Read Zeme Naga NEHEMIA 9 Bible Online

NEHEMIA 9 - Zeme Naga bible

NEHEMIA 9

¹Chunage aipau kêu hezie ’ngkai ze medai mai ge Israelme teseurei ze miseigiriapaî bâ ze, zai penui peî ramme ge kedeinia ’nnuk kai lu ze wangka’ndui de lei.

²Zai Israelme penui runne penui je hesangme leine dagene bamchâm lu ze, zai sap lu ze penui gu hemui ramme benai penui paume gu hemui-helut ramme ralia de lei.

³Zai penui bâm gene sapchu lu ze ’nchetkak kechum riâ penui Rapeu Tingwang gu hingde leisikuak ze kiâ de lei; chigene kêdabe ’nchetkak kechum riâ â penui gu hemui pau gai ze penui Rapeu Tingwang je kakellum de lei.

⁴Lebime bambe kaira ge Jeshuabe, Banibe, Kadmi-elbe, Shebaniabe, Bunnibe, Sherebiabe, Banibe zai Kenanibe sap te lei; zai penui ne penui Rapeu Tingwang dage penui laîkai ze ka’nrung de lei.

⁵Chidadege Lebime, Jeshuabe, Kadmi-elbe, Banibe, Hashabneiabe, Sherebiabe, Hodiabe, Shebaniabe zai Pethahiabe ne “Sapchu ze ningnui Rapeu Tingwang je betunmakbe gene betun mak ze toa lau. Ning ji pengêudibe suanggaibe benai getoabe leine peigaibe peireige di’ngkeu ze bambe ji je peize toa lau,” ze kacheu de lei.

⁶Zai Ezrabe ne sa ze, “Nang â Tingwang lei, ning runne lei, nang ne tinggîm tew gai, tinggîm ramme gu tinggîm benai pelung ge bambe leine, kedeirei benai pelung ge bambe leine, sungkling benai pelung ge bambe ramme leine tew gai bei de lei; zai chiramme leine nang ne tei’nggim bei de lei; zai tinggîm baudime ne ningchu kakellum lei.

⁷Nang â Abrahambe je kelângpatpeu, zai Kaldiame gu Ur namdi gene pechu lupat ze pe ji hangge Abrahambe ze ’ntakkaibe Rapeu Tingwang lei;

⁸zai ning masuage pa pelung lungsangtewbe nang ngau de lei, zai pe chaname je, Kanaanme, Hethme, Amorme, Perizme, Jebusme zai Girgashme gu heram ze pei gai ra pe dage nang ne samhat kai bei de lei; zai nang hatkaibe ze nang ne tewpui gai bei de lei, nang â kapelingbe daseu.

⁹“Zai anui paume Ijipram ge kahereube liebe nang ne ngau zai Kegiebe Sungkling ge penui ka’nrungbe kuâ nang ne ’ngking bei de lei,

¹⁰Zai Pharaobe benai pe guâ ka’ngguame leine zai pe ram lungge bamme leine peireige nang ne ka’nchetbe ramme benai ningdaulakbe tâ ramme tew gai bei de lei, anui paume peireige penui ne ngauka’nnabe tâ tew gai lei be nang ne chî daseu; zai ning ji di ra nang ngau lu de lei, nemai riâ chang ze ning ji di ze bam gum zeu.

¹¹Zai sungkling zuilung ge kedei changbe ge penui tatpela le ra hangge penui suage nang ne sungkling kuipâng gai bei de lei; zai penui je guaka’nchume je gechukbe ramme ge nang ne tuâ gai bei de lei, hedui kedibe ramme ge tingchu tuâgaibeibe gum zeu.

¹²’Nrîmbeting ge kemâuchia (’ntung) ne nang ne penui je nguatat bei, zai penui tatrabe ’mpuî tewreba gai ra hangge tingmuî ge hemichia ne nguatat bei de lei.

