Read Zeme Naga ESTHAR 3 Bible Online

ESTHAR 3 - Zeme Naga bible

ESTHAR 3

¹Airamme chângge heguang Ahasu-erabe ne Hammedathabe na Agak’mpeu Hamanbe je pe tâ tei’ntuachu gai bei de lei, zai pe tâ tei’ntua gai ze pe dage bamme heguangsinme leine peireige ’ntau ra pe bâm hang kai bei de lei.

²Zai heguangki gu kemui ge bamme heguang guâ ka’ngguame leine ne keikeu ze Hamanbe je hengêutewbe pei gai de lei; pechu aigum ze tew ra heguang ne samdie gai bei dadegeu. Kane Mordekaibe â keikeu gai mak, zai hengêupeibe tâ du tew gai mak tai lei.

³Chidadege heguangki gu kemui ge bamme heguang guâ ka’ngguame ne Mordekaibe je, “Nang ’ndaitew ze heguang gu hingde ka’ngka lau?” kacheu de lei.

⁴Zai nang patingnaigepat penui ne pechu ranglia bei ze pa ne penui kuâ ’ngking mak bei dadege â Mordekaibe samsa zene dau le dui mei be chî le ra, penui ne Hamanbe je salia bei de lei; pa ne penui je pa â Juda’mpeu lei be ranglia gai bei dadegeu.

⁵Mordekaibe â pe dage kei’ngkumkeu gai mak, zai hengêutewbe du pei gai mak te lei be Hamanbe ngau lu dadege, Hamanbe â pe lumpumbe ne puigit bam di de lei.

⁶Kane Mordekaibe peireige runne pe batâ tew gai ra hangge â pa pe lungneu di de lei. Dadege penui ne pe dage Mordekaibe zatme rasam pauliâgaibeibe luigum ze, Mordekaibe zatme, Judame leine je Ahasu-erabe gu heguangram luî gene tew’ngga kam ’nde ra Hamanbe ne pe gu ’mpuî peuchu di de lei.

⁷Railangbe kêu Nisan kêu ge, Heguang Ahasu-erabe kaheguangbe tingkum kereu ze kena kum ge, patingnaigepat Hamanbe je penui ne Pur tuâ ka’nsui de lei, chize hedachakbe je rang de lei, zai penui ne kêu kereu ze kena kêu, Kena kêu riâ chang ze bekêu’nsang ne hedachak te lei.

⁸Chidadege Hamanbe ne heguang Ahasu-erabe je, “Ning gu heguangram poine ramme ’nsangne ge ziemmename ruage bamrarip ze hairiap ze bambe kau zat kat lamui lei; kêdabe zat leine dagene penui gu hingde â châmcheî ze lamui lei, zai penui â heguang gu hingde ze tei mak lei, chidaze penui je lun gai be ra hang â heguang hang kegiebe bam ra mak lei.

⁹Heguang ne pe suîhezuâ bei zai â penui je tew’ngga’nderabe hangge peize hingde tew gai be lau, chidezai I ne heguang heurâ lam ge rezieteime ba ge gepût talent chang kereu pei gai gu lei, dezai penui ne heguang heurâ reîka’nduibeki ramme ge chize kai be ra hangge zeu,” ze kacheu de lei.

¹⁰Chipau luigum ze heguang ne pe ba gene ka’nchetbe baroine lupat lu, Judame teureipeu Hammedathabe na Agak’mpeu Hamanbe ba ge pei gai bei de lei.

¹¹Zai heguang ne Hamanbe je, “Nang ne tewnei-neibe luigum ze tew ra hangge rangkâng du zai ziemmena je du ningchu I pei gai de lei,” acheu bei de lei.

¹²Chidadege raîlangbe kêu gu hezie kereu ze kechum mai ge heguang gu rawsuipeu tâ tewme je kûwang’ndui gai de lei, zai heram poine ramme leine ge samramme benai laksaibe ramme dage zai pezatme leine gu heguangsinme leine dage heram bâm leine ge penui gu leisirit zat leine gene benai hezat ’nsangne dage penui lad-lad gene, Hamanbe ne diegaibe luigum ze hingde raw gai de lei, chize heguang Ahasu-erabe ji gene raw gai lu ze heguang gu ka’nchetbe baroine ne taunim gai de lei,

¹³Judame leine, gechîng, hena, ’mpuimi zai napoine leine je pakereu-ze-kenabe kêu, Kena kêu gu hezie kereu ze kechum mai ge, mai kat gene tew’nsia ra, gîchat ra, zai penui gu kerua ramme sut kam ne ra hangge pungkahelakme dage samkela ramme lang gai de lei.

¹⁴Chipau mai ge kedâlerabe hangge chipau sam rawgaibe leisikuak ze ziemmename leine dage, heram bâm leine ge hingde chang ze rangbagaibe sam langpat kai ra teleu gai de lei.

¹⁵Heguang ne diegaibeibe gene sam teikahelakme kelua ze zuapat ti de lei, zai Susa hekuînâm ge chipau hingde ze peipat kai de lei. Zai heguang benai Hamanbe wain sak ra ’ntaukeu de lei; kane Susa namdi ze â pe duângga ze bam di de lei.