Read Zeme Naga NEHEMIA 13 Bible Online

NEHEMIA 13 - Zeme Naga bible

NEHEMIA 13

¹Chipau mai ge baudime geseube gene Mosabe gu leisikuak gene penui kiâ de lei; zai chige Ammonme mei nune Moabme mei ze â mâtew-tewsedu Hera gu wangka’nduibeki ge gut mak ra lei ze rawgaibe ngau de lei;

²penui â tingku benai hedui ne Israel name je suidau mak, kane penui je deset kai ra Balaambe je puî daseu— sede anui Rapeu ne desetkaibe ze ’nnamgaibe hangge tewkedat kai bei de lei.

³Baudime hingde kiabe seu gai lu dadege â kêdabe zat gene piakeube hik leine je â Israelme ruagene teichâm ’ndi de lei.

⁴Chunage aipau suage, tingkupeu Eliashibbe, anui Rapeu ki gu hekisiâm ramme ge besuitew ra linggaibeipeu, zai Tobiabe ze nguahelak ze bambepeu zene,

⁵hingde-sie luî gene Lebime, heleutewme, Kemui reîme, zai tingkume, hangge kela peipatbe ramme peigairabe hangge ’ndâge mâ-hîmra kela, mâ-perîmyibe ramme, heli ramme, chêu gu kereu ge kat ramme, wain benai mâ-châ kaibe hekisiâm kedibe ze Tobiabe hangge reheî gai bei de lei.

⁶Aigum ze bamdibe ting ge I â Jerusalem ge bam mak te lei, Babilon gu heguang Artakserksezbe kaheguangbe tingkum himreu ze kena kum ge I â heguang tailam tat ti daseu. Bechâng dege achu ’mpat kai ra heguang dage I ne kie de lei,

⁷zai Jerusalem ge wang de lei, zai Tobiabe hangge Eliashibbe ne tâtewgaibe kesiabe ze I chîpat ti de lei, Hera ki lungge pe hangge hekisiâm reheîgaibeibe zeu.

⁸Zai I a lumpum-desang di de lei, zai I ne Tobiabe ki gu merua ramme leine ze chipau kisîam gene hela ’mbe tuâpat kai bei de lei.

⁹Chidadege I ne die gai bei ze penui ne hekisiâm ramme ze tew’nchi gai de lei, zai I ne chige Hera ki gu heli ramme, mâ-helei peipatkaibe ramme benai mâ-perîmyibe ramme teiwang gai dai bei de lei.

¹⁰Lebime damrabe ze du penui je pei mak lei be I ngaupat ti de lei; chipauziegene Lebime benai heleutewme, Hera guâ ka’ngguame ze penui gu helu ’mbe pak kai dai di de lei.

¹¹Chidadege I ne besuitewme je ’ngngiam ze, “Hera ki ze ’ndaitew ze put kai ’ndi lau?” acheu bei de lei. Zai I ne penui je teiwangherua lu ze penui bâm bâm ge kai bei de lei.

¹²Chidadege Judaram leine gene chêu gu kereu ge kat, wain, zai mâ-châ ramme ze kai’nduigaibeki ramme ge teiwang gai de lei.

¹³Zai I ne chi merua kai’nduigaibe ki ramme ge reîka’nduime hangge tingkupeu, Shelemiabe, leisirawpeu Zadokbe, Lebi’mpeu Pedaiabe, zai penui je ’ngngâ ra hangge Zakkurbe na Hananbe, Mattaniabe chapeu je sum gai bei de lei, penui ze â lungsangtewme hangge riamgaime bau daseu; zai penui tâ-ngeu ze â penui puiname je penui ne ’nzigairabe kau lei.

¹⁴Aipau deu geze achu chî gai lau, a Rapeu gau, zai a Rapeu ki benai pe guâ ka’ngguabe hang tâ-keyibe ramme I ne tewgai’ndibe ze tew’ngga gai se lau.

¹⁵Chipau ting geze Judaram ge ziemmename grepchî niakbe bâm ramme ge ’ntakbambe mai ge niak ze bambe I ngau de lei, zai chêu misongga ze pungwang ze hekunmerângne ching ge tuagaibe I ngau de lei; zainedu wain ramme, grepchî ramme, ’mbeuchî ramme, zai heput zat ramme leine ze ’ntakbambe mai ge Jerusalem ge teigutbe I ngau de lei; zai hetak zuabe mai gîmsing ge I ne penui je ’ngngiam bei de lei.

¹⁶Namdi lungge Tira ge lungme ze du penui gu hekâ benai merua zat leine teigut lu chiramme ze ’ntakbambe mai ge Judame dage benai Jerusalem ge zua gai de lei.

