Read Zeme Naga EKSODAS 30 Bible Online

EKSODAS 30 - Zeme Naga bible

EKSODAS 30

¹“Mâ-perîmyibe rûgairabe hangge herâtewbe-kaira nang tew ra lei; akasia ching ne chize nang tew ra lei.

²Betâ hangge sâu kat zai pedit hangge sâu kat ra lei; chize petâ benai pedit ze ’nsamrap ra zai pehut hangge sâu na ra lei; bekie ramme chige tewhelua gai ra lei.

³Zai bepeirei ge benai pebia dangguabe ramme benai bekie ramme gechâk ka’nchibe ne nang kûm gai ra lei; zai gechâk ne pekunghia nang kûmguâ gai ra lei.

⁴Zai chipau hangge gechâk ne tewbe riagua kena nang tew ra lei; bepeirei ’mbia bekung kûmgaibe ’ngkang ge kena lam’mbia kena-na nang tew gai ra lei, zai chipau gua ramme zene puarabe chingkang ramme ruagaibe hang chang ra lei.

⁵Akasia ching ne puabe chingkang hang nang tew gai lu, zai chize gechâk ne kûm gai ra lei.

⁶Zai samhatkaibe peireige ka’nggiabe bâm bambe samhatkaibe hingdebung suage lîmnambe paî suage chize nang kai ra lei, chige ningchu I hedau gu lei.

⁷Zai Aaronbe ne mâ-perîmyibe chipau peireige rû gai ra lei; hechua ’nsangne kachâbung ramme teleu’mmi gai ra pa gutbe luage chize pa rû gai ra lei,

⁸zai hegî ge Aaronbe kachâbung ’ntau lu teichugaibe luage du mâ-perîmyibe pa rû gai ra lei, ning gu rehei ramme leine ge aize Tingwang masuage mâ-perîmyibe chang ze bam ra lei.

⁹’Nchimakbe mâ-ka’ntaube rîm mei nune, rûkambe-râtewbe mei, nune mâ-himlei peipatbe mei be ze â chige ningnui pei gai mak ra lei; zai chipau peireige ruîpatbe-râtewbe du ningnui ruî gai mak ra lei.

¹⁰Aaronbe ne kum kat ge lua kat chipau kaira kie ramme peireige kelunbe-râtewbe tew gai ra lei; ningnui gu rehei ramme leine ge pa ne kum kat ge lua kat kelunbe-râtewbe hemui-râtewbe chipau gu hejai ne pa ne kelunbe-râtewbe tew gai ra lei; aize â Tingwang dage ’nchilangbe de lei,” kacheu de lei.

¹¹Tingwang ne Mosabe dage rang gai ze,

¹²“Israelme gu hepiau nang raw dezai, penui je nang seibe luage hangkat-katne pe gu keringbe-hâ Tingwang dage peipat kai ra lei, chidezai penui je nang seibe luage penui ruage tewkahereube wangchang mak ra hangge zeu.

¹³Hepiaurawbe ge pe ji riamgai’ndibe kau ne aize pei ra lei: Hera ki gu rangkâng riambe tak gene gepût-rangkâng (shekel) kangpi (shekel ze â gerah ’ngkai lei), chi shekel pa’mpi ze Tingwang dage kela peipatbe chang ra lei.

¹⁴Hepiaurawbe ge heji rawgai’ndime leine, kum ’ngkai gene bepeirei kau leine Tingwang gu ’mpuâ pei ra lei.

¹⁵Ningnui hangge kelunbe-râtewbe hangge Tingwang gu ’mpuâ pei dezai, gepût-rangkâng pa’mpi suadu kie ze, lungyime ne pei’ngkie sua mak ra zai kelaksiame ne du pei’ncham sua mak ra lei.

¹⁶Zai Israelme dagene kelunbe-râtewbe gu rangkâng nang lu ra lei, zai chize kakellumbe-paîki ’ngguarabe hangge kai ra lei; chidezai Tingwang masuage chize ne Israelme je chibamrabe chang le ra, chidezai ningnui runne ningnui hangge kelunbe-râtewbe chang le ra hangge zeu,” kacheu de lei.

¹⁷Tingwang ne Mosabe je rang gai ze,

¹⁸“Hui’nchirabe hangge kangngâgeî ne tewbe heduikuak benai bepî hangge du kangngâgeî ne nang tew gai ra lei. Zai kakellumbe-paîki benai herâtewbe-kaira kakge chize nang kai ra lei, zai chige nang hedui kai ra lei,

¹⁹chigene Aaronbe benai pe name penui ba benai penui pî hui ra lei.

