Read Zeme Naga EKSODAS 19 Bible Online

EKSODAS 19 - Zeme Naga bible

EKSODAS 19

¹Ijipram gene Israelme zuapatbe chângge hekêu tenang ngaube pakechumbe mai ge Sinai hênamchangbe heram ge penui wangchang de lei.

²Zai Rephidim gene zuapat ze Sinai hênamchangbe heram ge chang dege, hênamkang ge penui tejeîbâm tew gai de lei; zai chige peloa’ntûm hube suage tejeîbâm penui tew gai ze bam de lei.

³Zai Hera dage Mosabe hang di de lei, zai kedeiloa gene Hera ne Mosabe je ku ze, “Aigum ze Jakob ki je salia ze, zai Israelme bau je ranglia ra lei:

⁴Ijipme je I ne ’ndaikau tew gai bei mei be, zai ’ndaigum ze I ne keliengdi kan gene ningnui je a lam nguawang gai bei mei be ze ningnui ngau lu de lei.

⁵Chunage chidaze, ningnui ne a kuâ pheu ze a gu samhatkaibe tei dizai â ziemmena zat leine ruage ningnui â a gume chang gu lei; kedeirei leine ze a gu lei,

⁶zai ningnui ne a hangge tingkume gu heguangram benai ka’nchibe heram zat chang ze bam gu lei. Israel name je nang saliarabe ze airamme ze de lei,” kacheu de lei.

⁷Chipau luigum ze Mosabe ne wang ze baudime gu gechîngme je ku lu, zai Tingwang ne pechu deigaibe aipau sam ramme leine penui suage kai bei de lei.

⁸Zai haimena ne bau kat ze kak ze, “Tingwang ne sagaibe leine anui tew gu lei,” kacheu de lei. Zai Mosabe ne baudime sam ramme ze Tingwang dage paulia gai de lei.

⁹Tingwang ne Mosabe je, “Ni, kemâukang seudeibe gene ning dage I wang gu lei, chidezai ningchu I ka’mpaube luage baudime seu le ra zai ningchu du betingbeta penui ’nnum’mmi le ra hangge zeu,” kacheu de lei. Chidadege baudime sam ramme ze Mosabe ne Tingwang dage salia gai bei de lei.

¹⁰Zai Tingwang ne Mosabe je, “Baudime dage tat ze nemai benai ’nchuamai ge penui je tew’nchi gai be lau, zai penui paîni ramme ze penui je peize geta le lau,

¹¹zai pakechumbe mai ge â peize kedâkua zu lau; pakechumbe mai ge â baudime leine ngaube gene Sinai Loa ge Tingwang wangkeu gu daseu.

¹²Zai ziemmena hangge nang kerie riegua gai ze, ‘Kedeiloa ’ntûm ’mbe ningnui hang mak ra zai chipau pa’nrai du deîtau mak ra ’ntîng le lau; mi-mige de chipau Deiloa ze deîtaube kau je â tewchat ne ra lei;

¹³pechu â heba deîtau mak ra kane tingchu ne tuâ ra lei, makchai kakchat ra lei; hekaune mei zai ziemmena mei zainedu pa â ring mak ra lei,’ ze rang gai ra lei. Hegeîluîkie ’mmut’ntielau gai dezai kedeiloa ’mbe penui wang ra lei,” ze kacheu de lei.

¹⁴Chipau luigum ze kedeiloa ’mbene baudime tailam Mosabe wangkeu de lei, zai baudime je tew’nchi gai de lei; zai penui ne penui paîni ramme kageta de lei.

¹⁵Zai pa ne baudime je, “Pakechumbe mai dezai â kedâ le lau, ’mpuimi taige ’nna se lau,” kacheu de lei.

¹⁶Pakechumbe mai hechua dege â kedei loa’ntûm peireige tingcheibe ramme benai tingkakepitbe zai kemâukang seudeibe bam di de lei, zai hegeîluîkie ’mmutkaibe kuâ chi-desang ze seu de lei, chipauziegene tejeîbâm ge bamme leine kedun di de lei.

¹⁷Chidadege â Hera je hedau ra hangge Mosabe ne ziemmename je tejeîbâm gene nguapat te lei; zai kedeiloa pî ge penui sap te lei.

¹⁸Zai Sinai loa ze â hemika ne chûmpuigit bam di de lei, hemi gene chipau loa’ntûm ge Tingwang wangkeugaibeibe ziegeneu; zai chipau mika ze â hemihûnki gene patbe mika gum ze hiari chu di de lei, zai chipau deiloa luî gechuîlun ze bam de lei.

¹⁹Zai hegeîluîkie kuâ chibi-bi chu dadege Mosabe ne sam sa de lei, zai tingcheibe gene Hera ne pe kuâ kak te lei.

²⁰Zai Sinai Loa peireige Tingwang wangkeu de lei, kedeiloa’ntûm ge zeu; zai Tingwang ne Mosabe je kedeiloa’ntûm peirei ’mbe hang ra kû gai de lei, zai Mosabe hang di de lei.

²¹Zai Tingwang ne Mosabe je, “Wangkeu ze ’ntîngrabe hangge baudime je rang gai be lau, makchai â Tingwang tailam pechu pie ra hangge hedie’ngkagut ze penui ruage misonggame chai gu daseu.

²²Zai tingkume a dage wangka’nnabe kau ramme je du peize penui runne penui je tew’nchi le lau, penui peireige Tingwang pe râtabe ’mpat kai mak ra hangge zeu,” kacheu de lei.

²³Mosabe ne Tingwang je, “Baudime â Sinai loa ’mbe hangchi lak te lei; nang ne anui je die gai ze, ‘Kedeiloa ze riegua lu, chize diepat’nchi gai lau,’ kacheu daseu,” acheu bei de lei.

²⁴Zai Tingwang ne pechu, “Wangkeu ze Aaronbe je nguahang lau; kane tingkume benai baudime je â Tingwang tailam hangrabe hanggene peize hedie’ngkagut se lau, penui peireige pe rata ’mpat kai mak ra hangge zeu,” ze kacheu de lei.

²⁵Chipau luigum ze Mosabe baudime tailam wangkeu ze penui je salia de lei.