Read Zeme Naga EKSODAS 28 Bible Online

EKSODAS 28 - Zeme Naga bible

EKSODAS 28

¹“Chidaze tingkume chang ze a guâ ’ngguarabe hangge Israelme ruagene ning sipeu Aaronbe benai pe name, Nadabbe, Abihube, Eleazarbe, zai Ithamarbe je ning dage nguawang gai zu lau.

²Zai nang ne ning sipeu Aaronbe hangge ka’nchibe puâ ramme tew gai ra lei, pengêudirabe hang benai peluiyirabe hangge zeu.

³Zai a gu tingku tâ tewrabe hangge pechu tew’nchi gai be ra Aaronbe puâ ramme hangge tew gai ra mâ-chîam chiamchirabe hangge I ne tewgaibeime leine je nang ne rang gai ra lei.

⁴Penui ne tewgairabe puâ ramme ze airamme ze de lei: Mi gapuâ ephod, mechuatiebe, heziak tewlube mechuapui, peî’nggau, zai hekiakâk; penui ne ning sipeu Aaronbe benai pe name ne tingkume chang ze a guâ ’ngguarabe hangge ka’nchibe puâ ramme tew gai ra lei.

⁵Penui ne gechâk ria ka’nzaibe benai gieremangbe zai tologie merua ramme zai banutpaî langkie yibe ne tei ze tâtew gai ra lei.

⁶“Penui ne gechâk, zai ka’nzaibe benai gieremangbe zai tologie merua ramme ne, zai banutpaî langkie ’nneulube ne ephod ze tew gai ra lei.

⁷Chize piheluachi le ra hangge bekung kena lam’mbia ge mi keîtoa gene ’nchierabe riâ tew gai ra lei.

⁸Zai chige mi kia ge kakrabe pak hangge tewgaibe benai merua zat ’nzuâsiakbe ne, gechâk, zai ka’nzaibe merua benai gieremangbe zai tologie, zai banut paî langkie ’nneuzunlube ne dak zun gai ra lei.

⁹Zai oniks chu kena nang teleu gai ra lei, zai chige Israelbe name ji ramme raw gai ra lei,

¹⁰meraibe gene pesinprin ze tingchukâng kat ge hangseruk ji, zai pakenabe chukâng ge hangseruk ji ze raw gai ra lei.

¹¹Gechâk-luame ne baroine ge tingchu linggaibe gum ze Israelbe name ji rawgailube tingchukâng kena ze nang ling gai ra lei; gechâk ne bepuâ tewzunlube lungge chize nang ling gai ra lei.

¹²Zai ephod gu mi keîtoa ge ka’nchiebe ge Israelbe name ji chibamrabe chukâng kena hangge chipau chukâng kena ze kai ra lei; zai chibamrabe hangge Aaronbe ne pe keîtoa gene Tingwang masuage penui ji ramme pung ze bam ra lei.

¹³Zai nang ne gechâk ne bepuâ hang teleu zun gai ra lei,

¹⁴zai gechâk ne ’ntuklube heriagua kena tew gai ra zai heria gum ze ’nneu gai ra lei; zai bepuâ tewzunlube ge ’nneulube ria ramme ze kaitemi gai ra lei.

¹⁵“Reming ze tewlube gene samrambe gu mi gapuâ nang tew gai ra lei; ephod hangge tâtewgaibe luigum ze aize du nang tew gai ra lei; gechâk, zai ka’nzaibe benai gieremangbe zai tologie lang, zai banut paî langkie ’nneulube ne nang chize tew gai ra lei.

¹⁶Chize pedit-petâ ’nsamrap ra zai desua lu ze tew gai ra lei, petâ hangge tingkeu kat zai pedit hangge tingkeu kat ra lei.

¹⁷Chige tingchu ’nria medai nang kai ra lei. Keraîbe ’nria ge Sardias chu, topaz chu, zai karbankil chu bam ra lei;

¹⁸zai pakenabe ’nria ge, emerald chu, sapphir chu zai diamond chu bam ra lei;

¹⁹pakechumbe ’nria ge, jasinth chu, agat chu, zai amethist chu bam ra lei;

²⁰zai pamedaibe ’nria ge, beril chu, oniks chu zai jaspar chu bam ra lei; gechâk ne bepuâ teleuzunlube ge chiramme ling gai ra lei.

²¹Israel name ji pesin-prin rawgailube tingchu kereu ze kena chige bam ra lei; chiramme ze baroine ge gum ze tingchu ’nsangne ge hang kat-katne ji raw gai ze Israelme zat kereu-ze-kename ji raw gai ra lei.

²²Zai gechâk ’nchichiakbe ria kitlube zene heria gum ze mi gapuâ hangge nang tew gai ra lei;

²³zai mi gapuâ hangge gechâk riagua kena tew gai lu mi gapuâ mik na lam ge chipau gua kena ze nang kai ra lei.

²⁴Zai gechâk ria kena ze mi gapuâ ge mik na lam gechâk riagua kena bambe ge nang za gai ra lei.

