Read Zeme Naga ESTHAR 2 Bible Online

ESTHAR 2 - Zeme Naga bible

ESTHAR 2

¹Airamme chângge heguang Ahasu-erabe pe lumpumbe hegeikeu dai di dege, Bashtile je zai Bashtile ne ’ndaikau tew gai ’ndi mei be, zai pe peireige ’ndaikau hingde kai ’ndi mei be ’nningdau dai di de lei.

²Chidadege heguang guâ ka’ngguame pe hiage buâme ne pechu, “Peize heleuyime leusangka’nchime heguang hangge peu zu lau.

³Zai ’mpuimi ramme deu ge rezieteipeu heguangpeu gu kahetiâpeu, Hegaibe kereîbe kangge Susa hekuînâm ge ’mpuimi bambeki ge heleume heleuyime leusangka’nchime leine je nguawang’ndui gai ra peize heguang ne pe gu heguangram lungge heram poine leine ge besuitewme hangge sum gai be lau, mâ-châ ka’nnukbe ramme peize penui je pei gai be lau.

⁴Zai heguang ne ka’nchâpui zene peize Bashtile kelei ge heguangpui chang lau,” kacheu de lei. Aize heguang ne pe suî hezuâ gai de lei, zai chigum ze pa tew de lei.

⁵Chunage Susa hekuînâm ge Juda sie teibe kau, Benjamin zat’mpeu, Kisbe na, Shime-ibe na Jairbe na, pe ji Mordekaibe kacheupeu bam de lei,

⁶pa ze â Babilon gu heguang Nebukadnezzarbe ne Judaram gu heguang Jekoniabe je kebang nîmtatbe ge Jerusalem gene kebang hang nîmtat’ndime ruage nguatat’mpamdipeu de lei.

⁷Pa ne peudâ na heleu’mpui Hadassale je pe peu benai pe pui ga di ze bam dadege ’ngkutchu de lei, chize Estharle de lei, chi heleu’mpui ze heleuyi zai pe pum luî ngauyi-kadesang de lei, zai pe peu benai pe pui chai di dege, Mordekaibe ne pe na heleu’mpui chang ze tei di de lei.

⁸Chigum ze heguang ne diegaibe sam benai pe gu hingde ze rangba gai bei dadege, zai Susa hekuînâm ge Hegaibe ne kereîbe kangge heleume misonggame je nguawang’ndui gai dege Estharle je du heguangki ge nguagut ze ’mpuimi ramme deu ge rezieteipeu Hegaibe kereîbe kangge kai bei de lei.

⁹Zai chi heleu’mpui zene pe suitew’mmibeibe ziegene pa ne ka’nchâbe chang di de lei; zai pa ne Estharle je kelua ze pe hang mâ-châ ka’nnukbe ramme benai hetak yibe ramme, zai heguangki gene kelângpatlume ka’ngguame heleume hanggesame je pechu pei gai bei de lei, zai chi heleume bambeki ge yilangbe bâm ge pa benai pe guâ ka’ngguame heleume je tei’ntuachu gai bei de lei.

¹⁰Ranglia gai mak ra Mordekaibe ne pechu samdiegaibeibe ziegene Estharle ne pe zat benai pe kiduîme rasam rang mak ze bam de lei.

¹¹Mordekaibe â Estharle ’ndaigum la mei zai pe dage ’ndaikau wangchang ze la mei be chî le ra hangge nai’nsangne heguangki gu heleume bamkaheruabeki suage tatrua ka’nsui de lei.

¹²Heleuyirabe hangge penui je kateleube tingkak hangge, kêu seruk Mur-taudui ne, zai kêu seruk mâ-perîmyibe pemung hailube benai ’mpuimi ’nnukrabe hangge tewgaibe taudui ramme ne sau mak ze aigum ze kaibe ziegene ’mpuimi ramme hangge hingde kaibe kangge kêu kereu ze kena bamgailube chângge chunage heguang Ahasu-erabe dage zuagut ra heleume mige pe hangge periâ wangchang dezai—

¹³aigumbe ’mpuî gene heguang dage heleu’mpui gut dezai heleume bamka’nduibeki gene heguangki ’mbe ’ndaikau tei lu tatnei mei be ze pechu pei de lei.

¹⁴Hegî ge pa tat ze, zai hechua ge heleume bamka’nduibeki pakenabeki heguang gu nausîpui ramme je reîbepeu, Sha-ashgazbe ne kereîbe ge wang gai dai di di de lei; heguang ne pechu ’nchâ ze pe ji ’nchauku ze pechu kû gai lei makchai â, heguang dage pa gut dai mak te lei.

¹⁵Heguang dage gut ra hangge pe na heleu’mpui hangge pechu ’ngkut ze teichupeu Mordekaibe peudâpeu Abihailbe na Estharle hangge pehî wangchang dadege, ’mpuimi ramme je kereîpeu heguang gu kahetiâpeu Hegaibe ne geteigaibe sâu ze kêdabe mâ de pa kiesua mak te lei. Chunage Estharle â pechu ngaugaime leine mikngau ge ngauka’mmi de lei.

¹⁶Zai heguang Ahasu-erabe dage pe gu heguangki ge pakereube kêu, chize Tebeth kêu ge, pa kaheguangbe tingkum pasenabe kum ge Estharle je nguagut dege,

¹⁷’mpuimi ramme leine je sua â Estharle je heguang ne hung’nteu di de lei, zai leusangka’nchime leine je suadu pe mikngau ge pechu ngau’nggia zai ’nchâ di de lei, dadege pa ne pe peireige heguang peichûp luak kai ze Bashtile kelei ge pechu heguangpui hang suang gai bei de lei.

¹⁸Chidadege heguang ne pe gu heguangsinme benai pe guâ ka’ngguame dage luube-bâm kedibe tew gai de lei. Chize Estharle gu luube-bâm de lei. Pa ne heram leine ge ’mpuâmeibe ramme tew’ngga ra lun gai de lei, zai heguang ne peibuibe kela ramme peipat kai de lei.

¹⁹Leusangka’nchime je lua pakenabe nguawangherua gai kadaibe luage, Mordekaibe â heguang gu keriekemui ge ’ntau bam de lei.

²⁰Chunage Estharle â Mordekaibe ne pechu ranggaibeibe luigum ze pe kiduîme benai pe zatme rasam salia gai mak ze bam rei de lei; pa ne pechu ’ngkut ze bambe ting ge gum ze Estharle â Mordekaibe kuâ pheu ze bam de lei.

²¹Zai chipau ting ge heguang gu keriekemui ge Mordekaibe ’ntau lage, heguangki kemui reîme, heguang gu kahetiâme ruage hangna Bigthanbe benai Teresbe penai lumpum ze heguang Ahasu-erabe peireige penai bahuâ kai ra peu ze bam de lei.

²²Zai aize Mordekaibe dage chîchang di de lei, zai pa ne heguangpui Estharle je salia bei de lei, zai Estharle ne Mordekaibe ji gene heguang je salia bei de lei.

²³Chipau deu ze ’mmêt kai ze gesang de lei be chî lu dege, chipaupeu kena je ziemmena je kakchatbe-kaira gene kakchat kai bei de lei. Zai chize heguang bambe gene Rawgaika’nduibe Leisikuak ge raw gai de lei.