Read Zeme Naga ESTHAR 6 Bible Online

ESTHAR 6 - Zeme Naga bible

ESTHAR 6

¹Chipau mai tingmuî ge heguang jeikeu lak ti de lei; zai ’ngngaîmerabe zat tâtewgaibe ramme gu rawgaika’nduibe leisikuak teiwang ra pa ne die gai bei de lei, zai chiramme ze heguang je kiâliâ gai bei de lei.

²Heguang Ahasu-erabe peireige penai bahuâ kai ra peume, kemuiki reîme, heguang gu hekêtkaime ruage ziemmena hangna, Bigthanabe benai Teresbe deu ge Mordekaibe ne ’ndaigum ze pau gai mei be rasam rawgaibe chige ngaudau de lei.

³Zai heguang ne sa ze, “Aipau ziegene Mordekaibe peireige ’ndaikau hengêutewgaibe benai suanggaibe tâ tew gai bei lau?” kacheu de lei. Heguang guâ ka’ngguame pe taige bamme ne kak ze, “Mâ de pe hangge tew gai mak te lei,” kacheu de lei.

⁴Zai heguang ne, “Heguangki sîam lungge châu la lau?” kacheu de lei. Chunage Hamanbe pa ne tewgailube, ziemmena je kakchatbe-kaira ge Mordekaibe je kakchatkairabe deu ge heguang je ’mpau ra hang heguangki helabe sîam ge zuagutchanggap ti de lei.

⁵Chidadege heguang guâ ka’ngguame ne pechu, “Chige Hamanbe hekisiâm lungge sap lamui lei,” acheu bei de lei. Zai Heguang ne, “Peize pechu gut lau,” kacheu de lei.

⁶Dadege Hamanbe gut te lei, zai heguang ne pechu, “Heguang ne hengêutewbe peigaineibe kau ziemmena je ’ndaikau tâ tew gai be ra yi gu lau?” ze kacheu de lei. Zai Hamanbe ne pe runne pe lung gene, “Achu ra zangno châu gumbe kau je heguang ne hengêutewbe pei gai nei ra lau?” ze ’nning gai de lei.

⁷Zai Hamanbe ne heguang je, “Hengêutewbe pei gai ra heguang ne ka’nchâbe kau ziemmena je â,

⁸heguang ne kaibe heguangpuâ ramme benai heguang ne chuagai’ndibe hekun teiwang gai ze pe peî ge heguang peichûp peize kai be lau;

⁹zai chipau puâ ramme benai hekun ze heguang gu heguangsinme pengêudilangme ruage hangkat dage bala gai be lau; pa ne peize chipaupeu hengêutewbe pei gai ra heguang ne neipeu je pe puâ teleu gai be lau, zai pa ne peize chipaupeu hekun ching ge ka’ntaupeu je namdi gu keloa’ndi ge nguarua ze pe suage tat ze acheu sa ze, ‘Hengêutewbe pei gai ra heguang ne neibe kau ziemmena dage â aigumbe tâ tew gai gu lei,’ ze peize acheu lau,” kacheu de lei.

¹⁰Chidadege heguang ne Hamanbe je, “Kelua zu lau, nang ne rangbe luigum ze heguang puâ ramme benai hekun teiwang lu ze, heguang gu keriekemui ge ka’ntaube Juda’mpeu, Mordekaibe dage chigum ze tew gai zu lau. Nang ne rangkeugai’ndibe mâ de sâupat kai se lau,” acheu bei de lei.

¹¹Chigum ze Hamanbe ne heguang puâ ramme benai hekun teiwang gai de lei; zai pa ne Mordekaibe puâ teleu ze namdi gu keloa’ndi tâluî ge hekunching chua lu ze tatrua ra pechu teleu gai de lei, acheu rangba gai ze, “Hengêutewbe pei gai ra heguang ne luneibe kau ziemmena dage â aigum ze tew gai gu lei,” ze sarua de lei.

¹²Chipau châng dege â Mordekaibe â heguang gu keriekemui ’mbe helatwang dai di de lei. Kane Hamanbe â desungra ze pe peî ’ngkumchim lu pe ki lam’mbe tatkelua ze tat di de lei.

¹³Zai Hamanbe ne pe nâu Zerisle benai pe kangme leine je pe dage wangchangbe leine salia bei de lei. Chidadege â pe gu ziemmena kaningchingme benai pe nâu Zerisle ne pechu, “Pe suage nang ne kâukeu gai ra changdipeu chi Mordekaibe ze Judame zat kau lei dizai â pechu nang duîchi lak ku lei, kane pe suage nang kâukeu himchang gu lei,” ze acheu bei de lei.

¹⁴Pechu penui ’mpau ze bambe luage heguang guâ ka’ngguame kahetiâme wang ze Estharle ne kedâgaibe luube-bâm ge Hamanbe je nguatat ti de lei.