Read Zeme Naga EKSODAS 11 Bible Online

EKSODAS 11 - Zeme Naga bible

EKSODAS 11

¹Tingwang ne Mosabe je, “Pharaobe peireige benai Ijipram peireige tewkahereube kat I teiwang gai dai gu rei lei; chipau châng dezai â chigene seu ze ningnui je tat ra pa ne pei gu de lei; ningnui je tat ra pei dezai â pa ne ningnui je keliduak ’ndu de lei.

²Israelme baudime seu ra salia gai zu lau, chidezai ’mpeumi leine ne pe kining’mpeu dage zai ’mpuimi leine ne pe kining’mpui dage gepût benai gechâk kerua ramme kie le ra hangge zeu,” kacheu de lei.

³Zai Ijipme mikngau ge Israelme je ’nchârabe Tingwang ne pei gai bei de lei. Chipau peireige du Mosabe â Ijipram kedei zai Pharaobe guâ ka’ngguame mikngau ge benai ziemmena mikngau ge ziemmena pengêudi-kadesangbe kau chang ze bam de lei.

⁴Zai Mosabe ne sa ze, “Tingwang ne acheu ze rang lei: muisum gumbe hî ge Ijipram zuilung ge I tatpat ku lei;

⁵zai Ijipram dei lungge meraibe na leine chai gu lei, aipau heguang-bamrak ge ka’ntaupeu Pharaobe na meraibe gene chu ze pe gu kebang chêuniakbepui na meraibe riâ chang ze chai gu lei; zai kaurui nakeuraibe leine du chai gu lei.

⁶Zai mâdau de wangchang gai mak, zai mâdau de wangchangdaimakrabe gumbe Ijipram kedei leine ge hap’nrung-kadesangbe bam gu lei.

⁷Kane Israelme kacheube kau peireige â ziemmena mei nune hekaune mei ze du, zai hetei ’nsangdu bekuâ ’nra ra mak lei; chidezai Ijipme benai Israelme kakge gechâmbe ze Tingwang ne tew gai lei be ningnui chî le ra hangge zeu.

⁸Zai aime ning guâ ka’ngguame leine a dage wangkeu ze a suage kei’ngkumkeu ze, achu, ‘Nang benai ning chaisuime leine zuapat te zu lau,’ ze acheu gu lei. Zai chipau châng dezai I zuapat tu de lei,” ze kacheu de lei. Zai pe lumpumsie ze Pharaobe dagene pa zuapat ti de lei.

⁹Chidadege Tingwang ne Mosabe je, “A gu tâningdaulakbe ramme Ijipram dei ge tewpunggairabe hanggene, Pharaobe â ningnui kuâ ’ngking ra mak lei,” kacheu de lei.

¹⁰Aipau ningdaulakbe ramme leine Mosabe benai Aaronbe ne Pharaobe suage tewliâ gai de lei; zai Tingwang ne Pharaobe lung tew’nchi gai bei de lei, zai pa ne Israelme je pe ram gene hela zuapat ra pei mak tai lei.