Read Zeme Naga NEHEMIA 5 Bible Online

NEHEMIA 5 - Zeme Naga bible

NEHEMIA 5

¹Chunage baudime benai penui nâu ramme ne penui puiname Judame peireige kesiatewbe kua ramme zuapat ti de lei.

²Penui ruagene, “Anui name ’mpeumi benai ’mpuimi ramme anui dage maîkie bam di daze, anui teu ze ring le ra hangge anui hetak pei lau,” kacheume bam di dadegeu.

³Hanggesame ne, “’Nchunggaileube hangge anui gu helu ramme, grepchî merie ramme, zai anui ki ramme pei gai ’nde lei, herakûm wangbe ziegene anui hetak hangge ngau le ra hangge zeu,” ze kacheume du bam de lei.

⁴Hanggesame ne du, “Anui gu helu ramme benai grepchî merie peireige heguang gu ’mpuâ meigairabe hanggene anui rangkâng kahepuk te lei.

⁵Anui gu hemeipum ze du anui puiname gu hemeipum gum ’nzuâ de lei, anui name ze du penui name gum ’nzuâ kam de lei; acheuleusedu anui ne anui name ’mpeumi benai ’mpuimi ramme je kebang hang ’nchi-chine chuipat kai de lei, anui na ’mpuimi hanggesame je â kebang hang chui gai ’ndi la de lei; kane chize ’ngngâ gai ra anui â mâ de rezie ga di de lei, hanggesame ne anui gu helu ramme benai grepchî merie ramme tei’ndibe ziegeneu,” kacheu de lei.

⁶Penui ka’nretbe benai aipau sam ramme I seu gai dege a lumpum-desang di de lei.

⁷A runne I a lung kateleu de lei, zai besuitewme benai saibe ramme je I chau’ngkui gai de lei, I ne penui je, “Ningnui â pe sikina karai gene peching luteu de lei,” acheu bei de lei. Zai aigum ze penui ne tewbe deu hangge baudime-’ndui I kû gai de lei,

⁸zai penui je, “Anui â anui tewchiduibe riâ gene anui puiname Judame je hezat kêdame dage zuagai’ndibe gene penui je teiwang gai kadai de lei; kane ningnui â penui je anui dage zua gai be ra hangge ningnui puiname je ’nsangdu zua lei!” acheu bei de lei. Penui â rim ze bam di de lei, zai penui sagairabe samkie kat hang du peulak ti de lei.

⁹Chidadege I ne rang gai ze, “Ningnui tewbe tâ ze yi mak te lei. Anui teureime heramzatme ne ngau’nna gai mak ra hangge anui Rapeu je ningnui hing ra yibe kau de mak semei?

¹⁰Chipau peireige du I benai a puiname zai a guâ ka’ngguame ne rangkâng benai chêu penui je hepuk kai lei. Aipau gu peching ze sâu ne zu kei lei.

¹¹Nemai gîmsing ge penui ne helu ramme, grepchî lu ramme, olib merie ramme, zai penui ki ramme, zai rangkâng haî-haî, chêu, wain, zai mâ-châ ramme ningnui ne penui dagene lube ze penui dage peiruî dai be lau” acheu bei de lei.

¹²Dadege penui ne, “Airamme ze anui pei gai dai bu, zai penui dagene mâ de kie ra mak lei. Nang ne kerangbe luigum ze anui tew gu lei,” ze kacheu de lei. Chidadege tingkume je I ne kû gai de lei, zai penui ne hatkailube luigum ze tew ra penui dagene deseugaibe I lu de lei.

¹³I du a kia kakbe paî poine kechungpit kai lu penui je, “Aipau hatkailube tew mak tizai â, chigumbe kau je â pe ki benai pe tatew gene Hera ne peize kechungtua ne lau. Chidezai chigumbe kau je â kechungtua gai zai tew peruahuâng gai be ra hangge zeu,” acheu bei de lei. Zai baudime wangka’nduime leine ne, “Amen” kacheu de lei, zai Tingwang je toa de lei. Zai penui ne deseugailube luigum ze baudime tew de lei.

¹⁴Chipau peireige du Judame ram ge laksaibe chang ra achu sumgaibe ting gene chu ze, heguang, Artakserksezbe ne kaheguangbe tingkum ’ngkai kum gene kum himreu ze kena riâ chang ze tingkum kereu ze kena riâ I du zai a puiname du laksaibe hetak ze teu mak lei.

¹⁵A suage laksaibe changme ramme zene baudime peireige heputkeritbe tua gai bei de lei, zai gepût shekel hedai lube peireige du penui dagene tak benai wain ze lu ka’nsui de lei. Penui guâ ka’ngguame ’nsangnedu baudime peireige kengang ze bam de lei. Kane Hera je kehingbe ziegene I â chigum ze tew mak te lei.

¹⁶I â aipau kerie-riebe tâ ge du tewgaihâ ze bam de lei, zai a hangge mâ de kedei lu gai mak lei, zai a guâ ka’ngguame leine tâtewrabe hangge wangherua ze bam de lei.

¹⁷Chipau peireige du anui je lunghiâme, heramzatme a dage wang’nzie ze bamme je chak kai mak ze, a gu tak teube ge Judame benai saibe ramme ziemmena mai kat ze rengeu bam de lei.

¹⁸Chidadege mai kat teseu hangge getumsei kat zai meli peleuyibe seruk riâ â ’nnang di de lei; ’nruî ramme du chigum ze a hangge teleu gai ra ’nnang di de lei, zai hezie kereu ’nsangne ge wain ze misongga teleugit kai ra ’nnang di de lei; airamme leine acheuleusedu laksaibe gu hedam ze I â kie mak te lei, aime peireige tâtewkahereube putritbe bambe ziegeneu.

¹⁹A Rapeu gau, a gu keyibe hangge aime hang I ne tewgai’ndibe leine chibam lau.