitewpeu Iddobe dage penui je lang gai ze, Iddobe benai pe puiname Kasiphia kacheube bâm ge Hera ki ge ka’ngngâme je anui Rapeu ki hangge tâ’ngguarame je peize anui dage lang gai ra rang gai bei de lei.

¹⁸Zai anui peireige anui Rapeu ka’nggiabe ba keyibe bambe ziegene Israelbe na, Lebibe na, Mahlibe name, ruagene mâ-’nningchipeu Sherebiabe benai pe name zai pe kiduîme, ziemmena hangkereu ze desatme je anui dage penui ne nguawang de lei:

¹⁹Meraribe name ruagene Hashabiabe benai Jeshaiabe, zai penai kiduîme benai penui name, ziemmena hang ’ngkai je du nguawang de lei;

²⁰Lebime guâ ’nggua ra hangge Dabidbe benai pe gu saibe ramme ne diepatchâmgaime kellumki ge ka’ngguame ziemmena haî na ze ’ngkai bamme je riam gai mak zeu. Aime leine je penui ji ne rawkeu gai de lei.

²¹Anui hang, anui name hang zai anui gu merua ramme leine hangge Hera dagene ka’nzeibe ’mpuî peu le ra hangge, Hera dage anui kecheilungpung le ra, Ahaba geuki hiage I ne teseurei ra rangba gai de lei.

²²Anui tebeî ’mpuî ge anui teureime dagene anui je bari ra hereikangme bau benai hekun hereikangme pei gai ra heguang dage kie ra I â ka’ngngam dadegeu; anui ne heguang je, “Pechu peube kau leine peireige anui Rapeu ne ’nnam gai ze bam lei, zai pechu putkai’ndibe kau leine peireige pe lumpumbe ranchi kai ze bam lei,” ze salia gai ’ndi daseu.

²³Chipauziegene aipau deu hangge anui teseurei ze anui Rapeu dage kie de lei, zai anui gekiebe pa ne ’ngking gai bei de lei.

²⁴Chidadege tingkume ruage kanguame besuitewme hangkereu ze kena je I ne diepatchâm gai de lei: Sherebiabe, Hashabiabe, zai penai dage bamme penai kiduîme hangkereu zeu.

²⁵Zai heguang benai pe gu nguageteiliame zai pe gu besuitewme zai chige bamme Israelme leine ne anui Rapeu ki hangge kela peigaibe, gepût benai gechâk zai heli ramme penui dage I ne ’nchupat kai bei de lei;

²⁶I ne penui ba ge gepût talent rengeu, zai talent haî kat mî riâ gepût li ramme, zai gechâk talent haî kat,

²⁷darik chang kat mî riâ, gechâkkuak ramme, zai gechâk mî hungbe riâ gumbe kau kangngâgeî keyibe ne tewbe heli kena ’nchupat kai bei de lei.

²⁸Zai I ne penui je, “Ningnui â Tingwang dage ka’nchibe chang lei, zai heli ramme â ka’nchibe kau lei; zai gepût benai gechâk ze â Tingwang ningnui peume Rapeu dage hesuiyibe kela peipatbe chang lei.

²⁹Tingwang ki gu hekisiâm ramme lungge Jerusalem ge Israelram ge tingku gechîngme benai Lebime zai pe kiria-ria ge besuitewme suage ningnui ’nchu gai mak tâne reî ze teikua bam lau,” ze rang gai de lei.

³⁰Dadege Jerusalem ge anui Rapeu ki ge teiwang gai ra tingkume benai Lebime ne gepût benai gechâk zai heli ramme ka’nchube rezie tei di de lei.

³¹Chidadege Jerusalem ’mbe tat ra hangge, raîlangbe kêu gu hezie kereu ze kena mai ge Ahaba geuki gene anui tat ti de lei; anui Rapeu ne anui peireige nguatatew ze bam de lei, zai heteureime benai ’mpuî’ntai ge lîmkuabe ramme ba gene pa ne anui je lupat kai bei de lei.

³²Jerusalem ge anui wangchang de lei, zai chige anui hezie kechum bam de lei.

³³Pamedaibe mai ge, anui Rapeu kilûng ge, Uriabe na tingkupeu Meremothbe ba ge gepût benai gechâk zai heli ramme ’nchu gai bei de lei, zai pe dage Phinehabe na Eleazarbe bam de lei, zai penui ruage Lebime, Jehuabe na Jozabadbe benai Binnuibe na No-adiabe bam de lei.

³⁴Pelane riam gai zai ’nchu gai de lei, zai ’nchugaibe riak leine rawkeu gai de lei.

³⁵Chipau ting ge kebang hang nîmtattibe gene wangme, hesangme ram gene wangme ne Israelme Rapeu dage Israel zat leine hangge getumsei kereu ze kena, kemei’nsei riaksekui ze seruk, meli’nsei riaksena ze sena kerube-râtewbe peipat kai de lei, zai hemui-râtewbe hangge kemei’nsei kereu ze kena; airamme leine Tingwang dage kerube-râtewbe kam de lei.

³⁶Heguang gu samkela langpatkaibe ramme penui ne heguang gu saibe ramme benai ’Nggeuki ze Wîgiamram gu laksaibe ramme dage pei gai bei de lei; zai penui ne ziemmename benai Hera ki je ka’ngngâbe pei gai de lei.