Read Zeme Naga NEHEMIA 1 Bible Online

NEHEMIA 1 - Zeme Naga bible

NEHEMIA 1

¹Hakaliabe na Nehemiabe gu sam ramme. Chunage hekuînam Susa ge I bambe ting ge pa’ngkaibe tingkum, Kisleb kêu ge aigum ze wangchang de lei,

²a puina’mpeu hangkat Hananibe ne ziemmena hanggesame je ngua lu Juda gene zuapat lu wang de lei; zai I ne Judame ’nsakpatme kebang hang nîmtatbe gene pak’mbiadime rasam benai Jerusalem tedeu ge chî nei ze penui je ’mmêt kai de lei.

³Zai penui ne achu rang ze, “Chi heram lungge ’nsakpatme kebang hang nîmtatbe gene pak’mbiadime â hereu-kadesangbe benai ka’ngngambe ge la de lei; Jerusalem gu kerie ze bakêu de da, zai pe gu keriekemui ramme â hemi ne rû’nsia kam de lei,” kacheu de lei.

⁴Aipau sam ramme I seugap dege, I ’ntaukeu lu ze hap ti de lei, zai naimikpui ’ndaikie mei ze desui ze bam de lei; zai tinggîm Rapeu masuage I teseurei ze kellum sau mak ze bam de lei.

⁵Zai I ne, “Hei tinggîm Rapeu Tingwang, pechu hungme zai pe gu hingde ramme teime dage samria tei’mmi zai hungka’ntipbe kaipeu, reziechibe mi kehingbe Hera gau;

⁶peize ning kun ’ndualie gai lau, zai ning mik rakpat kai lau, ning dage anui hemuigai’ndibe ziegene, Israelme gu hemui ramme ralia ze ning guâ ka’ngguame Israelme hangge chunage kemuî-keba I ning guâ ka’ngguapeu ne kie ze bambe kuâ ze seu le ra hangge zeu, eu lei, I benai a peu kiduîme hemui gai ’ndi de lei.

⁷Ning dage sia-kadesangbe tâ anui ne tew gai ’ndi de lei, zai nang ne ning guâ ka’ngguapeu Mosabe dage diegai’ndibe sam ramme, hingde tewgai’ndibe ramme, zai riagailube hingde ramme ze anui tei mak te lei.

⁸Ning guâ ka’ngguapeu Mosabe je nang ne die gai ze, ‘Nang ne lungsangtew makchai â, ziemmename zat ruage I ne ningchu kelitua gai bu lei;

⁹kane nang ne helatwang dai ze a gu hingde ramme tei’mmi, zai chize tew dizai â ningchu hûtuagaibe ze tingnaimik deulangbe kangge bam di sede, I ne chigene penui je teiwangherua gai dai ze I ne kelânglube bâm ge nguawang gai gu lei, chige a ji ze bambamderabe hangge zeu,’ ze kacheu de lei.

¹⁰Penui ze â ning gu reziechibe gene zai ning ba ranchi gene nang ne ripatlume ning guâ ka’ngguame benai ning gu ziemmename de lei.

¹¹Hei Tingwang gau, ning guâ ka’ngguapeu ne gekiebe zai ning ji je hengêutew ze bam ra luneime ning guâ ka’ngguame gekiebe geze ning kun peize ’ndualie gai lau, zai ning guâ ka’ngguapeu je kengambe nemai ge pei gai lau, zai aipaupeu dage pe mikngau gene pechu ngauka’nggiabe pei gai be lau,” kacheu de lei.