Read Zeme Naga EKSODAS 3 Bible Online

EKSODAS 3 - Zeme Naga bible

EKSODAS 3

¹Chunage Mosabe â pe pau (pe nâu peu) Jethrobe, Midianram tingkupeu gu melidung ramme reî bam de lei; zai pe gu melidung je hênamkang ’mbe naimik kêu gai ’mbia ’ngngua gai nan ze chi Hera deiloa Horeb ’mbe wang de lei.

²Zai Tingwang gu angel’mpeu ne hereupuîtum zuilung ge hemi melei gene pechu liâ de lei; zai chize pa pie lage, ni, chi hereupuîtum ze hemi-tau bam de lei, kane chize rû-’ngga mak lei.

³Zai Mosabe ne, “I tat-hiâpat lu ’ndaigumbe tak gene hereupuîtum ze hemi-tau mak mei be ze I ngau sing gu lei,” ze kacheu de lei.

⁴Zai Tingwang ne Mosabe chize ngau ra hang pa tat-hiâpatbe ngau lu dege, hereupuîtum gene Hera ne pechu, “Mosabai, Mosabai!” ze ku gai de lei. Zai pa ne, “I aige lamui lei,” ze kacheu de lei.

⁵Dadege pa ne, “Wang’nna se lau; ning pîchûp kena luaktua ne lau, nang sapbe kedei bâm ze â ka’nchi daseu,” acheu bei de lei.

⁶Zai pa ne, “I â ning peu Rapeu lei, Abrahambe Rapeu, Isaakbe Rapeu, zai Jakobbe Rapeu ze de lei,” kacheu de lei. Dadege Mosabe pe ju ze kebachim ’ndi de lei, Hera je pa pie gai hing di zeu.

⁷Dadege Tingwang ne, “A gu ziemmename Ijipram ge bamme kategabe liebe ze I ngau lu de lei, zai penui peireige tâtewme je kereîme ziegene penui kehapbe kuâ ze I seu lu de lei; penui kahereube liebe ramme ze I chî lei.

⁸Zai Ijipme ba gene penui je lupat kai ra zai heram gene penui je nguapat lu ze, heram kedibe benai keyibe, tungdui benai ’ngkuidui ne luabe heram Kanaanme, Hethme, Amorme, Perizme, Hibme zai Jebusme bambe bâm ge ngua gai ra I wangkeu de lei.

⁹Zai chunage pie le lau, Israelme kehapbe kuâ ze a dage wangchang de lei, zai Ijipme ne penui je tega ze kategabe tâ tewgaibe ze du I ngau lu de lei.

¹⁰Wang lau, Ijip gene a gu Israel chaname je nang ne nguapat kai ra hang I ne ningchu Pharaobe dage lang gai gu de lei,” ze kacheu de lei.

¹¹Kane Mosabe ne Hera je, “I nung ze châu lau, Pharaobe dage tat lu Ijip gene Israel chaname je nguawangrabe nung zeu?” ze kacheu de lei.

¹²Pa ne, “I ne ning dage bam gu zeî lau; zai aipau deiloa gene ningnui ne Hera guâ ’nggua ra Ijip gene baudime je nang ne nguapatbe ting ge chi I ne ningchu langgaibe zene ning hang ka’nchetbe chang ra de lei,” ze kacheu de lei.

¹³Dadege Mosabe ne Hera je, “I ne Israelme dage wang lu, penui je, ‘Ningnui peume Rapeu zene ningnui dage achu lang gai de lei’ ze acheu sa gai bei ze penui ne achu, ‘Pe ji ’ndaikau lau?’ acheu dizai â penui je I ’ndaikautew lei ze sa gai ra lau?” kacheu lei.

¹⁴Hera ne Mosabe je, “I ze I de lei.” Ze kacheu de lei. Dadege pa ne, “Israelme bau je acheu ze salia lau, ‘I KACHEUPEU zene ningnui dage achu lang gai de lei’ ze acheu zeu” ze kacheu de lei.

¹⁵Hera ne Mosabe je acheu sa dai ze, “Aize Israelme dage salia lau, ‘Tingwang, ningnui peume Rapeu, Abrahambe, Isaakbe, zai Jakobbe Rapeu zene ningnui dage achu lang gai de lei,’ ze kacheube zeu: aize betingbeta hang a ji de lei, zai aigum acheu ze reheipiakeume leine dage achu chibam ra de lei.

¹⁶Tat ze Israelme gu gechîngme ramme je nguawang’ndui gai lu penui je acheu salia lau, ‘Tingwang, ningnui peume Rapeu, Abrahambe, Isaakbe zai Jakobbe Rapeu ne a dage liâ ze acheu sa ze, “Ningnui je zai I Ijip ge ningnui peireige ’ndaikau tew gai ’ndi mei be ze I ’nchetzun lu de lei;

¹⁷Ijip ge ningnui je tewkahereube gene I ne nguapat lu, Kanaanme, Hethme, Amorme, Perizme, Hibme zai Jebusme dei, tungdui benai ’ngkuidui ne luabe heram ge ngua gai ra hangge I ne hat kai de lei,” kacheu de lei,’ ze acheu zeu.

¹⁸Zai penui ne ning kuâ seu gu lei; zai nang benai Israel gu gechîngme ne Ijip gu heguang dage tat ze, ‘Tingwang, Hebraime Rapeu ne anui je hedau gai de lei; zai chunage anui ne ningchu kiam de lei, anui Rapeu Tingwang dage anui herâtew gai le ra hênamchangbe heram ’mbe anui tat kei lei,’ ze acheu ze pechu salia ra lei.

¹⁹Heba ranchibe ba ne makchai â Ijip gu heguang ne ningnui je ’mpat kai ra mak lei be I chî lei.

²⁰Chidaze I ne a ba getuapat ze, aige I ne ningdaulakbe tâ ramme tewgairabe zene Ijip je tewsâ gu lei; chipau châng dezai pa ne ningnui je ’mpat kai gu lei.

²¹Zai Ijipme mikngau ge aime ziemmename je ngau’nggiarabe hangge I pei gu lei; zai ningnui tat tezaine ningnui barua ze tat ra mak lei;

²²kane Israel ’mpuimi leine ne penui kining ge penui kangme Hebraime dage, zai penui ki ge Hebraime ’mpuimi bamgaileube kau dage gepût benai gechâk ne kateleube meruapoine ramme, zai paîni kie gu lei, zai chiramme ze ningnui name dage ningnui ne luak kai gu lei; aigumbe tak gene ningnui ne Ijipme gu sut-tat kam du lei,” ze kacheu de lei.