Read Zeme Naga EKSODAS 18 Bible Online

EKSODAS 18 - Zeme Naga bible

EKSODAS 18

¹Mosabe benai pe gu ziemmename Israelme hangge Hera ne ’ndaikau tâ tew gai mei be leine, zai Ijipram gene Israelme je Tingwang ne ’ndaigum ze nguapat kai bei mei be ze Mosabe nâu peu, Midianme gu tingkupeu, Jethrobe ze seu di de lei.

²Chunage Mosabe ne pe nâu Zipporale je langtuagai’ndibe chângge pe nâu peu Jethrobe ne pechu (Zipporale je) ngua ’ndi de lei,

³zai pe na ’mpeumi hangna je du nguabam de lei, penai ruage hangkat ji â Gershombe de lei, (pa ne sa ze, “I â hesangkedeume ram ge lunggailêupeu chang ze bam de lei,” kacheu daseu),

⁴zai kêdapeu ji â Eliezerbe de lei, (pa ne sa ze, “A peu Rapeu ne achu ’ngnga bei de lei, Pharaobe gu hiazutkie gene achu lupat kai bei de lei,” kacheu daseu).

⁵Zai Mosabe nâu peu, Jethrobe ne, Mosabe na ’mpeumi hangna zai Mosabe nâu je ngua lu, hênamchangbe heram ge Hera gu deiloa’ntûm ge tejeîbâm tew lu ze bam bam de lei.

⁶Zai hangkat ne Mosabe je, “Ni, ning pau Jethrobe ning nâu benai ning na hangna je ngua lu ze ning tailam wang mui de lei,” ze pau gai bei dege,

⁷pe pau je hedau ra Mosabe zuapat ti de lei, zai hengêutewbe pei gai lu, pechu kakeput te lei; zai penai kat-kat rasam ’mmêt kai lu, paîki lung ’mbe gut ti de lei.

⁸Chidadege Tingwang ne Israelme hanggene Pharaobe benai Ijip peireige ’ndaikau tew gai mei be leine, tebeî’mpuî ge penui peireige kahereube wangbe ramme leine, zai Tingwang ne ’ndaigum ze penui je lupat kai mei be rasam ze Mosabe ne pe pau je salia de lei.

⁹Zai Tingwang ne penui je Ijipme ba gene lupatkaibeibe ziegene Israelme dage Tingwang ne mâ-keyibe tewgaibeibe peireige Jethrobe pe suiyi-kadesang de lei.

¹⁰Zai Jethrobe ne, “Ijipme ba gene benai Pharaobe ba gene ningnui je ’nripatkaipeu Tingwang je peize toa lau.

¹¹Tingwang â hera ramme leine suadu dika’ngkeu lei be chuna I chî de lei, Ijipme ba kangge bam ze penui ne Israelme je tewheureu ze bambe luage pa ne baudime je lupat kai bei daseu,” ze kacheu de lei.

¹²Zai Mosabe nâu peu Jethrobe ne Hera dage rûkambe-râtewbe benai kaurui peipat kai de lei; zai Hera masua gene Mosabe nâu peu je tingku nguateu ra hangge Israelme ruage gechîngme leine je ngua lu ze Aaronbe wang de lei.

¹³Bechaibe mai ge baudime hangge samram ze tâtew gai ra hangge Mosabe ’ntau ze bam de lei, zai hechua gene hegî chang ze baudime ne Mosabe je sapguagit ze bam de lei.

¹⁴Baudime hangge pa ne tâtew ze bambe leine Mosabe pau ngau lu dege, pa ne, “Baudime hangge nang aigum ze tâtewbe tak ze ’ndaikau lau? ’Ndaitew ze ning runne ’ntau lu ze, zai baudime leine â hechua gene hegî riâ chang ze ningchu sapguagit ze bam lau,” kacheu de lei.

¹⁵Zai Mosabe ne pe pau je, “Hera-’nneu ra baudime ne a dage wangbe ziegene de lei;

¹⁶penui ruage getube bam ze a dage penui wang dezai mige hangkatpeu benai pe kining’mpeu kakge I ne samram ze, zai Hera gu hingde-sie ze penai je geteilia zai pa ne ’ndaitew lei kacheu mei be salia ka’nsui de lei,” acheu bei de lei.

¹⁷Mosabe pau ne pechu, “Nang tewbe tak ze yi me de lei.

¹⁸Nang benai ning dage baudime bamme kenuihuak kai gu de lei, chipau tâ ze â ning hangge rit’nteu’ndibe ziegeneu; aipau tâ ze ning runne â tewchi lak lei.

¹⁹Chunage a kuâ ze ’ngking le lau; I ne ningchu geteilia gai gu lei, dezai Hera ning dage peize bam lau! Baudime kelei ge nang ne Hera suage sap ra de lei, zai penui tedeu ze Hera dage teiwang gai ra de lei;

²⁰dezai nang ne penui je hingde-sie benai samramgai’ndibe sam ramme ze geteilia ra de lei; zai penui tatsingrabe ’mpuî benai penui tewhimchangrabe tâ ze ranglia gai ra de lei.

²¹Chipau peireige du baudime leine ruagene tewlebuibe kau ramme je kelâng le lau, Hera je hingbe kau, ’nnumtewduibe kau, henimluteube tak je ngaugailakbe kau aigumbe kau ramme jeu; zai chigumbe kau ziemmena je changme ruage, haîme ruage, rengeume ruage, kereume ruage, samramme hangge kai be lau.

²²Zai penui ne peize pehî leine ge baudime hangge samram ze bam lau; pedeu chukbe leine ze â ning dage penui teiwang ra lei, kane pedeu kahelabe ramme â penui karai ne samram le duî lei; chidezai ning hangge tâtewsêu bi gu, zai penui ne ning put punggaihâ bu lei.

²³Aipau ze nang tew zai Hera ne du ningchu samdie gai bei zai â nang ning ranchi ze bam gu lei, zai aime bau ze du penui lungwângchang ze penui bâm bâm ’mbe yi ze tat dai du de lei,” kacheu de lei.

²⁴Chigum ze Mosabe pe pau kuâ ’ngking ze pa ne sagaibeibe leine tew de lei.

²⁵Mosabe ne Israelme leine ruagene tewlebuibe kau ramme kelâng lu, baudime peireige besuitewme, changme gu samramme, haîme gu samramme, zai kereume gu samramme hangge penui je tew gai bei de lei.

²⁶Zai pehî leine ge penui ne baudime je samram ze bam de lei; hetû chukbe â Mosabe dage penui teiwang gai da, kane pedeu kahelabe ramme â penui karai gene samram di de lei.

²⁷Chidadege Mosabe ne pe pau je tat dai ra nguateleuzun gai bei de lei, dadege pe gu ’mpuî ra ’mbe tat ti de lei.