¹⁷Chidadege Juda ge saibe ramme je I ne ’ngngiam ze, “’Ntakbambe mai tewhebâ gai ze aigumbe tâ ningnui tewgaibe ze ’ndaitew se lau?

¹⁸Aipau luigum ze ningnui peume du tew de mak semei? Zai anui Rapeu ne aipau tâ-kesiabe ze anui peireige benai aipau namdi peireige tew gai de mak semei? Acheusede ’ntakbambe mai tewhebâ’ndibe ziegene Israelme peireige Hera lumpum teiwangsua gai de lei,” acheu bei de lei.

¹⁹’Ntakbambe mai suage Jerusalem kemui ramme ge kemuîbe ting chang zi gu dadege ’ngkam ramme kainam kam ’nde ra I ne die gai bei de lei, zai ’ntakbambe mai kam mak tâne chiramme ze lat mak ra I ne sam rang gai bei de lei. Zai a guâ ka’ngguame hanggesame je kemuiki reî ra I ne kai bei de lei, dezai heput katte ’ntakbambe mai ge teigut mak ra hangge zeu.

²⁰Chidadege luakat mei nu luana mei â merua zat leine gu helîkahedetme benai kezuame Jerusalem gene hela ge ’nnai gai de lei.

²¹Kane I ne penui je ’ngngiam ze, “Kerie hela ge ’ndaitew ze ningnui ’nnai ze bam lau? Aigum ze ningnui tew dai zai â ningnui peireige a bahuâ kai gu lei,” ze acheu bei de lei. Chipau mai gene seu ze ’ntakbambe mai ge penui wang dai ta di de lei.

²²Zai Lebime ze penui runne penui je tew’nchi lu ze, wang ze kemuiki ramme reî ra, ’ntakbambe mai rei’nchichiak ze reibam ra I ne samdie gai bei de lei. Aipau ze du a hanggene achu ’ngngaî se lau, Hei a Rapeu gau, zai nang hungka’ntipbe kedibe luigum ze achu lu gai lau.

²³Chipau ting ge Judame ne Ashdodme, Ammonme, zai Moabme leu ramme je penui nâu ramme hang lube ze du I ngau de lei;

²⁴zai penui name ruage pa’mpi riâ gum â Ashdodme lad ne sa ze bam de lei, zai Judame lad â penui sachi mak te lei, kane pezat zat gu hekuâ-helad â chî de lei.

²⁵Dadege I ne penui je hegei ze, penui je chiang gai ze, hanggesame je â bêu bei, zai penui tam paitua ’ndi de lei, zai Hera ji gene penui ne deseu ra I ne penui je pei gai ze, “Ningnui na ’mpuimi ramme je penui name rehangme hangge kai mak ra lei, zai penui na ’mpuimi ramme je ningnui name benai ningnui hangge lu mak ra lei.

²⁶Chigumbe ’mpuimi deu gene Israelme gu heguang Solomonbe kahemui de mak te lau? Heram zat misonggame ruage pa gumbe heguang katte ga lei, zai pe Rapeu ne pechu ’nchâ bei de lei, zai Israelme leine peireige heguang chang ra Hera ne pechu kai bei de lei; acheuleusede hesangme leu ramme ne pechu ’nsangdu hemui gai ra tew gai bei de lei.

²⁷Chidaze ningnui kuâ anui ’ngking lu ze aipau sia-kadesangbe tâ tew ze hesangme leu ramme je kahegaibe gene anui Rapeu je choa ra de semei?” kacheu de lei.

²⁸Zai Jehoiadabe chaname ruage hangkatpeu tingku dilangpeu Eliashibbe na ze Horon’mpeu Sanballatbe chapeu chang ze bam de lei; chipauziegene a dagene pechu kelitua’ndi de lei.

²⁹Penui je chibam lau, a Rapeu gau, penui ne tingku tâ-ngeu ze tewhebâ ’ndi, zai tingkume benai Lebime gu samhatkaibe tewhebâ ’ndi daseu.

³⁰Chigum ze hesangme ram gu changbe zat leine ze â I ne tew’nchi gai de lei, zai I ne tingkume benai Lebime penui tâ tâ ge penui tewrabe ngeu ze tew’ntiprip kai bei de lei;

³¹zai beting-pehi riagailube ge heching kela peipat ra, zai mâ-hîmra ’nchikeuraibe ramme peipatrabe hangge du I ne sam pei gai bei de lei. Keyibe hangge achu chî bam lau, a Rapeu gau.