Read Zeme Naga ESTHAR 4 Bible Online

ESTHAR 4 - Zeme Naga bible

ESTHAR 4

¹Chigum ze tewgai’ndibe leine Mordekaibe chî lu dege, Mordekaibe pe paîni ramme hit ze meseigiria paî bâ ze timbun ’nnuk ze pe laîkai hap’nrung ze desui ze namdi zuilung ge zuapat te lei;

²miseigiriapaî bâ lu ze mî de heguang gu kemui lung ’mbe gutchi lak dadege, heguang gu keriekemui ’mbe gutbe bâm ge pa hang di de lei.

³Zai heram bâm ’nsangne ge heguang gu samde benai pe gu hingde wangchangdibe bâm leine ge Judame leine ruage teseurei ze hap ze desui ze heu-kadesangbe bâm di de lei, zai penui ruage misonggame ne meseigiria paî bâ ze timbun ge kela ze bam de lei.

⁴Estharle guâ ka’ngguame benai kahetiâme ne wang ze pechu salia bei dadege heguangpui pe duângga-desang di de lei; peize Mordekaibe meseigiria paî bâbe ze luaktua ’nde ra hangge pa ne Mordekaibe kairabe hangge paîni lang gai de lei, kane pa ne chiramme ze lumeu tai lei.

⁵Chidadege pe guâ ’nggua ra hangge sumgaipeu, heguang gu kahetiâme ruage hangkat, Hathakbe je kû gai de lei, zai aipau deu ze ’ndaikau mei zai ’ndaikautewbeibe ziegene mei be chî le ra Mordekaibe dage tat ra pechu die gai bei de lei.

⁶Heguangpeu gu keriekemui suage namdi gu keloa’ndi ge Mordekaibe dage Hathakbe tat ti de lei,

⁷zai pe dage wangchangbe leine zai Judame je tew’nggarabe hangge Hamanbe ne heguang gu rangkângreibeki ge pei gai ra hatkailube rangkâng riak singbe ze Mordekaibe ne pechu salia ze pau gai bei de lei.

⁸Penui je tew’nggarabe hangge Susa ge rawgaibe hingde peipatbe leisikuak je du Mordekaibe ne pechu pei gai bei de lei, chidezai pa ne Estharle je chize teilia gai be ra, zai pechu sakeli gai ze pa ne heguang dage tat ze pechu kiâm ze pezatme kelei ge gekiambe sam salia ra gecheu gai be ra hangge zeu.

⁹Zai Hathakbe tat lu ze Mordekaibe ne ’ndaikau salia mei be Estharle je rang gai bei de lei.

¹⁰Chidadege Estharle ne Hathakbe je rang gai ze, Mordekaibe hangge pe dage samkela lang gai de lei, acheu sa ze,

¹¹“Heguang gu helungbe sîam ge mige ’mpeumi mei nune ’mpuimi mei ze pechu kû gai mak ze gut ti zai â, chipau hangge hingde kat runne lei be heguang guâ ka’ngguame benai heguang gu heram ramme gu ziemmename leine ne chî kam lei; mi-mige je du peize ring le ra hangge heguang ne pechu heguang gu gechâk tui getuapatkaibeibe kau ne lei mak tizai â, tewchat kai himchang gu de lei. Zai heguang dage gut ra achu kûgaimakbe ze hezie himreu riâ chang de lei,” ze kacheu de lei.

¹²Zai Estharle ne ’ndaikau salia mei be ze penui ne Mordekaibe je ranglia bei de lei.

¹³Chidadege pa ne samkakbe ze Estharle dage teitat dai ra hangge Mordekaibe ne penui je rang gai bei de lei, “Heguangki ge nang bambe ziegene Judame kêdame leine sua â nang â ’ngkeu’ngkia ze kechai’nreipat duî lei ze nang ’nning gai se lau.

¹⁴Aigumbe hî ge nang ning kuâneu mak tizai â, kêdabe bâm gene Judame hangge, ka’ngngâbe benai ripatbe zuachu gu lei, kane nang benai ning peu ki ze â ga gai du lei. Zai aigumbe lua hanggene heguangram ge nang wang gai mak semei?” ze kacheu de lei.

¹⁵Chidadege Mordekaibe kuâ kakrabe hangge Estharle ne penui je aigum ze rang gai de lei,

¹⁶“Tat ze, Susa ge Judame bamme leine je kû’ndui gai lu ze, a hangge teseurei gai zu lau, zai tingmuî ge mei nune ’nrîmbeting ge mei ge du hezie kechumne mâ de teu mak, zai sak de sak mak ra lei. Ningnui ne tewbe luigum ze I benai a guâ ka’ngguame ne du tew gu lei. Chidezai hingde je ka’nggibe chang leusede, heguangpeu dage I tat ra de lei; zai I â chai lêuzai du chai de lei,” kacheu de lei.

¹⁷Chidadege â Mordekaibe tat ti de lei, zai Estharle ne pechu rangliabe luigum ze pa tew de lei.