Read Zeme Naga EZRA 9 Bible Online

EZRA 9 - Zeme Naga bible

EZRA 9

¹Aipau tâ ramme tew gai lu dege, Israelme ruage besuitewme a dage wang lu ze achu, “Israelme zai tingkume zai Lebime penui ne heram ramme gu ziemmename dage mi ngaukatenetbe tâ tewbe gene, Kanaanme, Hethme, Perizme, Jebusme, Ammonme, Moabme, Ijipme, zai Amorme dagene penui runne penui je teichâm gai mak ze lamui lei.

²Penui ne chime name heleume je penui benai penui name nâu hang lu daseu; chipauziegene ka’nchibe hezat ze heram ramme gu ziemmename dage kebut kai di de lei. Zai aipau ’nnumtewtadibe tâ tewbe ge saibe ramme benai besuitewme ne pemui tew de lei,” kacheu de lei.

³Aize I seu lu dege, I a paîni hit ze, zai a peîtam benai a biagêu gesak ze, a duângga ne ’ntaukeu gai di de lei.

⁴Chidadege kebangchangbe gene helatwangkadaime ne keneibe gabe tâ tewgaibe ziegene Israelme Rapeu ne sam sagai’ndibe ze kehingme leine hegî ge herâtewbe hî chang ze a duângga ze I ’ntau ze bambe luage a taige wang’ndui gai de lei.

⁵Zai hegî ge herâtewbe hî ge I teseureibe gene I zuachu lu, a paîni hit’ndibe kailube luî gene kukdungkeu lu Tingwang a Rapeu dage a ba getuapat ze,

⁶“Hei a Rapeu gau, ning dage a ma ’ngngangchu ra I ’ngngam-desang de lei, a Rapeu gau, anui gu hemui-helut â anui hut suadu hu, zai anui kemaube â ting tûngteman ze bam di daseu.

⁷Anui paume ting gene nemai riâ chang ze anui â hemui-kadesangbe ge bam bam di de lei; zai anui gu hemui-helut ziegene anui, anui gu heguangme zai anui gu tingkume je nemai ge bambe gum ze heram ramme gu heguangme ba ge pei gai bei ze, hiazutkie ge, kebang changbe ge, tew’nsiagaibe ge, zai ’ngngam-kadesangbe ge pei gai bei de lei.

⁸Kane anui Rapeu ne anui mik tew’nrak kai ra, zai anui kebangchangbe gene kecheîne ge anui je tew’nrakchu gai le ra, anui ruage ’nsak kai diak ra, zai pe gu ka’nchibe bâm ge pebâm ka’ntipbe anui je pei gai ra hangge Tingwang anui Rapeu ne chunage beting keduîne hangge ngauka’nggiabe teilia bei de lei.

⁹Anui â kebang changbe kangge bambe kau lei; acheusede anui kebang changbe kangge bambe ge du anui Rapeu ne anui je put kai mak te lei, kane anui Rapeu ki tew’nsapchu gai ra, chize siadibe ramme getîngwang gai dai le ra, zai Judiaram ge benai Jerusalem ge anui je ’nggum gai le ra kecheîne â anui je tew’nrakkaibe pei gai be ra hangge anui je pa ne pa hungka’ntipbe Persia gu heguangme suage pei gai bei de lei.

¹⁰“Zai chunage, Hei anui Rapeu gau, aigum daidibe chângge ’ndaikau anui sa dai ra lau? Ning gu samdiegaibe ramme anui ne sâu ’ndi daseu,

¹¹nang ne ning guâ ka’ngguame kemeume dagene die gai ze, ‘Ningnui ’nram le ra gutrabe heram ze â heram ramme gu ziemmename ne tewhebâ’ndibe chimakbe heram penui ’nchimakbe ne pedit-petâ penui gu mi ngaukatenetbe ne puibe heram lei.

¹²Chidaze ningnui name ’mpuimi ramme je penui name nâu hang kai so, zai ningnui name nâu hangge penui na ’mpuimi ramme je du lu se lau, zai penui gu desieyibe benai keheube ze peu se lau, dezai ningnui ranchi ze bam le ra, zai heram gu keyibe luteu le ra, zai chize betingbeta hangge ningnui chaname heurâ hangge ’nsakkaichi le ra hangge zeu,’ ze ranggai’ndibe zeu.

¹³Zai anui tâ-kesiabe tewbe ramme benai anui mâu’ndi-dibe ziegene anui peireige wangchangbe leine chângge, anui Rapeu gau, anui hemui-helutpâu hangge gesâbe peiruî gai ra buibe sua â cham ze nang ne pei gai bei de lei be ngau lu zai aigum ze ’nsakpatme anui hangge peigaibe ngau lu ze,

¹⁴ning gu samdiegaibe ramme anui ne tewpâng dai ze aipau katenetbe tâ tewbe ziemmename dage hegai dai de ra de mei? Mî de ’mbiapatrabe kau du ga ze, ’nsakkaidiakme gaderabe hangge, nang ne anui je tew’ngga kam gai mak tâne anui peireige nang ning lumpumderabe kau de mak se mei?

¹⁵Hei, Tingwang Israelme Rapeu, nang â ka’nzeibe kau lei, ’mbiapatlume anui hangge ’nsak kai diak bei de lei, nemai riâ chang ze bambe gum zeu. Pie le lau, anui kahemuibe gene ning suage anui wang de lei, aipauziegene ning masuage mî de sapchi lak lei,” kacheu de lei.