Read Zeme Naga ESTHAR 9 Bible Online

ESTHAR 9 - Zeme Naga bible

ESTHAR 9

¹Chunage pakereu-ze-kenabe kêu, Kena kêu gu hezie kereu ze kechum mai ge heguang ne diegaibe benai pe gu hingde luigum ze tewchuderabe luage, Judame teureime ne penui peireige rezietei ze bamrabe mai hangge kaheguîbe mai gîmsing ge, kane Judame ne penui teureime peireige rezietei ze bamrabe mai hangge tewkedetkaidai’ndibe mai ge,

²Heguang Ahasu-erabe gu heguangram leine ge penui je tew’nsia ra, penui peireige penui bahuâ kai ra penui gu namdi ramme ge Judame wang ka’ndui de lei. Zai mî du penui je tingkangchi lak ti de lei, hezat ramme leine peireige penui je kehingbe wangchang di daseu.

³Zai heram ramme gu heguangsinme, rezieteime, laksaibe ramme, zai heguang gu tâmuiteime ne du Judame je ka’ngngâ de lei, Mordekaibe je kehingbe ze penui peireige wangchang di daseu.

⁴Mordekaibe â heguangki ge reziechibe kau, zai heram ramme leine ge pe ji ditat ti dadegeu; Mordekaibe â pe gu reziechibi-bi di de lei.

⁵Chigum ze Judame ne penui teureime leine je hiazutkie ne bi ze, penui je bichat zai tew’ngga ze, penui je ngaugailakme leine je penui ne tewnei-neibe chiâmtak tew gai de lei.

⁶Susa hekuînâm sing ge du Judame ne ziemmena haî mengeu je bi ze tew’ngga ’ndi de lei,

⁷zai Parshan-dathabe, Dalphonbe, Aspathabe,

⁸zai Porathabe, Adaliabe, Aridethabe,

⁹zai Parmashtabe, Arisaibe, Aridaibe zai Baizathabe,

¹⁰Judame teureipeu, Hammedathabe na Hamanbe na ’mpeumi hang kereume bau je du bichat ’ndi de lei, kane gechim’nsia’ndibe merua ze penui lu mak te lei.

¹¹Chipau mai gîmsing ge Susa hekuînâm ge gîchatkai’ndibe riak ze heguang dage chiliâ gai de lei.

¹²Zai heguang ne heguangpui Estharle je, “Susa hekuînâm ge ’mpeumi haî mengeu benai Hamanbe na ’mpeumi hangkereu je Judame ne gî ’nde lei. Heguang gu heram ramme ge penui ne ’ndaizeuge tew gai ’nde ra nung se lau! Chunage ’ndaikau nang lunei lau? Chize ning hang ge pei gai bu lei. Zai ’ndaikau nang kiesî gai dai nei rei lau? Chize tewpui gai bu lei,” kacheu de lei.

¹³Estharle ne kak ze, “Heguang ne pe suî hezuâ zai â, nemai gu hingde tewgaibe luigum ze ’nchuamai ge du Judame Susa ge bamme ne peize tew gai dai lau, zai ziemmena je kakchatbe-kaira ramme ge Hamanbe name ’mpeumi hangkereu pum ramme peize keî’nchie gai be lau,” kacheu de lei.

¹⁴Dadege aipau ze tew gai ra heguang ne samdie gai bei de lei; Susa ge hingde ze peipat kai de lei, zai Hamanbe name ’mpeumi hangkereu pum ze keî’nchie gai bei de lei.

¹⁵Kena kêu hezie kereu ze medai mai ge du Susa ge lungme Judame wang’ndui dai lu ze penui ne ziemmena haî chum je Susa ge tewchat kai kadai de lei; kane hereichâ â mâ de penui lu mak lei.

¹⁶Heguang gu heram kêdabe ramme ge lungme Judame ne du chunage penui keringbe hangge herei tingkang ra wangka’ndui de lei, zai penui teureime dagene penui je tew’ncha gai ’ndi de lei, zai penui je ngaugailakme ziemmena chang riaksena ze mengeu je gîchat ’ndi de lei, kane hereichâ â mâ de penui lu mak te lei.

¹⁷Aize Kena kêu hezie kereu ze kechum mai ne de lei, zai hezie kereu ze medai mai ge penui sau di de lei, zai chipau mai ze â hesuiyibe-ngi mai hangge tew gai de lei.

