Read Zeme Naga ESTHAR 8 Bible Online

ESTHAR 8 - Zeme Naga bible

ESTHAR 8

¹Chipau mai ge Heguang Ahasu-erabe ne Judame teureipeu Hamanbe ki ze heguangpui Estharle hangge pei gai bei de lei. Zai heguang suage Mordekaibe wang de lei, pa ze Estharle ne pechu châu tewrabe kau mei be ranglia gai ’ndi daseu;

²zai heguang ne pe gu ka’nchetbe baroine Hamanbe dagene pa ne ludai’ndibe ze lupat lu, Mordekaibe je pei gai bei de lei. Zai Hamanbe ki peireige besuitew ra Mordekaibe je Estharle ne pei gai bei de lei.

³Chidadege heguang je Estharle ’mpau kadai de lei; pe pî kangge Estharle kâukeu gai lu ze Agak’mpeu Hamanbe ne kesia ’nranggai’ndibe benai Judame je tew’nsia ra pa ne chiampatkai’ndibe ze tei’mbia gai ra hangge hap ze pechu kiam de lei.

⁴Dadege heguang ne Estharle je heguang gu gechâk tui getuapat kai de lei,

⁵zai Estharle zuachu ze heguang suage sap kai lei. Zai pa ne, “Heguang ne pe suîhezuâ zai â, zai pa ne achu ngau’nggia zai â, zai chize heguang ne ka’nzeibe hangge chak kai zai â, zai pe mikngau ge I ne pe lungsui tewka’mmibe chang zai â, heguang gu heram poine leine ge Judame bamme je tew’ngga ’nde ra Hammedathabe na, Agak’mpeu Hamanbe ne chiampat lu pa ne rawgaibe leisikuak samkela ramme ze tewkeli ’nde ra hangge hingde sam peize raw gai be lau.

⁶A zatme peireige tewkahereube wangchangrabe ze ’ndaigum ze I ne ngualiechi le ra lau? Makchai, a kiduîme je tewka’nggabe ’ndaigum ze I ngualiechi le ra lau?” ze kacheu de lei.

⁷Chidadege heguang Ahasu-erabe ne heguangpui Estharle benai Juda’mpeu Mordekaibe je rang gai ze, “Pie le lau, Hamanbe ki ze Estharle hangge I ne pei gai ’nda, zai pa ne Judame peireige tew’nsia ra tewbe ziegene penui ne pechu kakchatbe-kaira ge kakchat kai ’nde lei.

⁸Zai Judame deu ge nang ne nei-neibe luigum ze heguang ji gene zai heguang gu baroine chige tau gai lu ze nang raw le dui lei; heguang ji gene samde rawgai’ndibe benai heguang gu baroine chige taugai’ndibe ze â tewkelidaichi lak daseu,” ze kacheu de lei.

⁹Chipau hî ge, pakechumbe kêu, Siban kêu ge, hezie ’ngkai ze kechum mai ge heguang gu rawsuime je kûwang’ndui gai de lei; zai Judame deu ge Mordekaibe ne samdiegaibe leine luigum ze rezieteime benai laksaibe ramme, zai Indiaram gene Ethiopiaram chang ze heram ramme haî kat ze ’ngkai ze sena gu heguangsinme dage, heram ’nsangne ge penui gu leisigiak luî gene benai hezat leine dage penui lad-lad gene, zai Judame dage du, penui gu leisikuak rawbe giak benai penui lad gene raw gai de lei.

¹⁰Heguang Ahasu-erabe ji gene chize raw gai lu, heguang gu baroine ne tau gai de lei, zai samkela leisikuak ramme ze, heguang gu hekun ramme ki gene ’ngkutchube ze heguang guâ ka’ngguabe ge teibe hekun ka’nzetbe ramme chingchuame sam teikahelakme dage lang gai de lei.

¹¹Aipau sam kela langgaibe leisikuak ramme gezene namdi leine ge Judame bamme leine ne wangherua lu ze penui keringbe hangge ’nggidangchi le ra, penui ne heramzat gu hereikangme ne mei, nune heramme mei ze ’nggi lêuzai penui je tew’nggachi le ra, tewchat le ra penui je ka’nggime zat gu hereikangme je zai penui name benai ’mpuimi ramme je tew’ngga le ra, zai penui gu merua ramme sut le ra heguang ne lun de lei.

¹²Mai kat gene heguang Ahasu-erabe gu heram ramme leine ge hekêu kereu ze kena kêu, chi Kena kêu gu hezie kereu ze kechum mai gene seuze putchu de ra tew gai bei de lei.

¹³Chipau sam rawgai’ndibe leisikuak ze heram ’nsangne ge hingde gum lang gai ze ziemmena leine dage rangba gai de lei, zai chipau mai ge Judame je du penui teureime peireige penui kûmtew le ra kedâ ra rang gai de lei.

¹⁴Chipau luigum ze heguang ne samdie gai bei ze heguang guâ ka’ngguabe ge penui teibe hekun ka’nzetbe ching ramme ge chua lu ze, sam teikahelakme kelua ze tat ti de lei; zai chipau hingde ze Susa hekuînâm ge peipat kai de lei.

¹⁵Chidadege Susa namdi ze hesuiyi ze ’nrung ze bambe luage heguang bambe bâm gene heguang puâ ramme ka’nzaibe benai kehâbe ramme kai lu, gechâk peichûp pengêudibe kai lu, banutpaî yibe tologie ne tap kai lu ze Mordekaibe zuapat ti de lei.

¹⁶Judame dage kebabe benai hesuiyibe zai helung suiyika’ntabe benai pengêudibe bam di de lei.

¹⁷Zai heram ’nsangne ge benai namdi ’nsangne ge heguang gu samde benai pe gu hingde wangchangdibe bâm leine ge, Judame ruage hesuiyibe benai hesuiyika’ntabe bam zai hengî ze reibam de lei. Zai heguangram ge pezat gechâmbe ramme ne du penui runne penui je Judame hangge tew gai de lei, penui dage Judame je hingbe wangchang di dadegeu.