Read Zeme Naga NEHEMIA 6 Bible Online

NEHEMIA 6 - Zeme Naga bible

NEHEMIA 6

¹Chunage Sanballatbe benai Tobiabe zai Arab’mpeu Geshembe zai anui teureime leine dage I ne kerie ze tei’nsapchu gai de lei be benai chige putkapelabe bâm mâ de ga de lei be pauchang gai bei dadege â (keriekemui ramme ge ’ngkam ramme I tei’nsap kai mak bam leusede),

²Sanballatbe benai Geshembe ne a dage sam lang gai ze, “Ono kâm ge keloa kat gene anui hedau ra hang wang lau,” kacheu de lei. Kane penui â achu tew’nsia ra ka’nning de lei.

³Zai I ne penui dage hepâupaume je lang gai ze, “Tâ kedibe I tewbe ziegene I â wangkeuchi lak lei, ’ndaitew ze chize I sâu ze ningnui tailam wangkeudibe luage tâ ze tew’nsau ra lau?” ze kacheu de lei.

⁴Zai aigumbe ’mpuî gene lua medai penui ne a dage sam lang gai de lei, zai chipau luîrun ze I ne penui je samkak kai bei de lei.

⁵Chipau luirun ze Sanballatbe ne pe guâ ka’ngguapeu je lua pamengeube lang gai bei ze pe ba ge samkela latlabe tei lu wang de lei.

⁶Pelung ge rawgaibe ze, “Heramzatme leine dage chîchang kam da, zai Geshembe ne du sa ze, nang benai Judame herei ra ka’nning lei, kacheu de lei; chipauziegene ningnui kerie-rie de lei; zai aipau sam seulube luigum zai â, nang ne penui gu heguang chang ra ka’nning de lei.

⁷Zai ‘Judaram ge heguang hangkat la lei,’ ze ning rasam Jerusalem ge pau ra kemeume je nang ne du sum gai de lei. Chidaze chunage aipau sam ramme luigum ze heguang dage pau gai be ra de lei. Chidaze chunage kei lei, mâ-laddei gai ’mmi kei lei,” ze raw gai de lei.

⁸Chidadege I ne pe dage sam lang gai ze, “Nang rangbe luigumbe ramme mâ de tewgaibe ga lei, chiramme ze â nang runne ning lung gene chiampatbe kau daseu,” acheu bei de lei.

⁹Penui ’nteumena ne anui je tewhingrimgaineibe ziegene, acheu ze, “Tâtewbe gene penui sau du de lei, chize tew’nsang gai ra mak lei,” ze ’nninggaibe ziegeneu. Kane chunage â Hei a Rapeu gau, nang ne a baran tew’nchi gai lau.

¹⁰Delaiabe na Shemaiabe, Mehetabelbe chapeu pe ki ge bangnamgai’ndipeu ki ge I zuagutgap dege, pa ne rang ze, “Kellumki lungge Hera ki gene anai hedau kei lei, zai kellumki gu ’ngkam ramme ze kainam ne zu kei lei; ningchu tewchat ra penui wang gu daze, tingmuî ge ningchu tewchat ra penui wang gu de lei,” kacheu de lei.

¹¹Kane I ne kak ze, “I gumbe kau ziemmena pak’mbia gu semei? Zai ziemmena I gumbe kau kellumki ge gut lu bam dui semei? I â gut ra mak lei,” ze acheu bei de lei.

¹²Zai Hera ne pechu lang gai mak lei, kane a peireige aipau sam rang’ntuagaibe ze Tobiabe benai Sanballatbe ne pechu lîgai’ndibe ziegene lei be I ’nningchi zai ngaupat ti de lei.

¹³Aipau deu hanggene pechu lî gai de lei, chidezai I hing di ze aigum ze tew gai, zai hemuigaiderabe hangge neu, dezai penui ne a ji tew’nsia gai le ra, achu teihenuitewgaichi le ra hangge zeu.

¹⁴A Rapeu gau, Tobiabe benai Sanballatbe je chî bam lau, aigumbe tâ ramme penai tewgai’ndibe ziegeneu, zai kemeu’mpui No-adiale benai kemeume leine ne achu tewhingrim gai be ra luneime je du chibam lau.

¹⁵Chidadege hezie rengeu ze kena lung gene, Elul kêu hezie kereu ze mengeu mai ge kerie-riebe tâ tew kam lu de lei.

¹⁶Zai anui teureime leine chize seu lu dege, anui huâzie ge bamme heramzatme leine ne hing di de lei, zai penui runne penui je ’nninghelêu-desang gai di de lei; anui Rapeu ne ka’ngngâbe gene aipau tâ ze tew’nsang lu de lei be penui chî lu dadegeu.

¹⁷Chipau peireige du chipau ting ge ze Judaram ge ziemmena kedime ramme Tobiabe dage misongga ze sam lang gai de lei, zai Tobia gu samkela ze du penui dage wang ze bam de lei.

¹⁸Judaram ge misonggame ne besie-hingde gene pe dage piheruagai’ndibe bam de lei; pa â Arabe na Shekaniabe chapeu changbe ziegeneu: zai pe na Jehohananbe ne Berekiabe na Meshullambe na ’mpuimi je pe nâu hang lu de lei.

¹⁹Penui ne pe tatew keyibe ramme rasam du achu salia de lei, zai a sam ramme pe dage pau gai bei de lei. Dadege Tobiabe ne achu kakedungbe sam lang gai de lei.