Read Zeme Naga EKSODAS 2 Bible Online

EKSODAS 2 - Zeme Naga bible

EKSODAS 2

¹Chunage Lebibe kiduî’mpeu hangkat ne Lebibe zat kau ’mpuimi hangkat je pe nâu hang lu lu de lei.

²Chi ’mpuimi ze ’ngngiêne ’mpeumi hangkat lungkeu de lei; zai chi ’ngngiêne peluî yi-desang ze bambe pa ngau lu dege, pa ne kêu chum riâ pechu tewtimbai ’ndi de lei.

³Zai ai suadu pechu teitimbai’mmi ra teitimbai chilaktibe ziegene hekupum ne dakbe rak-hau lu lu chize mâ-chamtikbe ne keniak lu, pelung ge chi ’ngngiêne je kai lu hedui peirei hekubang zeu ge chi rak-hau ze kai bei de lei.

⁴Zai kedeu ’mbene chi ’ngngiêne peireige ’ndaikau wangchang leu gu mei be ze pie ra hang Mosabe sipui â senpiekua bam de lei.

⁵Chunage Pharaobe na ’mpuimi ’nggeuki ge heduipia ra wangkeu de lei, zai pe guâ ka’ngguame heleume â ’nggeukung ge tatrua bam de lei; zai pa ne hekubang zeu ge rak-hau bambe ngau lu dege, pe guâ ka’ngguapui je chize lupat ra rang gai bei de lei.

⁶Chi rak-hau pa letpat dege ’ngngiêne pa ngau de lei; zai ni, ’ngngiêne hap bam lei. Chi ’ngngiêne je pa ngau’nggia di ze acheu sa ze; “Aize â Hebrai name ruage mi hangkat te lei,” ze kacheu de lei.

⁷Zai pe sipui ne Pharaobe na ’mpuimi je, “I ne tat ze Hebrai ’mpuimi ruage mi hangkat je ning hangge ngua’nsi ra hangge kû gai ra mei?” ze kacheu de lei.

⁸Zai Pharaobe na ’mpuimi ne pechu, “Tatchu lau,” kacheu de lei. Chigum ze chi ’mpuimi napoine ne tat ze chi ’ngngiêne pui je kû gai bei de lei.

⁹Zai Pharaobe na ’mpuimi ne chi ’mpuimi je, “Ai ’ngngiêne je nguatat lu ze a hangge ’nsichu gai lau, zai I ne ning hi hang pei gu lei,” kacheu de lei. Chigum ze chi ’mpuimi ne chi ’ngngiêne je ngua lu pechu ka’mpâm de lei.

¹⁰Zai ’ngngiêne ze chîngchu dege Pharaobe na ’mpuimi dage pa ne pechu nguawang gai de lei, zai pa ze pe na hang chang di de lei; zai pa ne pe ji hang Mosabe ze ’ntak kai de lei, pa ne sa ze, “Pechu â hedui gene I ne lupatlube kau daseu,” ze kacheube ziegeneu.

¹¹Mosabe chîngchu dege, mai kat â pezatme ruage tat ti ze penui gu heput keritbe pungbe ze pa ngau de lei; zai Ijipram’mpeu ne (pe zat kau) Hebrai’mpeu hangkat je bêube pa ngau de lei.

¹²Zai pa heguarua gai dege, mî je pa ngau mak dege, Ijipram’mpeu je pa ne tewchat kai lu deseî zeu ge pechu rit’mpum gai bei de lei.

¹³Zai bechai mai ge pa hela tatpat dai dege, pie le lau, Hebraime hangna penai karai katimteibe ngaudau de lei; zai pa ne kemaubepeu je, “’Ndaitew ze ning kangpeu je nang bêu lau?” ze kacheu de lei.

¹⁴Zai pa ne kak ze, “Châu ne ningchu anai peireige heguang hangge benai samrampeu hangge suang gai lau? Ijipram’mpeu je nang tewchat gum ze a chu nang tewchat ra tew mei?” ze acheu bei de lei. Dadege Mosabe hing di ze pe lung ge acheu ze ’nning ze, “Chipau tâ ze haimena ne chî kam di leu gu de lei,” ze kacheu de lei.

¹⁵Pharaobe ne chize seu lu dege, Mosabe je tewchat ra pa peu di de lei. Kane Mosabe â Pharaobe dagene paktat ze Midianram ge bam di de lei; zai pa dekuaki taige ’ntaukeu gai de lei.

¹⁶Chunage Midianram gu tingkupeu pe na heleume hangsena bam lei; zai penui ne wang ze hedui tuak lu ze penui peu gu melidung sak ra heduikuak ge hedui ruîpui gai bei de lei.

¹⁷Milireîme ne wang lu ze penui je kelitua ’ndi de lei; kane Mosabe ne sapchu lu penui je ’ngngâ gai bei ze penui gu melidung je hedui guî gai de lei.

¹⁸Zai penui peu Reuelbe tailam penui wang dege, pa ne, “’Ndaize nemai ningnui wangzi-kadesang lau?” ze ka’nneu lei.

¹⁹Penui ne, “Ijipram’mpeu ne melireîme ba gene anui je lupat kai bei, zai anui hang hedui tuak kai bei, zai melidung ramme je pa ne hedui guîgaibeibe ziegene de lei,” ze kacheu de lei.

²⁰Pa ne pe na heleume je, “Pa ’ndaige la lau? ’Ndaitew ze chipaupeu je ningnui sâudiak kai ’ndi lau? Pa mâ-teu ra hangge pechu kû gai lau,” ze kacheu de lei.

²¹Zai Mosabe â aipaupeu ki ge bam bam de ra pe lung hezuâ gai di de lei, zai pa ne pe na heleu’mpui Zipporale je Mosabe hang pei bei de lei.

²²Zai Zipporale ne ’ngngiêne ’mpeumi hangkat lungkeu de lei, zai pe ji hang Gershombe ze ’ntak kai de lei; pa ne, “I â hesangkedeume ram ge bambepeu chang de lei,” kacheube ziegeneu.

²³Chipauting tat-hangbe kakge Ijipram heguangpeu chai di de lei. Zai Israelme penui kebang changdibe kangge huaipun ze bam di de lei, zai Hera dage ka’ngngâbe kie ze penui hap ze bam de lei, zai penui kebang kangge kehapbe kuâ ze Hera dage wangchang di de lei.

²⁴Zai Hera ne penui huaipunbambe kuâ ze seu di de lei, zai Hera ne Abrahambe, Isaakbe zai Jakobbe dage pe gu samhatkaibe ze chibam de lei.

²⁵Dadege Hera ne Israelme bau je ngau di de lei, zai Hera ne penui kebambe tak ze chî di de lei.