Read Zeme Naga NEHEMIA 8 Bible Online

NEHEMIA 8 - Zeme Naga bible

NEHEMIA 8

¹Pasenabe kêu chang di dadege, Israel name penui gu namdi ramme ge bam di de lei. Zai Hedui Kemui kacheube suage keloa’ndi ge ziemmena leine hangkat gum ze wang’ndui gai de lei; zai Israelme hangge Tingwang ne peigaibe Mosabe gu hingde leisikuak teiwang ra hangge penui ne leisirawpeu, Ezrabe je rang gai de lei.

²Zai pasenabe kêu raîlangbe tingnaimikpui ge, baudime wangka’nduibe suage seu lu ze ’nningchiduime, ’mpeumi ramme benai ’mpuimi ramme leine suage tingkupeu Ezrabe ne hingde leisikuak teiwang de lei.

³Zai ’mpeumi ramme benai ’mpuimi ramme, zai mâ-’nningchiduime leine suage hechuasûn gene chu ze tîngna riâ chang ze Hedui Kemui suage keloa’ndi ’mbia ’nsua lu ze, chipau leisikuak ze pa ne kiâ de lei; zai hingde leisikuak kiabe ge ’nteumena kun ’nduarim bam de lei.

⁴Zai chipau deu hangge penui ne tewgailube heching ne tewbe samsabe ra peireige leisikuakerawpeu Ezrabe sap te lei; zai pe taige, Mattithiabe, Shemabe, Anaiabe, Uriabe, Hilkiabe, zai Ma-aseiabe, pa hezat’mbia sap de lei, zai pa heku’mbia, Pedaiabe, Mishaelbe, Malkijabe, Hashumbe, Hash-baddanabe, Zekariabe, zai Meshullambe sap te lei.

⁵Zai pa â ’nteumena peirei ’mbe sap’ndûlang ze bam dadege, ’nteumena mikngau gene Ezrabe ne leisikuak rapat te lei; zai pa ne leisikuak kuakpat kai dege baudime ’nteumena sapchu de lei.

⁶Zai Hera Kedipeu Tingwang je Ezrabe ne getoabe pei gai de lei; zai ’nteumena ne penui ba getuachu lu ze, “Amen, Amen,” acheu ze kak te lei; zai penui peî kei’ngkumkeu lu, penui ju kedei ’mbe kei’nsuk lu Tingwang je kakellum de lei.

⁷Jeshuabe, Banibe, Sherebiabe, Jaminbe, Akkubbe, Shabbethaibe, Hodiabe, Ma-aseiabe, Kelitabe, Azariabe, Jozabadbe, Hananbe, Pelaiabe zai Lebime ne du baudime penui bâm bâm ge rim ze bambe luage, hingde ze chî’mmi le ra baudime je geteilia’ngngâ gai de lei.

⁸Zai penui ne Hera gu hingde leisikuak kiâliâ’nchichiak kai bei de lei; zai chi kiâgaibe ze ziemmena ’nningchi le ra hangge penui ne parimba ze salia gai bei de lei.

⁹Zai laksaibe changpeu Nehemiabe zai tingkupeu benai leisirawpeu Ezrabe, zai ziemmena je geteiliagaime Lebime ne baudime ’nteumena je, “Ningnui Rapeu Tingwang dage nemai â ka’nchibe mai lei; desui ze hap se lau,” ze acheu bei de lei. Hingde gu sam ramme penui seu lu dege, baudime ’nteumena hap kam di dadegeu.

¹⁰Chidadege pa ne penui je, “Ningnui ’mpuî lam-lam’mbe tatwak chu lau, peleuyibe châ teu ze wain kumbe sak zu lau, zai teu ze sak ra pe hangge mâ de teleugailemakme dage hedam lang gai lau; nemai ze â anui Wangpeu dage ka’nchibe mai chang daseu; zai desui ze bam se lau, Tingwang suigut ze â ningnui ranchibe daseu,” ze acheu bei de lei.

¹¹Chidadege Lebime ne ’nteumena je tew’ntaurim gai ze, “Sauzîng gai de zu lau, nemai tingnaimikpui â ka’nchibe daseu; desui ze bam se lau,” ze acheu bei de lei.

¹²Dadege penui je salia’nchigaibe sam ramme penui ’nningchidibe ziegene teu ze sak ze hekuak puahezakteu ze ’ntakediâu bam ra penui ki lam-lam’mbe tat ti de lei.

¹³Pakenabe mai ge baudime ’nteumena ruage pe kiria-ria ge besuitewme ramme, tingkume, benai Lebime je ngua lu hingde leisikuak gu sam ramme getei ra, leisirawpeu Ezrabe dage wangkaherua de lei.

¹⁴Zai Mosabe dagene Tingwang ne samdie gai ze pasenabe kêu kahengîbe ting ge Israelme â sieki ramme ge bam ra lei,

¹⁵zai penui ne penui gu namdi ramme benai Jerusalem ge aigum ze rangbagaibe sam, “Rawgai’ndibe gum ze sieki ramme tew ra hangge peloa ramme ge tatpat ze olib keî ramme, hênamkang gu olib, Murtel buâ, teratu, zai kêdabe peneu kiebe bang ramme teiwang zu lau,” ze sam lang gai ra lei be hingde ge rawgaibe penui ngaudau de lei.

¹⁶Chidadege baudime zuapat lu, chiramme teiwang lu, penui hang-hangge penui ki’mpûm ’nsangne ge, zai penui ki-kegeu ramme ge, zai Hedui Kemui benai Ephraim gu Kemui pebâm chuangbe-bâm ge sieki ramme tew gai de lei.

¹⁷Zai kebangchangbe gene helatwangkadaime ’nteumena ne sieki ramme tew lu ze sieki ramme ge bam de lei; Nunbe na Jeshuabe ting gene chipau mai riâ chang ze Israelme chize tew gai mak daseu. Zai chige hesuiyi’ntaka’ndibe bam de lei.

¹⁸Zai raîlangbe mai gene chu ze nâlangbe mai riâ chang ze, nai’nsangne Hera gu hingde leisikuak gene pa kiâ ze bam de lei. Hezie sena penui hengî bam de lei; zai padesatbe mai ge riagai’ndibe hingde luigum ze ’nsimrim ze ’ndui bam de lei.