¹⁸Kane Susa ge lungme Judame â hezie kereu ze kechum benai kereu ze medai mai ge ’ngngi ra wangka’ndui de lei, zai hezie kereu ze mengeu mai ge sau’ntak kai ze, zai chipau mai ge hesuiyibe-ngi mai hangge tew gai de lei.

¹⁹Chipauziegene keloa ramme ge, hela ge bambe namdi ramme ge Judame bamme ne Kena kêu gu hezie kereu ze medai mai ge hesuiyibe benai kahengîbe mai zai ka’ntatewbe mai, zai penui kela yibe ramme penui karai ge hezakteube mai hangge tei gai di de lei.

²⁰Zai Mordekaibe ne airamme raw’ndui lu ze, heguang Ahasu-erabe gu heram ramme kenahia ge benai kedeu ’mbe bambe heram leine ge lungme Judame leine dage samkela lang gai de lei,

²¹penui ’nteumena je teihelua gai ze penui ’nteumena ne Kena kêu gu hezie kereu ze medai mai ge benai hezie kereu ze mengeu mai ge du patingkum ’nsangne,

²²penui teureime dagene Judame lungkatemibe ngaube mai zai chipau kêu geze â mi lung kahereube gene hesuiyibe zai kadesuibe gene lungka’ntabe mai chang ra tewkedetkaibe mai hangge tei ra: zai penui hangge kahengîbe benai hesuiyibe mai chang ze mâ-keyibe ramme kat kat dage hezakteu ze kelaksiame dage kelapeibe mai chang ze reibam kam ra sam rang gai bei de lei.

²³Chigum ze penui ne reibamchugai’ndibe luigum ze, zai Mordekaibe ne penui dage rawgaibe luigum ze tew ra Judame ne tew’ntip kai de lei.

²⁴Judame leine teureipeu, Hammedathabe na Agak’mpeu Hamanbe ne Judame peireige penui je tew’ngga gai ne ra chiampat kai ze, Pur tuâ ze, chize penui je chaîchim ze tew’ngga gai ’nde ra hedachak te lei;

²⁵kane heguang suage Estharle wang sap kai dadege, heguang ne rawgaibe gene hingde pei gai ze Judame peireige pa ne penui je tew’ngga ’nde ra chiamgaibe ze pe peireige wangchang gai ra, zai pa benai pe name ’mpeumi ramme je kakchatbe-kaira ramme ge keî’nchie gai ra die gai bei de lei.

²⁶Chipauziegene aipau tingnaimikpui ramme je Pur kacheube rimba chai sui ze, penui ne Purim kacheu de lei. Zai aipau samkela ge rawgai’ndibe leine ziegene, zai aipau deu ge penui tat-hedau, zai penui peireige mâ-wangchangbe ziegene,

²⁷Judame leine penui runne penui peireige benai penui chaname reheime peireige zai penui dage heruagai’ndime leine peireige hingde tew’ntip kai ze, chidezai aipau tingnaimikpui kena ze rawgai’ndibe luigum ze kum’nsangne panehî diegaibe hî tit ge tewpai mak ze reibam himchang ra,

²⁸zai aipau naimikpui kena ze ’ngngaî mak reibam himchang ra, zai rehei leine ge, kelak leine ge, heram leine ge zai namdi leine ge, rei ze tei bam ra, zai Judame ruage aipau Purim gu naimikpui kena ze betâugadibe hangge mâtew-tewsede tuâpat mak ra, zai penui chaname rehei ramme ge du aipau naimikpui ramme tenit hî ze reibam sau mak ze bam himchangrabe hangge tew’ntip kai de lei.

²⁹Chidadege, Abihailbe na ’mpuimi, heguangpui Estharle benai Juda’mpeu Mordekaibe ne Purim deu ge aipau pakenabe samkela ze tew’ntip kai ze rawgailube rezie pei’nsangsiak kai de lei.

³⁰Judame leine dage, Ahasu-erabe kaheguangberam haî kat ze ’ngkai ze sena ge, lungzeunetewbe sam ramme gene benai samsang gene samkela ramme raw gai de lei,

³¹chidadege aipau Purim naimikpui ramme ze panehî tit ge, Juda’mpeu Mordekaibe benai heguangpui Estharle ne Judame peireige tâtewheruachi le ra kaibe luigum ze, zai penui runne penui peireige benai penui chaname rehei ramme peireige penui gu teseureibe ramme benai kadesuibe deu ge hingde kailube luigum ze reibamchi le ra hangge zeu.

³²Heguangpui Estharle gu samde gene aipau Purim gu besie hingde ramme ze riakeu gai de lei, zai chize leisikuak ge raw’ndui gai de lei.