²⁰Kakellumbe-paîki ge penui gutbe luage mei, nune Tingwang dage hemi gene kela peipatbe rû gai ra herâtewbe-kaira hangge ’nggua ra wangka’nnabe luage mei ze, penui chai mak ra hangge hedui ne penui hui’nchi ra lei.

²¹Penui chai mak ra hangge penui pî-ba ramme hui ra lei: aize pe hangge du zai pe chaname hangge du penui gu rehei leine ge tewtatbamrabe hingde chang ra lei,” kacheu de lei.

²²Chipau peireige du, Tingwang ne Mosabe je rang gai dai ze,

²³“Pemung yilangbe ramme lu le lau: Mur dui hit seruk, ’nteumagei dui perîmyibe chigene pa’mpi chize hit chum, zai mâ-bang perîmyibe gene hit chum,

²⁴zai ’nteumaneu gu gene hit seruk Hera ki gu ka’ndeube tak luî gene lu ra lei, zai olib taudui hit medai;

²⁵zai mâ-perîmyibe tewme ne kaikakebutbe gum ze airamme gene suanggaibe taudui ka’nchibe hangge nang tew gai ra lei; aize tew’ntipkaibe, ’nnukkaibe taudui ka’nchibe chang ra lei.

²⁶Zai chize ne kakellumbe-paîki benai samhatkaibe hingdebung ge ’nnuk kai ra lei,

²⁷zai ’ngkinggaibe kaira benai pamerua ramme leine ge, kachâbung-kaira benai pamerua ramme leine ge, zai mâ-perîmyibe rube-kaira ge,

²⁸zai rûkambe-râtewbe-kaira benai pamerua ramme ge zai heduikuak ramme benai bepî ramme ge kai ra lei;

²⁹chiramme ze nang diepat’nchi gai ra lei, chidezai chipau ramme ze ’nchilangbe merua chang le ra hangge zeu; airamme deîtaugaibe leine â ka’nchibe chang gu lei.

³⁰Zai Aaronbe benai pe name je nang ne taudui ’nnuk kai ze, penui je diepat’nchi gai ra lei, chidezai tingkume chang ze penui ne a guâ ’ngguachi le ra hangge zeu.

³¹Zai Israelme je nang rang gai ra lei, ‘Ningnui gu rehei ramme leine ge aize ne ’nnukkaibe taudui ka’nchibe chang gu lei.

³²Ziemmename ’mpangpaibe kau ramme pum peireige aize ruî gai mak ra lei, zai aigum ze kaihai ze tewbe tak luigum ze kêdabe hangge ningnui tew mak ra lei; aize â ka’nchibe kau lei, zai aize ningnui hangge du ka’nchibe chang ra lei.

³³Mige aipau luigum ze kaiherua lu ze chiampatbe kau mei nune hela kau peireige mei ze ’nnukkaibe kau â pe gu ziemmename ruagene tuâpat ’nde ra lei,’ ze acheu be lau,” ze kacheu de lei.

³⁴Tingwang ne Mosabe je, “Mâ-perîmyibe merua ramme lu le lau, stakte, onaika zai galbanum, perîmyibe merua ramme mâ-perîmyibe ’nchichiakbe (chiramme gene kaihai’nsamrap kai lu) tei le lau,

³⁵zai mâ-perîmyibe taudui tewme gum ze kaikebut kai lu mâ-perîmyibe tew gai lu, tei bam ra hangge ’nchaî kebut kai lu tewhebâ mak ze ’nchi ze tei lau;

³⁶zai chize gêsa â pemoîne tewniang lu ze, ningchu I hedaurabe bâm kakellumbe-paîki lungge samhatkaibebung suage gêsa â nang kai ra lei; ningnui hangge chize ’nchilangbe chang ra lei.

³⁷Zai kaikebut ze kateleube sietak luî gene mâ-perîmyibe nang tewrabe ze â ning hangge nang tew gai mak ra lei; chize ning hangge Tingwang dage ka’nchibe chang ra lei.

³⁸Mige chipau luirun ze perîmyibe taudui hangge tei ra tewgaibe kau â pezatme dagene tuâpat kai ra lei,” kacheu de lei.