¹³Sinai Loa peireige nang wangkeu de lei, zai tinggîm ’mbene penui je nang ’mpau ze, ka’nzeibe riagaibe hingde-sie ramme benai hingde-gesang ramme, keyibe hingde tewgaibe ramme benai hingde ramme pei bei de lei,

¹⁴zai ning gu ka’nchibe ’ntakbambe mai ze penui chî le ra nang ne tew gai bei, zai ning guâ ka’ngguapeu Mosabe dagene samdiegaibe ramme rawgaibe hingde ramme, zai ning gu hingde tei ra penui je die gai bei de lei.

¹⁵Nang ne penui ka’nzeibe hangge tinggîm ’mbene penui je tingku pei bei, zai penui kahereibe hangge tingchutum gene hedui tewpat kai bei de lei, zai penui je pei ra nang ne hatkai’ndibe heram ze ’nram le ra nang ne penui je rang gai bei de lei.

¹⁶“Kane penui benai anui paume ne gechîrettew ze penui kunrachi zai ning gu samdiegaibe ramme pheu mak te lei;

¹⁷penui â hekuâpheumeu de lei, zai penui ruage tâningdaulakbe ramme nang ne tewgaibe ningdau ta di de lei; kane penui kunrachi ze Ijipram ge kebang chang ra helatwangdairabe hangge penui je nguarapeu hangge sum gai de lei. Kane nang lun gai ra kuâbampeu, ngau’nggia zai kehungbe ne pui, heraitie zai hungka’ntipbe ne puigit zai penui je put kai mak ze bambe Rapeu lei.

¹⁸Penui hangge penui runne getumpoine ne heraluî hang tew gai lu ze, ‘Aize Ijipram gene ningnui je nguapatpeu ningnui Rapeu de lei,’ ze penui acheusede, zai ning ji tewhebâ-desang bam sede,

¹⁹nang ka’nggiabe ramme di-kadesangbe ziegene penui je tingkangram ge sâudiak kai mak lei; ’mpuîki ge penui je nguatatbe kemâukang zene ’nrîmbeting ge penui je sâu gai mak, zai penui tatkairabe ’mpuî tewrebagairabe hangge hemichia zene du kemuîbe ting ge penui je sâu gai mak te lei.

²⁰Penui je geteilia ra hangge nang ne ning gu Herui keyibe pei gai bei, zai penui mui gene ning gu manna ze nang ne tei’mbia gai mak te lei, zai penui kahereibe hangge nang ne hedui pei bei de lei.

²¹Tingkangram ge nang ne penui je kum hedai tei’nggim bei de lei, zai penui mâ de gabe tew mak tai lei; penui paîni ramme kai’nsia mak zai penui pî ramme du pum mak lei.

²²Zai penui hangge nang ne heguangram ramme benai hezat ramme pei gai bei de lei, zai penui hang-hang heram mik ’nsangne nang ne pei gai bei de lei; chidadege penui ne Bashan gu heguang Ogbe gu heram benai Heshbon gu heguang Sihonbe gu heram ze lu ’ndi de lei.

²³Tinggîm ge hegi ramme bambe gum ze penui chaname je nang ne tewpung gai bei de lei, zai chige gut ze heram ’nram le ra penui paume je nang ne ranggai’ndibe ram geze penui je nang ne nguagut kai bei de lei.

²⁴Chidadege penui chaname gut ze heram ’nram di de lei, zai penui suage nang ne Kanaanme heram deiname je ngam gai bei, zai penui ne chime je tewnei-neibe tew ra penui benai penui gu heguangme zai heram deiname je penui ba ge pei gai bei de lei.

²⁵Zai rieguabe namdi ramme benai kedeiyibe heram ze penui ne sut’ndi de lei, zai merua yibe leine puigit ze bambeki ramme, dekuaki kuilube ramme, grepchî merie ramme, olib merie ramme, zai mâ-hêrachi bang ramme misongga ze penui ne lu ’ndi de lei; chidadege penui teu ze ’nggeu lu ze chapat ti de lei, zai nang yi-kadesangbe geze penui lungwângchang ze bam de lei.

²⁶“Acheuleusede penui â hekuâpheu mak ze ningchu ’nggi zai ning gu hingde ze penui chai ’mbe gechaî gai nan ze ning gu kemeume, ning dage penui je teihelatwang gai dai ra hangge penui je laddeibeime je tewchat ’ndi de lei; zai ning ji tewhebâ-kadesangbe tâ tew gai bei de lei.

