Read Zeme Naga ESTHAR 1 Bible Online

ESTHAR 1 - Zeme Naga bible

ESTHAR 1

¹Ahasu-erabe ting ge Indiaram gene chu ze Ethiopiaram riâ chang ze heguangram kecheibe ramme haî kat ze ’ngkai ze sena peireige kaheguangpeu Ahasu-erabe ting ge,

²chipau ting ge hekuînâm Susa ge pe gu heguang-bâm ge heguang Ahasu-erabe ’ntau ze bambe ting ge,

³pa kaheguangbe tingkum pakechumbe kum ge pe gu heguangsinme benai pe guâ ka’ngguame leine hangge, Persiaram benai Mediaram gu hereikangme ruage besuitewme zai heram poine ramme gu saibe ramme benai laksaibe ramme je pa ngua lu ze luube-bâm tew gai de lei,

⁴chipau luage pa kaheguangbe ngeudibe, keheube zai pa kaheguangbe reziechibe gu peluiyibe benai ngauyibe ramme hezie misongga ze hezie haî kat ze riakdesat riâ pa teilia de lei.

⁵Zai aipau tingnaimikpui ramme kam gai dege heguangki gu merie lung gene Susa hekuînâm ge wang gai ze bamme, kedi-kechei leine hangge hezie sena hang luube-bâm tew gai kadai de lei.

⁶Chige kelang hâbe ne lîmsungbe paî tew gai, zai tapkaibe paî ka’nzaibe ramme ne banutlang benai tologielangria kitlube ramme gînggailube ge gepûtgeî riagua ne tingchugeu chia ramme ge lîm gai ze bam de lei, zai porphiri, tingchugeu teluipui benai tingchu pemîhungbe ramme ne taureu gai lu ze kedei ne lialube peireige gechâk benai gepût jeîra ramme du bam de lei.

⁷Hepiak ramme luî gechâm-châmbe gechâk ne tewlube piak ramme gene wain ka’nggua de lei, heguang pe ba dibe luigum ze heguangki gu wain â misongga ze bam de lei.

⁸Zai hingde tewgaibe luigum ze sak te lei, mî je du ’nchi-chine tew mak te lei, ziemmena leine hangge penui ne nei-neibe luigum ze ’nggua gai be ra heguang ne pe gu heguangki ge besuitewme je die gai bei de lei.

⁹Heguangpui Bashtile ne du heguang Ahasu-erabe gu heguang ki lung gene ’mpuimi ramme hangge luube-bâm tew gai de lei.

¹⁰Hezie pasenabe mai ge wain sakbe gene heguang lungsui ’ngnguplai ze bambe luage, pa ne kahetiâme hangsena hekisiâm reîme heguang Ahasu-erabe guâ ka’ngguame, Mehumanbe, Bizthabe, Harbonabe, Bigthabe benai Abagthabe, Zetharbe, zai Karkasbe je samdie gai ze,

¹¹Heguangpui Bashtile je pa heleuyibe ze ziemmename leine benai heguangsinme je teilia ra pe gu heguangpui peichûp kai lu ze heguang suage nguawang ra die gai bei de lei; pa heleuyibe â ngauyi-kadesang dadegeu.

¹²Kane pa wang ra heguang gu samde kahetiâme ne paugaibeibe ze heguangpui Bashtile ne lun mak tai de lei. Aipau deu ge heguang pe lumpum-desang di de lei, zai pa pe lumpumbe tâ ze pe lung ge hemitaube gum bam di de lei.

¹³Chidadege ziemmena kaningchingme beting-panehî chime dage heguang ne penui maning ka’mmêt te lei—aigum ze tewbe ze â hingde benai samrambe-sie chika’mmime dage heguang ne tewka’nziebe sietak dadege,

¹⁴pe dage kahechutme, Persiaram benai Mediaram ge heguangsinme hangsena, heguang ju bambe tak ngaulume, zai heguangram lungge tâbâm-mui ge ka’ntaume, Karshenabe, Shetharbe, Admathabe, Tarshisbe, Meresbe, Marsenabe, zai Memukanbe je—:

¹⁵“Heguang Ahasu-erabe gu samde kahetiâme ne paukeligaibe ze pa ne tewgaimakbe ziegene, heguangpui Bashtile dage hingde-sie luigum ze ’ndaikau tew gai ra lau?” kacheu de lei.

¹⁶Chidadege heguang benai heguangsinme bambe gene Memukanbe ne rang ze, “Heguangpui Bashtile ne heguang dage runne mâ-tewmau mak te lei, kane heguang Ahasu-erabe gu heguangram leine ge heguangsinme leine benai ziemmena leine dage tewmaugaibe chang de lei.

¹⁷Heguangpui ne aipau tâ tewgaibe ze ’mpuimi leine chî kam de ra tew gai gu da, chidezai penui napeume je ngau’nna ze, acheu sa ze, ‘Heguang Ahasu-erabe ne heguangpui Bashtile je pe suage nguawang gai ra samdie gai de lei, zai pa â wang mak tai de lei,’ ze penui ne acheu gu daseu,

¹⁸nemai gîm sing ge Persiaram benai Mediaram gu ’mpuimi ramme heguangpui luilung tak rasam seulume ne heguang gu heguangsinme je salia gu de lei, dezai ngauka’nnabe benai mi râtabe misongga pat tu de lei.

¹⁹Heguang ne hezuâ dizai â, peize pe dagene heguang samde langpat kai be lau, chidezai chipau hingde ze tewkeli dai ta ra hangge Persiame benai Medesme gu hingde ruage aipau samde ze raw gai be lau, Heguang Ahasu-erabe suage Bashtile â wang dai ta ra de lei be zeu; zai peize heguang ne pa sua â keyipui je pa kaheguangbe bâm ze pei gai ne lau.

²⁰Chidezai pe gu heguangram di-desang ze bambe pebâm leine ge heguang ne hingde tewgaibe rangba gai bei dezai ’mpuimi leine ne penui napeume je kedi-kechei sa mak ze hengêu pei gu de lei,” kacheu de lei.

²¹Aipau sam geteiliabe ge heguang benai heguangsinme ne hesuî-hezuâ gai di de lei, zai Memukanbe ne pelungning sam saliabe luigum ze heguang ne tew gai de lei;

²²pa ne pe gu heguangram kecheibe ramme leine ge, heram leine ge penui gu leisirit zat gene zai ziemmena leine dage penui lad gene samkela lang gai de lei, chidezai ’mpeumi leine ne pe ki ge rezieteipeu chang le ra, zai pezatme lad luî gene sam sachi le ra hangge zeu.