Read Zeme Naga EKSODAS 17 Bible Online

EKSODAS 17 - Zeme Naga bible

EKSODAS 17

¹Tingwang ne samdiegaibe luigum ze Sin gu Hênamchangberam gene Israelme bau leine tat’nduâ gesinbi-bi ze tat te lei, zai Rephidim ge tejeîbâm tew gai de lei; kane ziemmena sak ra hangge chige hedui ga lei.

²Chipauziegene baudime ne Mosabe je maube hang chak kai lu ze, “Hedui sak ra anui je pei lau,” kacheu de lei. Zai Mosabe ne penui je, “’Ndaitew ze ningnui a mâu peu lau? ’Ndaitew ze Tingwang je kedak ra ningnui tew gai lau?” kacheu de lei.

³Kane baudime ne hedui herei di de lei, zai baudime ne Mosabe je geikum ze, “Kahereibe gene anui benai anui name zai anui gu kaurui ramme tewchat kai ra anui je Ijipram gene nang nguapat kai mei?” kacheu de lei.

⁴Chidadege Tingwang dage Mosabe kû’nrung gai ze, “Aime je ’ndaikau I tew gai ra lau? Penui ne achu tingchu ne tuâ gai tena la de lei,” kacheu de lei.

⁵Zai Tingwang ne Mosabe je, “Israelme ruage gechîngme hanggesame je ngua lu ze baudime suage tatraîpat zu lau; zai Nail geuki ze nang ne lakkaibe tui ze ning ba ge tei lu ze tatchu lau.

⁶Pie le lau, Horeb ge tingchutum peireige ning suage I sap ku lei; zai tingchutum ze nang lak kai ra de lei, dezai chigene hedui pat ku lei, chidezai ziemmena sak le ra hangge zeu,” kacheu de lei. Zai Israelme gu gechîngme mikngau gene chipau luigum ze Mosabe ne tew gai de lei.

⁷Zai pa ne chipau bâm ji hangge Massah benai Meriba ze ’ntak kai de lei, Israel name ne chau’ngkuigaibe ziegeneu, zai penui ne, “Anui dage Tingwang la mei ga lau?” ze acheu sa ze Tingwang je kedakbeibe ziegeneu.

⁸Chidadege Amalekme wang ze Israelme je Rephidim ge kaherei de lei.

⁹Zai Mosabe ne Joshuabe je, “Anui hangge ziemmena ramme kelâng lu ze, zai zuapat ze Amalekme je ’nggi zu lau; ’nchuamai ge â a ba ge Hera gu hetui tei lu peloa’ntûm peireige I sap ku lei” kacheu de lei.

¹⁰Chigum ze Mosabe ne Joshuabe je ranggaibeibe chai sui ze pa Amalekme je ka’nggi de lei; zai Mosabe, Aaronbe, zai Hurbe â kedei loa’ntûm peirei ’mbe hang di de lei.

¹¹Mosabe ne pe ba getuachu ze bam tâne Israelme duî bam lei; zai pe ba wangkeu’nna bei tâne Amalekme ne duî bam lei.

¹²Kane Mosabe baran gakeu di de lei; chidadege penui ne tingchukâng tei lu pe kangge kai de lei, zai chipau peireige pa ka’ntau de lei, zai Aaronbe benai Hurbe ne Mosabe ba katlam ’mbia hangkat, zai kêda ’mbia hangkat ze teigetuagaihâ de lei; chigum ze naimik kêu mak tâne pe baranchi ze bam bam de lei.

¹³Zai Joshuabe ne Amalekbe benai pe gu ziemmename je hiazutkie ne bichat kam ’ndi de lei.

¹⁴Chidadege Tingwang ne Mosabe dage rang gai ze, “Aize chibamrabe hang leisikuak ge raw gai le lau, zai Joshuabe seu ra chize kiâliâ gai be lau, ting kehube kang gene Amalekme ji chîbe ze I ne nuitua’nzâuchiak ’ndu de lei be zeu,” kacheu de lei.

¹⁵Zai Mosabe ne herâtewbe-kaira tew gai lu chipau ji ze, Tingwang â a gu hepiepaî lei, acheu ze ’ntak kai de lei,

¹⁶“Tingwang gu hepiepaî getuachu’ngngu lau! Tingwang ne Amalekme je rehei ’nsangne ’nggi ze bam gu lei,” ze acheu sa gai zeu.