²⁵Peria kena leitûn ze bepuâtewbe-ritûn kena ge nang ’ntuk’mpam gai ra lei, zai chigum ze ephod gu mi gapuâ hela’mbia ge chize tew’mpam gai ra lei.

²⁶Zai gechâk riagua kena nang tew gai ra lei, zai chize mi gapuâ tûn kena ge, ephod chaige pelung ge bambe peleitûn ge kai ra lei.

²⁷Zai chipau chângge gechâk riagua kena nang tew gai ra lei, zai ephod gu heziak tewzunlube, daklube kiakâk helakkaibe peireige, ephod gu mi gapuâ kena ’ngkang ’mbia ge chize kai ra lei.

²⁸Zai ka’nzaibe peritûn ne ephod gu heriagua ge mi gapuâ gu heriagua ramme zene penui ’ntuk kai ra lei, chidezai chize ephod gu dakzunlube kiakâk peireige bam le ra zai ephod gene chi mi gapuâ ze heluihiak pat mak ra hangge zeu.

²⁹Chigum ze Tingwang masuage penui je peize chibamrabe hangge Aaronbe ne ka’nchibe bâm ge gutbe luage samrambe gu mi gapuâ ge Israel name ji rawgailube ze pe ga ’nrei ge pung ra lei.

³⁰Zai samrambe mi gapuâ lungge Urim benai Thummim ze nang kai ra lei, zai chibe kena ze Tingwang masuage pa zuagutbe luage Aaronbe ga ’nrei ge bam ra lei; chigum ze Tingwang masuage sau mak ze Israel name gu samrambe ze pe ga ’nrei ge bam bam ra lei.

³¹“Chidezai ephod gu mechuatiebe ze ka’nzaibe ’nnia ne pelikpik ze nang tew gai ra lei.

³²Chipau mechua ze peize hakmakrabe hangge mechua ge putkaibe ge gum ze mi guangki putbe kung ge paîdip hezun-guâ gai lu ze ning guangki hangge put kai ra lei.

³³Mechuatûn ge ka’nzaibe benai gieremangbe zai tologie lang ne turiechî luî tew gai ra lei, chiramme kak-kakge gechâk ne tewbe kakezitbe ’ntoî ramme kaiguâ ra lei,

³⁴mechuatûn ge gechâk ne tewbe kakezitbe ’ntoî kat benai turiechî kat gechâk ne tewbe kakezitbe ’ntoî kat benai turiechî kat ze kakcheiguâling gai ra lei.

³⁵Zai tâka’ngguabe luage Aaronbe chipau puâ kai ra lei, zai chipau puâ ze Tingwang masuage pa gutbe luage benai zuapatkadaibe luage pe kuâ seu bam ra lei, pa chai mak ra hangge zeu.

³⁶“Zai gechâk ’nchichiakbe ne pepakpi kat nang tew gai ra lei, zai baroine ge linggaibe gum chige, ‘Tingwang dage ka’nchibe,’ kacheube sam ling gai lau.

³⁷Zai ka’nzaibe ria ne hepeî’nggau ge chize kak kai lau; chize hepeî’nggau sua ’mbia bam ra lei.

³⁸Chize Aaronbe telie peireige bam ra lei, zai Israelme ne ka’nchibe hangge chak kai lu ze penui gu ka’nchibe kela ramme hangge peipatkaibe ge ka’nchibe kela ramme ge tewmaube lazai Aaronbe ne pe runne ne pe peireige tei gai le ra, chidezai Tingwang ne chiramme ze lugaibe chang le ra hangge zeu.

³⁹“Zai banutpaî langkie niangbe heziak tewzunlube ne mechuapui hangge nang dak kai ra lei, zai banutpaî yibe ne hepeî’nggau hangge nang tew ra lei, zai ’ngngim ne heziak tewzunlube ne hekiakâk hangge nang tew ra lei.

⁴⁰“Chidezai Aaronbe name hangge mechuapui ramme benai hekiakâk ramme zai peichûp ramme nang tew gai ra lei; chiramme ze pengêudirabe benai peluiyirabe hangge nang tew gai ra lei.

⁴¹Zai chiramme ze ning sipeu Aaronbe peireige benai pe dage pe name bamme peireige nang luak kai ra lei, zai penui je nang taudui ’nnuk kai ze tew’ntip kai ra zai penui je diepat’nchi gai ra lei, chidezai tingkume chang ze penui a guâ ’ngguachi le ra hangge zeu.

⁴²Zai penui pumlâng bambe ze kaichim le ra hangge banutpaî ne pelung telong ramme penui hangge nang tew gai ra lei; chipau pelung telong ramme ze mi kia gene mi nie riâ chang ra tew gai ra lei.

⁴³Kakellumbe paîki lungge penui zuagutbe lua mei nune ka’nchibe bâm ge ’nggua ra herâtewbe-kaira hiage wangka’nnabe luage mei Aaronbe benai pe name pum ge chipau telong ramme ze kai ra lei; penui runne penui peireige kemaube teiwang gai lu ze chai mak ra hangge zeu. Aize pe hangge benai bechâng ge pe chaname hangge tewtatbamrabe hingde chang ra de lei.