Read Zeme Naga ESTHAR 5 Bible Online

ESTHAR 5 - Zeme Naga bible

ESTHAR 5

¹Pakechumbe mai ge Estharle pe gu heguang puâ ramme kai lu, pe gu samrambe-kisîam je teidabe, heguangki gu helungbe sîam ge sap te lei. Heguang â pe gu heguangki kûngduaki je teidabe pe gu heguangki lûngge pe gu heguang-bamrak peireige ’ntau bam de lei.

²Zai heguangki lungge Heguangpui Estharle sapbambe heguang ne ngau lu dege, pe mikngau ge pechu pa ne ’nchâ zai pa ne pe ba ge heguang gu gechâk tui bambe ze Estharle suage getuapat kai de lei. Chidadege â Estharle wang’nna lu heguang tui tûn deîtau gai de lei.

³Zai heguang ne pechu, “Heguangpui Estharle gau, ’ndaikau lau? Nang gekiebe ze ’ndaikau lau? I kaheguangberam pa’mpi riâ du ningchu I pei dui lei,” kacheu de lei.

⁴Zai Estharle ne kak ze, “Heguang ne pe suîhezuâ zai â, nemai ge heguang ji gene luube-bâm I teleugaibe ge heguang benai Hamanbe je peize wang gai lau,” kacheu de lei.

⁵Chidadege heguang ne rang ze, “Hamanbe je nguawang kelua lau, chidezai Estharle ne luneibe anai tewgaichi le ra hangge zeu,” ze kacheu de lei. Chidadege â Estharle ne muîteseu teleugaibe ge heguang benai Hamanbe wang de lei.

⁶Zai penai wain sakbe luage heguang ne Estharle je, “Nang luneibe ’ndaikau lau? Chize ningchu pei bu lei, Zai nang gekiebe ze ’ndaikau lau? I kaheguangberam pa’mpi riâ du chi nang gekiebe ze tewpui gai bu lei,” kacheu de lei.

⁷Kane Estharle ne sa ze, “I luneibe benai I gekiebe ze â:

⁸Heguang ne achu ngau’nggia gai ze I luneibe pei gai, zai I gekiebe tewpui gai ra heguang ne kahezuâ zai â, ’nchuamai ge muîteseu I ne penai hangge teleugairabe ge peize heguang benai Hamanbe wang gai lau, dezai ’nchuamai ge heguang ne ’ndaikau rang gai mei be I tew gu lei,” kacheu de lei.

⁹Zai chipau mai ge Hamanbe ’ntaza ze, zai pe lung suiyi ze zuapat ti de lei. Kane heguangki kemui ge Mordekaibe je Hamanbe ngau lu, pa â pe suage sapchu mak, zai hing de hingmakbe ngau dege, Mordekaibe peireige pe lumpumbe ne puigit ti de lei.

¹⁰Acheuleusede Hamanbe pe runne pe lunggetip kai lu, pe ki lam wang di de lei; zai pa ne lang gai bei ze pe kangme benai pe nâu Zerisle je nguawang de lei.

¹¹Zai Hamanbe ne penui je pa keheube ngaudibe rasam, pe na ’mpeumime ramme riak pauliâ, pe tâ tei’ntuachugaibe ramme leine gene heguang ne pechu pengêudi ra tewgaibeibe, zai heguang gu heguangsinme benai pe guâ ka’ngguame ramme peireige heguang ne ’ndaigum ze pechu tei’ntuachu gai mei be pe giê rasam sa de lei.

¹²Hamanbe ne sa’nduâ ze, “Heguangpui Estharle ne du pa ne luube-bâm teleugaibe ge heguang je ngua lu wang ra achu sâu ze mî je du lun me lei. Zai ’nchuamai ge du I benai heguang je pa ne ’nnâ gai kadai de lei.

¹³Sede heguang gu kemui ge ’ntaubambepeu Juda’mpeu Mordekaibe je I ngau tânege airamme leine hangge mâ de keyibe bam ta di de lei,” kacheu de lei.

¹⁴Chidadege pe nâu Zerisle benai pe kangme leine ne pechu rang gai ze, “Ziemmena je kakchatbe kaira peize sâu rengeu tew gai be lau, zai chige Mordekaibe je kakchat kai ra hechua dezai heguang je salia be lau; chidezai ning suiyi’nta ze heguang je ngua lu ze luube-bâm ge tatchu lau,” ze acheu bei de lei. Aipau geteiliagaibe ge Hamanbe pe lungsui kahezuâ de lei. Zai pa ne ziemmena je kakchatbe-kaira tew gai de lei.