²⁷Chipauziegene penui je tewsâme penui teureime ba ge nang ne penui je pei gai bei de lei; zai penui kahereube liebe ting ge ningchu penui ku de lei, zai tinggîm ’mbene nang ne penui kuâ ’ngking bei de lei; zai nang ka’nggiabe ramme kedibe luigum ze penui teureime ba gene ripatrame, aime je nang ne penui je pei gai bei de lei.

²⁸Kane saukatemibe penui ngaulube châng dege ning mikngau ge tâ-kesiabe penui tew kadai de lei, zai penui teureime ba ge nang ne penui je sâu gai bei de lei, chidezai chime zene penui peireige samram ra hangge zeu; acheusede penui helatwang dai lu ningchu ku bei dadege â tinggîm ’mbene nang ne ’ngking bei de lei, zai ning gu ka’nggiabe ramme bambe luigum ze lua daikie mei ze nang ne penui je ripat kai bei de lei.

²⁹Zai ning gu hingde ge penui je teihelatwang gai dai ra hangge nang ne penui je laddei gai de lei, sede penui gechîrettew ze ning gu samdiegaibe ramme pheu mak ze, kane ning gu samdiegaidiakbe hingde ramme chize reilube gene ziemmena ringlerabe hingde peireige hemui gai de lei, zai keriângdu ze hekunrachi, zai hekuâpheu mak te lei.

³⁰Patingkum misongga ze penui je nang ne lun ze lie bei de lei, zai ning gu Herui ne ning gu kemeume dagene nang ne penui je laddei bei de lei; sede penui ’ngkingmeu de lei. Chipauziegene heram ramme ge pedeiname bamme ba ge nang ne penui je pei gai bei de lei.

³¹Acheusede nang ka’nggiabe ramme kedibe ziegene nang ne penui je tewbetûn gai mak, zai sâu gai mak te lei; Nang â ka’nggiabe benai kelunbe ne puibe Rapeu daseu.

³²“Chunage chidaze anui Rapeu gau, Kedibe zai reziechibe zai mi kehingbe Rapeu, samhatkaibe benai hungka’ntipbe teibe Rapeu gau, anui peireige, anui gu heguang peireige, anui gu heguangme, anui gu tingkume, zai ning gu ziemmena leine peireige Assiriaram gu heguangme ting gene chu ze nemai riâ chang ze kahereube liechangbe leine ze peize mâ-kecheîne hangge nang ’nning gai se lau.

³³Acheusede anui peireige wangchangbe leine ge nang â ka’nzeibe tâ tew gai bei de lei, nang â lungsang tâ tew gai da, kane anui â kesiabe tâ tew gai ’ndi daseu;

³⁴anui gu heguangme, anui gu heguangsinme, anui gu tingkume zai penui je nang ne peigaibe ning gu samdiegaibe ramme benai nang ne ka’ngngiambe kuâ penui pheu mak te lei.

³⁵Penui kaheguangberam ge zai nang yi-kadesangbe gene nang ne penui je peigaibe dei ge zai penui masuage heram kedibe benai kedeiyibe heram nang ne peigaibe ge penui ne ningchu ’nggua mak te lei, zai penui tâ-kesiatewbe gene penui heliwang mak te lei.

³⁶Pie le lau, nemai riâ chang ze anui â kebang ge bam de lei, peranchi benai pe gu kela yibe ramme nguaheu ra anui paume je nang ne peigaibeibe heram geze, pie le lau, anui â kebang chang ze la de lei.

³⁷Zai anui gu hemui ramme ziegene anui peireige samram ze bam ra nang ne kaibeibe heguang dage perachî keyibe ’nchikeube leine tat la de lei; penui ne anui pum ramme benai anui gu kaurui ramme peireige tewnei-neibe tew ra rezietei la de lei, zai anui â mi duângga-kadesangbe ge la de lei,” kacheu de lei.

³⁸Airamme leine ziegene anui samhat’ntiprip kai ze rawkeu gai de lei, zai anui gu heguangsinme, anui gu Lebime, zai anui gu tingkume ne chige penui gu ka’nchatbe tau gai de lei.