Read Zeme Naga EKSODAS 23 Bible Online

EKSODAS 23 - Zeme Naga bible

EKSODAS 23

¹“Karasa gu hepâusam nang sapat mak ra lei. Mi jaîsiabe gene sakkitew gai ra hangge ziemmena kesiabe kau dage nang hezuâ gai mak ra lei.

²Tâ-kesiabe tew ra hangge baudime chai nang sui mak ra lei; pelingtewbe ze tewkedet kai ra hangge baudime lam’mbe lia gai ze hetûtube ge du nang sakki tew gai mak ra lei;

³zai hetûtube ge kelaksiapeu je nang kehung-ka’nrietew gai mak ra lei.

⁴“Ning tewreipeu gu getumsei mei nune pe gu hekunmerângne mei ze lietattibe ze nang dau zai â pe dage nang ne kumwang gai dai ra lei.

⁵Ningchu ngaugailakpeu gu hekunmerângne pe put pungtatlak ze pechu dap laleu zai â pechu chi acheu bambe luî gene nang put kai mak ra lei, pechu chize nang teichu’ngngâ gai ra lei.

⁶“Samrambe bâm ge ning gu kelaksiapeu ka’nzeibe ngaurabe nang ne chaptua mak ra lei.

⁷Karasa ne chau’ngkuigaibe gene nang â bam’ndeu de lau, zai pemâugame benai pelingtewme je tewchat se lau, tâ-kesiabe tewme je â I ne râm’nzei gai ra mak daseu.

⁸Zai nang henim lu mak ra lei, henim zene tâ-muipuame mik tewchit daseu, zai ka’nzeibe ge sappeu deu ge tewkedet kai bei tai daseu.

⁹“Hesang heluîchâmme je nang geted mak ra lei; hesang heluîchâmpeu lungtak â nang chî de lei, ningnui leize Ijipram ge hesang heluîchâmme gum bam gai daseu.

¹⁰“Kum seruk ning lu ge nang helei kai ra lei, zai perachî gekumwang’ndui gai ra lei;

¹¹kane pasenabe kum â ning gu helu ze peize sau’ntak kai ra lei, zai tâtewgaibeibe luî peize bam ra lei, chidezai ning dage ning gu kelaksiame hetak hang ngau le ra hangge zeu; zai penui ne teu’nsakkaibe ze hekaune teu ra hangge zeu. Chigum ze ning gu grepchî merie benai olib merie peireige du nang tew gai ra lei.

¹²“Hezie seruk ning tâ nang tew ra lei, kane pasenabe mai ge â nang sau’ntak ra lei; dezai ning gu getumsei benai hekunmerângne ze du sau’ntak kai le ra hangge zeu, zai ning gu kebangpui na benai hesangme hangge du temichai gai le ra hangge zeu.

¹³I ne ningchu ranggai’ndibe leine ze ’ngking’mmi le lau; zai kêdabe hera ramme ji kûchu se lau, chigumbe ze ning mui gene du peize sapat se lau.

¹⁴“Patingkum ge luachum nang a ji gene hengî ra lei.

¹⁵’Nduihîkaimakbe tingku-ngi nang hengî ra lei; I ne ningchu samdiegai’ndibe luigum ze, Abib kêu ge beting riagaibe ge hezie sena ’nduihîkaimakbe tingku nang teu ra lei, chipau mai ge Ijipram gene nang zuapat daseu. A masuage mî de pe barua ze liâ mak ra lei.

¹⁶Helugatbe-ngi ze nang reibam ra lei, helu ge nang linggaibe gene nang tâtewgaibe rachî keraîbe gatbe ting gezeu. Helu gene nang tâtewbe rachî gekumwangbe ting, patingkum tûn ge, gekumwanggaibe-ngi nang reibam ra lei.

¹⁷Patingkum ge luachum ning gu ’mpeumi leine Tingwang masuage liâ ra lei.

¹⁸“A hangge herâtewbe jai peipatbe luage a dage ’nduihîkaibe tingku nang pei gai mak ra lei, zai a gu luube gu hemeichâ ze hechua riâ hangge ’nsak kai mak ra lei.

¹⁹“Ning Rapeu Tingwang gu heki ge mâ-himlei keraîbe gu perachî karchibe ramme nang teiwang gai ra lei. “Kemeipoine je bepui tungdui gene nang langteu mak ra lei.

²⁰“Pie le lau, ’mpuîki ge ningchu hekêt-kai ra zai I ne teleu’ntuagai’ndibe bâm ge ningchu nguawang gai ra ning suage angel’mpeu je I lang gai lei.

²¹Pechu pie’mmi ze pe kuâ ’ngking’mmi le lau, pechu tingkang se lau, ning mâu ze pa â lun ra mak daseu; pa ge a ji ze la daseu.

²²“Kane nang ne pe kuâ ’ngking’mmi zai I ne rangbe leine tew dizai â I ne ning teureime hangge penui teureipeu chang gu, zai ningchu katingkangme je I ne katingkangpeu chang gu lei.

²³“A gu angel’mpeu ne ning suage raîtat ze, zai ningchu Amorme, Hethme, Perizme, zai Kanaanme, Hibme zai Jebusme dage nguagut kai ze, zai I ne penui je tew’ngga kam gai dezai,

²⁴penui râ ramme je nang kellum mak ra, penui tatew ramme luigum ze du tew mak ra lei, kane penui je nang ne tewkau kam gai ra, zai penui gu tingchusum ramme tewpângdesuirui gai kam ’nde ra lei.

²⁵Ningnui Rapeu Tingwang guâ ningnui ’nggua ra lei, dezai ning gu tingku benai ning gu hedui ze I ne ’nnam gai gu lei; chidezai ning dage I ne teuneube ze tei’mbia ’ndu lei.

²⁶Ning ram dei ge â mî de henakeube benai henagabe bam ra mak lei; I ne nang keringbe ting naimikpui ramme tewpuiting gai de lei.

²⁷A gu mi kehingbe ning suage I ne lang gai gu lei, zai nang wanggairabe bâm gu ziemmena zat leine je I ne tewpedap kai gu lei, zai ning teureime leine ning dagene ’nnuktat kam de ra I ne tew gai gu lei.

²⁸Zai ning suage I ne kegui (’ngkui) ramme je lang gai gu lei, chize ne Hibme, Kanaanme, zai Hethme je ning suage kumtua gai gu lei.

²⁹Kum kat lung gene penui je ning dagene I kelitua ra mak lei, heram ze putzîng ze bam mak ra, zai mârekaune pungpat ze ningchu tewhereu mak ra hangge zeu.

³⁰Nang heluîhingpuiting di, zai heram ze ’nram le mak tâne, penui je kecheî-cheîne ning dagene I ne kelituagesin bam gu lei.

³¹Zai ning gu heram’nrai ze Kegiebe Sungkling gene chu ze Philistinme gu sungkling riâ zai hênamchangbe heram gene chu ze Euphrates riâ I ne tew gai gu lei, heram deiname je ning ba ge I ne peipat kai gu daseu, zai nang ne ning sua ’mbe penui je kelitua gai gu lei.

³²Chime dage benai penui gu hera ramme dage nang nguapuinakattew mak ra lei.

³³Penui â ning ram dei lungge bam mak ra lei, a dage ningnui hemui tâ tew ra penui ne tew gai mak ra hangge zeu; penui râ ramme guâ nang ’nggua dizai â chize ne ning hangge ’mpia chang sing gu daseu,” kacheu de lei.