Read Zeme Naga EKSODAS 26 Bible Online

EKSODAS 26 - Zeme Naga bible

EKSODAS 26

¹“Chipau peireige du banutpaî langkie kie na ’nneuzunlube ’nzaibe zai gieremangbe benai tologie giak ne paî kereu daklube zene kakellumbe paîki ze nang tew gai ra lei; chige kerubme luî ze heziak tew zun gai ra lei.

²Paî kat hangge petâ ze sâu ’ngkai ze deset, zai pedit ze sâu medai ra lei; zai paî leine ze periâ ’nsamrap ra lei.

³Paî mengeu ze heruihelua gai ra; zai kêdabe paî mengeu ze du heruihelua gai ra lei.

⁴Zai paî heruiheluagaibe kat-kat gu peri-tûn ge ka’nzaibe paî ne heriakigua ramme hang tew gai ra lei; zai chigum ze kêdabe paî herui heruagaibe ge du peritûn ge heriakigua ramme hang put kai ra lei.

⁵Heriakigua ramme paî kat kung ge rengeu nang tew gai ra lei, zai chigum ze kêdabe paîkung ge du heriakigua ramme ze rengeu tew gai ra lei; chipau bekiputbe ze paî na lam gu kat-kat je teida ra lei.

⁶Zai paî kat ne chipau kakellumbeki ze liâmtuipit le ra hangge gechâk ne peguak ramme rengeu nang tew gai lu ze chize ne paî kat ne kêdabe paî ze zuhelua gai ra lei.

⁷“Kakellumbe paîki peireige kupkairabe hangge kemeigêu paî kereu ze kat nang tew gai ra lei.

⁸Paî kat hangge petâ ze sâu himreu zai pedit hangge sâu medai-dai ra lei; chi paî kereu ze pedit petâ riâ kat kam ra lei.

⁹Paî mengeu ze kat hangge heruihelua gai ra lei, zai kêdabe seruk ze paî kat hangge heruihelua gai ra lei. Paserukbe paî ze â dip na kedip lu ze paîki suage liâmpat kai ra lei.

¹⁰Paî heruiheluagaibe ge nâlangbe paîtûn ge bekung hezun-gaibe ki ramme rengeu put kai ra lei, zai kêdabe paî ge du bekung hezun-gaibe ki ramme rengeu bam ra lei.

¹¹“’Mpûmlim kat hangge chang le ra hangge heruihelualube paî kena ze kangngâgeî ne peguak ramme rengeu tew lu ze hezun-gaibe ki ramme gene guakherua gai ra lei.

¹²Paî pa’mpi ’nsakpatbe dâng ze â kakellumbe-paîki chaige tap kai ra lei.

¹³Zai paî petâ liâmpatbe gene pehia ’nsakpatbe ze â ’ndang kûm ra hangge sâu kat-kat ’ndang kena lam ’nsak kai ra lei.

¹⁴Zai paîki liâmrabe hangge meli’nsei gei naichiê ne pukîgierialube ramme benai kemei gei ramme ne nang tew gai ra lei.

¹⁵“Zai nang akasia ching ne paîki-’ngra hangge ’nrangchu gai ra lei.

¹⁶Bechia ze petâ sâu kereu zai pedit ze sâu kat ze bepi ra lei.

¹⁷Bechia kat hangge bechia kena kai lu ze kena kakge pekang ne kai’ntuk kai ra lei. Chipau luigum ze kakellumbe-paîki gu kechia ramme tew kam gai ra lei.

¹⁸Kakellumbe paîki hangge bechia ramme aigum ze nang tew kam ra lei: tingpî ’mbia hangge bechia ’ngkai ra lei;

¹⁹zai bechia ’ngkai pî ge bechia ’nsangne gu tûngka’nsapbe chia kena bambe hangge gepût ne tewbe, gechia dungrabe ramme hedai nang tew gai ra lei, zai kêdabe chia ramme hangge du chigum ze tew ra lei;

²⁰zai kakellumbe-paîki katlam ’mbia tingpeî ’mbia hangge bechia ’ngkai,

²¹zai bechia ’nsangne ge kena-na kairabe hangge gepût ne tewlube gechia dungrabe kuiki hedai tew gai ra lei.

