Read Zeme Naga NEHEMIA 3 Bible Online

NEHEMIA 3 - Zeme Naga bible

NEHEMIA 3

¹Chidadege tingkudilangpeu Eliashibbe ne pe puiname tingkume je ngua lu zuachu lu ze penui ne Meli Kemui ze tew de lei, penui ne chize tew’nchi gai lu, ’ngkam ramme rat kai de lei; Haîme gu Hekihube riâ chang ze, zai Hananel gu Hekihube chang ze chize tew’nchi gai de lei.

²Zai Jerikome ne chipau chângge tew’nduâtat te lei, zai penui chângge Imribe na Zakkurbe ne tew’nduâtat te lei.

³Hassenaabe name ne Hekâ Kemui tew gai de lei; penui ne padekung ramme kai lu ’ngkam ramme tei’nsapchu gai de lei, hianambe ramme benai bechâp ramme ze du kai de lei.

⁴Zai penui chângge Uriabe na Meremothbe, Hakkozbe na ne kenuîwang kadai de lei. Zai penai chângge Berekiabe na, Meshullambe, Meshezabelbe ne ketakwang gai de lei. Zai penai chângge Baanabe na Zadokbe ne kagetak te lei.

⁵Zai penui chângge Tekome ne kagetak te lei; kane penui ruage besuitewme â penui ruage tâ kereîme ne tew ra ranggaibeibe tâ ze tew mak lei.

⁶Zai Paseabe na Joiadabe benai Besodeiabe na Meshullambe ne Perie Kemui kagetak te lei; penai ne pa’ngra ramme kai ze ’ngkam teichu gai, hianambe ramme benai ’ngkamcha ramme kai bei de lei.

⁷Zai penai chângge Gibeon’mpeu Melatiabe benai Meronoth’mpeu Jadonbe, ’Nggeuki ze Wîgiamram gu laksaibe ne samrambe kangge bambe Gibeon benai Mizpah’mpeu ne tew de lei.

⁸Penai chângge gechâk kahekipeu, Harhaiabe na Uzzielbe ne tew de lei. Bechâng ge perîmyibe taudui tewme ruage hangkat Hananiabe ne tew de lei; zai Kerie Kedibe riâ chang ze penui ne Jerusalem ze teleu’mmi gai de lei.

⁹Penui chângge Jerusalem pa’mpi peireige samrampeu Hurbe na Rephaiabe ne tew gai de lei.

¹⁰Penui chângge Harumapbe na Jedaiabe ne pe ki ze teidabe bâm ze teleu’mmi gai de lei; zai bechâng ge Hashabneiabe na Hattusbe ne tew de lei.

¹¹Harimbe na Malkijabe benai Pahath-moabbe na Hasshubbe ne kêdabe sat benai Hemang ramme gu Hekihube ze teleu’mmi gai kadai de lei.

¹²Bechâng ge Jerusalem pa’mpi peireige samrampeu Hallohesbe na Shallumbe ne pa benai pe na ’mpuimi ne nguateleu’mmi gai de lei.

¹³Hanunbe benai Zanoa ge bamme ne Bekâm Kemui ze teleu’mmi gai de lei; penui ne tew’nsaprechichu dai lu, pa’ngkam ramme kai, hianambe benai bechâp ramme kai bei de lei, zai kerie ze sâu chang kat teleugetingwang dai ze Kera Kemui riâ tewchang gai de lei.

¹⁴Rekabbe na Malkijabe, Beth-hakkerem heram (district) samrampeu ne Kera Kemui ze ketak kai de lei; pa ne chize tewchu gai dai lu ze pa’ngkam tew gai lu, hianambe benai bechâp ze teleu gai de lei.

¹⁵Zai Mizpa gu samrampeu, Kolhozebe na Shallumbe ne Depin Kemui ze ketak kai de lei; pa ne chize tewchu gai dai lu, zai gumchim gai lu pa kemui tew gai ze hianambe benai bechâp ramme kai bei de lei; zai pa ne heguang gu merie ge Shelah Hezai rieguabe tew gai de lei, Dabidbe gu namdi ’mbe tatkeube desua ramme riâ chang zeu.

¹⁶Pe chângge Beth-zur gu heram pa’mpi gu samrampeu Azbukbe na Nehemiabe ne Dabidbe gu heraw je teidabe bâm riâ chang ze, hezai danggaibe chang ze, zai peranchime ki riâ chang ze ketakwang gai kadai de lei.

¹⁷Pe chang dege â Lebime ne teleuwangkadaibe: Banibe na Rehumbe; pe chângge Hashabiabe, Keila heram pa’mpi peireige samrampeu zene pe gu heram ze teleu’mmi gai kadai de lei.

¹⁸Pe chângge penui puiname ne teleuka’mmibe tâ tew de lei: Henadadbe na Babbaibe Keila heram pa’mpi peireige samrampeu;

¹⁹pe chângge Jeshuabe na Ezerbe, Mizpa gu samrampeu ne kêdabe sat hereimerua ki suage keriemik ze teleu kadai de lei.

²⁰Pe chângge Zabbaibe na Barukbe ne kêdabe set teleu’nduâ dai ze, Pemiktû gene tingkupeu Eliashibbe ki kemui chang ze tew gai de lei.

²¹Pe chângge Uriabe na Meremothbe, Hakkozbe chapeu ne kêdabe sat tew dai ze Eliashibbe ki kemui gene Eliashibbe ki tûn riâ chang ze tew de lei.

²²Pe chângge tingkume Teziening kâm gu ziemmena ne teleuwang kadai de lei.

²³Penui chângge Benjamin benai Hasshubbe ne penai ki ze teidabe bâm ze teleuwang kadai de lei. Penai chângge Ma-aseiabe na Azariabe, Ananiasbe chapeu ne pe ki hia ze kateleu de lei.

²⁴Pe chângge Henadadbe na Binnuibe ne kêdabe sat tew dai ze Azariabe aki gene keriemik riâ chang ze tew gai,

²⁵zai pa’ndip riâ chang lei. Uzaibe na Palalbe ne keriemik teidabe bâm ge zai hekêtkaime kining ge heguang ki gene tewchu’ngngugaibeki ze kateleu de lei. Pe chângge Parosbe na Pedaiabe,

²⁶zai kellumki guâ ka’ngguame Ophel ge bamme ne naimikpat ’mbia Hedui Kemui je teidabe bâm zai heki kehube kateleu de lei.

²⁷Pe chângge Tekoame ne kêdabe sat heki kehube je teidabe gene Ophel gu kerie chang ze tew gai de lei.

²⁸Hekun Kemui ’nrei ze â tingkume ne kateleu de lei, penui ’nteumena penui kisua-sua ge tew de lei.

²⁹Penui chângge Immerbe na Zadokbe ne pe kisua kateleu de lei. Pe chângge Shekaniabe na Shemaiabe Tingnaimikpat ’mbia Kemui kereîpeu ne tew de lei.

³⁰Pe chângge Shelemiabe na Hananiabe zai Zalapbe na paserukbepeu Hanunbe ne kêdabe sat kateleu de lei. Pe chângge Berekiabe na Meshullambe ne pe kisîam sua ze kateleu de lei.

³¹Pe chângge Molkijahbe gechâk kahekime ruage bambepeu zene kellumki guâ ka’ngguame benai helîkahedetme bambeki riâ chang ze Hammipphkad Kemui riâ zai pemik ge heki kehube sat riâ tatewchang de lei.

³²Zai pemikpî ge bambe gu hekakbe sîam benai Meli Kemui ze â gechâk kahekime benai helîkahedetme ne teleurechi gai de lei.