Read Zeme Naga EKSODAS 1 Bible Online

EKSODAS 1 - Zeme Naga bible

EKSODAS 1

¹Airamme ze Israel name Jakobbe benai Ijipram ge pe kiduîme je ngua lu wanggaime bau ji de lei:

²Reubenbe, Simeonbe, Lebibe zai Judabe,

³Issakarbe, Zebulunbe, zai Benjaminbe,

⁴Danbe benai Naphtalibe, Gadbe zai Asherbe ze de lei.

⁵Jakobbe chaname pelane hangriaksena lei; Josepbe â Ijipram ge bam’ntua di de lei.

⁶Chipau châng dege Josepbe â chai di, zai pe sikiname leine du zai chipau rehei ge piakeume leine du chai kam di de lei.

⁷Kane Israelme chaname â heluîhing zai misongga ze pung-ze-sa ze bam de lei; penui ziemmena riak pungbi-bi ze penui ranchi-desang ze bam di de lei; chidadege chipau heram ze penui ne lungpui ’ndi de lei.

⁸Zai Ijipram ge Josepbe je chimakbe, heguang karchibe pat te lei.

⁹Zai pa ne pe gu ziemmena je, “Pie le lau, Israelme bau â anui hang â kie’nteu di, zai penui ranchi’nteu di de lei.

¹⁰Kei lei, penui peireige mi jaîguitew gai be kei lei, makchai â penui â ziemmena kiebi-bi gu, zai anui ram ge hereipat tizai â, anui teureime lam lia lu anui je ’nggi dizai â heram gene pak kam du daseu,” ze kacheu de lei.

¹¹Chidadege penui (Israelme) peireige tâtewme je kereîme hang penui (Ijipme) ne kai lu ze heput keritbe ne penui je deîhereu-desang gai ra tew gai de lei; (Israelme) Pharaobe gu merua ramme kairabe hangge Pithom benai Ra-amse namdi tew gai bei de lei.

¹²Kane penui je tewsâbi-bi, penui riak pung ’ngkiebi-bi ze chi heram ze lung puiting ’ndi de lei.

¹³Chidadege Israelme je deîhereu’nteu ze tâtew ra penui ne tew gai bei de lei.

¹⁴Tâtewbe bâm ramme ge gepa, hegam zai tâ leine tew ra pei gai bei ze ’nchi-chine penui ne hereu ze ka’nggua de lei.

¹⁵Dadege Ijipram heguangpeu ne, Hebraime ruage hena-puaka’nname, hangkat ji ze Shiphrale zai kêdapui ji ze Puale, penai je acheu ze salia lei,

¹⁶“Hebrai’mpui ramme je penui na ningnai ne puaka’nnabe luage penui henalungbe bâm ge ’mpeumi napoine dizai â pechu ningnai tewchat ra lei; kane ’mpuimi napoine dizai â peize ring ra lei,” ze acheu zeu.

¹⁷Kane chi hena puaka’nname â Hera je hing lei, zai Ijipram heguang ne samdiegaidiakbe luigum ze penai â tew mak tai de lei, kane ’ngngiêne ’mpeumi ramme je ring ra pei gai bei de lei.

¹⁸Dadege Ijipram heguangpeu ne hena puaka’nname je kû gai lu, penai je, “’Ndaitew ze aize ningnai tew gai lau, zai ’ngngiêne ’mpeumi ramme je ring ra ningnai lun bei lau?” kacheu de lei.

¹⁹Zai hena puaka’nname ne Pharaobe je, “Hebrai ’mpuimi ramme â Ijipram ’mpuimi ramme gum mak lei; penui pum ranchi dadege, hena kateleume wangrabe suagene penui na lungkeu-di-dibe ziegene lei,” kacheu de lei.

²⁰Chigum ze Hera ne chi hena puaka’nname peireige pe suiyi ze tinggeu gai bei de lei; zai Israelme ziemmena riak ze pungbi-bi ze penui ranchi-desang ze bam de lei.

²¹Zai chi hena puaka’nname Hera je hingbe ziegene Hera ne penai kelak bei gai bei de lei.

²²Zai Pharaobe ne pe ramname je samdie gai ze, “Hebraime ki ge ’ngngiêne ’mpeumi lungkeube leine je Nail geuki ge ningnui tuâ gai ra de lei, kane ’mpuimi leine je â peize ring lau” ze kacheu de lei.