²²Kakellumbe paîki kichai ’mbia naimikkeu ’mbia hangge bechia seruk tew gai ra lei.

²³Zai kakellumbe-paîki pechai ’mbia ge pemikchia kena tew gai lau.

²⁴Heki mik ge bechia ramme bambe ze bepî ’mbe tewherua gai ra lei. Bepeirei ’mbia â pegua ramme zene guak ra lei. Chipau luigum ze pemik kena lam ge tew gai ra lei.

²⁵Zai chize pelane ge bechia desat de lei, chige gechia dungbe kuiki gepût ne tewlube du kereu ze seruk ra lei, pa’ngra bechia kat ge kena zai kêdabe ge du kena zeu.

²⁶“Zai akasia ching ne bechâp ramme hangge nang tew gai ra lei, kakellumbe-paîki kat lam’mbia hangge mengeu,

²⁷zai kakellumbe-paîki kêda ’mbia gu bechia hangge du bechâp mengeu, zai kakellumbe-paîki gene naimikkeu ’mbia kichai ’ndang gu bechia ramme hangge du bechâp mengeu ra lei.

²⁸Sûngngang ge, bechia pa’mpi riâ ge bambe bechâp ze â kat lam’mbia gene kêdabe lam’mbia gu riâ chang ze teipelatat chang ra lei.

²⁹Bechia ramme ze gechâk ne nang kûm ra lei, zai bechâp ramme guakgimrabe hangge bechia ramme ge gechâk gua ramme tew gai ra lei; zai bechâp ramme ze gechâk ne nang kûm ra lei.

³⁰Zai kedeiloa’ntûm hube ge chipau luitak ’nranggaibe ning suage teiliagai’ndibe luigum ze kakellumbe-paîki nang tei’nsapchu gai ra lei.

³¹“Zai lîmnambe-paî hangge ka’nzaibe benai gieremangbe zai tologie zai banutpaî gu kelangkie ’nneuzunlube ne nang tew gai ra lei; chige kerubme luî reming ze tew gai ra lei;

³²zai gechâk ne kûmlube akasia chia ramme, chige gechâkguak ramme bambe zai gepût ne tewbe gechia dungbe kuiki medai peireige sapbe gechia medai ge chize liâm gai lau.

³³Zai peguak ramme ge guak kai ze, lîmnambe-paî ze nang lîm gai ra lei, zai lîmnambe lungge samhatkaibe hingdebung ze teigut kai ra lei; zai chi lîmnambe-paî zene ’nchilangbe bâm gene ka’nchibe bâm ze bienambe chang ra de lei.

³⁴’Nchilangbe bâm ge samhatkaibe hingdebung bambe peireige ka’nggiabe bâm ze nang kai ra lei.

³⁵Zai lîmnambe gene hela ’mbe kela peipatbe kaibe kaira ze nang kai ra lei, zai kela peipatbe kaibe kaira gene kêda ’mbia kakellumbe-paîki gu tingpî ’mbia ge kachâbungkaibe kaira ze â kai ra lei; zai kela peipatbe kaibe kaira ze â tingpeî ’mbia nang kai ra lei.

³⁶“Zai hengim ne heziak tewlube ka’nzaibe zai gieremangbe zai tologie paî zai banutpaî langkie ’nneulube ne dakzunlube zene paîki gu kemuiki gu kemuiki paî hangge nang tew gai ra lei.

³⁷Zai kemuiki paî hangge akasia ching chia ramme mengeu nang sum gai ra lei, zai chiramme ze gechâk ne kûm ra lei; peguak ramme hangge gechâk ne tew ra lei, zai kangngâgeî ne gechia dungbe kuiki ramme hangge mengeu tew gai ra lei.