Read Zeme Naga ESTHAR 7 Bible Online

ESTHAR 7 - Zeme Naga bible

ESTHAR 7

¹Chigum ze heguangpui Estharle je luube-teseu nguateu ra heguang benai Hamanbe gut ti de lei.

²Zai pakenabe mai penai wain sakbe luage heguang ne Estharle je sam’nneu kadai de lei, “Heguangpui Estharle gau, nang luneibe ’ndaikau lau? Chize ningchu I pei bu lei. Zai nang gekiebe ze ’ndaikau lau? I kaheguangberam pa’mpi riâ du chi nang gekiebe ze tewpui gai bu lei,” acheu zeu.

³Chidadege heguangpui Estharle ne kak ze, “Nang ne achu ngau’nggia gai zai â, Hei heguang gau, aize heguang ne pe suîhezuâ zai â, I gekiambe gene a keringbe pei gai be ra, zai I gekiebe luigum ze a zatme je du tew’nring gai be ra lunei lei,

⁴I benai a zatme je â tew’ngga gai ra, tewchat ne ra, zai deî’ngga’nzâuchiak kai ’nde ra anui je â zua gai ’ndi daseu, anui ’mpuimi ramme benai ’mpeumi ramme je kebangchangrabe hangge runne zua gai nung laîzai â, I a kuâneu mak ze bam de leu gu de lei; anui kahereube liebe ze â heguang dage gekumdibe teikedarabe mak daseu,” ze kacheu de lei.

⁵Chidadege â heguang Ahasu-erabe ne heguangpui Estharle je, “Aipau tâ tew ra ’nningpatpeu ze châu lau, zai ’ndaige pa la lau?” kacheu de lei.

⁶Zai Estharle ne, “Anui teureipeu zai anui je tewsâpeu ze â aipaupeu, Hamanbe pe lungriaksiapeu de lei!” acheu bei de lei. Chidadege â heguang benai heguangpui masuage Hamanbe hing-desang di de lei.

⁷Zai heguang â pe lumpum ne luube-bâm gene chu lu heguangki merie ’mbe gut ti de lei; kane Hamanbe â pe peireige kesiabe wangchangrabe heguang ne kaikua la de lei be pa chî lu dege heguangpui Estharle dagene pa keringbe hangge kiâm ra hang bam gai dai di de lei.

⁸Zai Estharle bambe jeî ge Hamanbe kâukeugaibe luage, heguang ki merie ’mbene penai wain sakbe bâm ’mbe heguang helatwang kadai de lei; dadege heguang ne, “A kilûng singbe gene a masua gene heguangpui je du pa tew’nsia ra de mei?” kacheu de lei. Heguang mui gene aipau sam ramme zuapattibe luage penui ne Hamanbe ju dum ’ndi de lei.

⁹Chidadege heguang guâ ka’ngguame kahetiâme ruage hangkat, Harbonabe ne sa ze, “Aipau peireige du, heguang je pe sam ziegene tew’nringgaibeipeu Mordekaibe hangge Hamanbe ne kakchatrabe kaira hangge pehut sâu rengeu tei’nsapchugailube ze Hamanbe ki ge lamui lei,” kacheu de lei.

¹⁰Zai heguang ne rang gai ze, “Chige pechu kakchat kai be lau,” acheu bei de lei. Dadege Mordekaibe hangge kakchatbe-kaira Hamanbe ne tewgaibe ge penui ne Hamanbe je kakchat kai bei de lei. Chidadege â heguang pe lumpumbe ze hegeikeu di de lei.