Read Zeme Naga EKSODAS 32 Bible Online

EKSODAS 32 - Zeme Naga bible

EKSODAS 32

¹Kedeiloa’ntûm gene Mosabe wangkeudaimakbe ting tie-desang di de lei be baudime chî lu dadege, Aaronbe dage penui wang’ndui lu, zai pe chu acheu sa ze, “Chu ze anui suage nguaraîtatrabe hangge anui hangge hera ramme tew gai zu lau; aipaupeu Mosabe Ijipram gene anui je nguapatkaipeu deu ze â pe dage ’ndaikau wangchang di ze la de mei be pe kîn anui chî ta de lei,” kacheu de lei.

²Zai Aaronbe ne penui je, “Ningnui nâu ramme, ningnui na ’mpeumi zai ningnui na heleume kun gene gechâk baroine ramme luak lu ze, chiramme ze a dage teiwang lau,” acheu bei de lei.

³Chipau luigum ze ziemmename leine ne penui kun ge gechâk baroine ramme bambe lupat lu Aaronbe dage teiwang gai de lei.

⁴Zai pa ne penui ba gene gechâk lu lu ze mâ-luî chiambe merua zene heki gai ze, langlualube ne getumseipoine luî tew gai de lei; zai penui ne, “Israel zat gau, airamme Ijipram gene ningnui je nguapatbe ningnui rapeu ramme de lei!” kacheu de lei.

⁵Aaronbe chize ngau dege, chipau luî suage herâtewbe-kaira tew gai de lei; zai Aaronbe ne rangba gai ze acheu sa ze, “’Nchuamai â Tingwang dage kahengîbe mai chang ra de lei,” kacheu de lei.

⁶Zai bechaibe mai ge hechuasûn chu lu, rûkambe-râtewbe ramme peipat kai ze kelunbe-râtewbe kela ramme teiwang de lei; zai teu ze sak ra hangge baudime ’ntaukeu gai de lei, zai teluprabe hangge zuachu de lei.

⁷Zai Tingwang ne Mosabe je rang gai ze, “Wangkeu zu lau, ning gu ziemmena Ijipram gene nang ne nguapatkailume â penui runne penui je tew’nsia gai ’nde lei;

⁸penui je I diegaibeibe ’mpuî gene penui lietat kelua di de lei; penui â penui hangge penui runne langlualube ne getumseipoine tew lu, zai chipau luî je kellum ze, zai chige ze herâtewbe kaurui peipat kai ze la de lei, zai penui acheu sa ze, ‘Israel zat gau, airamme ze Ijipram gene ningnui je nguapatbe ningnui rapeu ramme de lei!’ ze kacheu de lei” ze kacheu de lei.

⁹Zai Tingwang ne Mosabe je rang gai ze, “Aipau ziemmename je I ngau de lei, zai pie le lau, aipau zat ze â hekuâpheumeube zat te lei;

¹⁰chidaze chunage I ne tewrabe hangge peipat kai be lau, chidezai penui peireige I a lumpumbe ted ne penui je tew’ngga kam ne ra hangge zeu; kane ning dagene pezat kedibe hangge I ne tew gai gu lei,” ze kacheu de lei.

¹¹Kane Mosabe ne pe Rapeu Tingwang dage kiâm ze, zai acheu sa ze, “Tingwang gau, ning gu reziechibe benai ning ba ranchibe gene Ijipram gene nang ne nguapatlume ning gu ziemmename peireige ’ndaitew ze ning lumpum kai ra lau?

¹²’Ndaitew ze Ijipme ne, ‘Tâ-kesiabe tew ra ka’nningbe gene kedeiloa ’ntûm ramme ge penui je tewchat kai ra zai kedeirei gene penui ji tew’ngga kam gai ra penui je pa nguapat te lei,’ ze peize acheu ra lau? Ning lumpum-kadesangbe sau gai lau, zai ning gu ziemmena peireige kesiabe tewgairabe gene ning lung heli gai lau.

¹³Ning pum sing ne nang ne penui je, ‘Tinggîm ge hegi ramme bambe gum ze ningnui chaname je I ne tewpung gai gu lei, zai I ne hatkai’ndibe aipau heram leine ze ningnui chaname dage I pei gai gu lei, zai betingbeta penui ne chize heram ’nram ze bam gu lei,’ ze hatkailume, ning guâ ka’ngguame, Abrahambe, Isaakbe, zai Israelbe je chibam lau,” ze acheu bei de lei.

¹⁴Chidadege â pe gu ziemmename dage kesiabe tew gai ra ka’nningbe gene Tingwang pe lung heli dai di de lei.

¹⁵Zai Mosabe helatwang kadai de lei, zai kena lam’mbia rawgaibe tingchudepei, samhatkaibe tingchudepei kena pe ba gene tei lu kedeiloa’ntûm gene wangkeu de lei; kat lam’mbia ge benai kêdabe lam’mbia ge du chiramme raw gai de lei.

¹⁶Zai tingchudepei kena ze Hera bachiâm de lei, zai sam rawgaibe ze Hera ne rawgaibe kau de lei, zai Hera ne tingchudepei kena ge ’nrit kai de lei.

¹⁷Baudime ka’nrungbe kuâ Joshuabe seu lu dege, pa ne Mosabe je, “Tejeîbâm ge herei’ncheu la de lei,” kacheu de lei.

¹⁸Kane pa ne, “Chize â hereingambe gu ka’ngkiakbe kuâ mak, zai herei duî lak ze hapka’nrungbe kuâ du mak lei, kane I seube ze â heleutewbe kuâ lei,” kacheu de lei.

¹⁹Zai tejeîbâm hiage pa wang’nna di, zai getumseipoine benai ziemmena kelimbe ngaugap kai dege, Mosabe pe lumpum-desang di de lei, zai tingchudepei kena ze pe ba gene tuâpat ’ndi de lei, zai kedeiloapî ge tingchudepei kena ze ’mpuakpâng gai ’ndi de lei.

²⁰Zai penui ne tewgaibe getumseipoine pa ne tei lu hemi ne rû ’ndi de lei, zai chize pemoîne keriapniang lu, zai hedui peireige ’nruk kai lu, zai chize Israelme je sak ra pa ne tew gai bei de lei.

²¹Zai Mosabe ne Aaronbe je, “Penui peireige hemui kedibe nang ne teiwanggai’ndibe ze aipau ziemmena ne ningchu ’ndaikau tewgaibeibe ne lau?” kacheu de lei.

²²Zai Aaronbe ne kak ze, “A pau ne peize pe lumpum se lau; penui â kesiabe tew ra penui lung ge ’nning ze bambe kau lei be ziemmename je nang chî lei.

²³Penui ne achu, ‘Anui hang hera ramme tew gai lau, anui suage raîtat ra hangge zeu; Ijipram gene anui je nguapatkaipeu, aipaupeu Mosabe deu ge â pe dage ’ndaikau wangchang di la de mei be pe kîn anui chî ta de lei,’ kacheu de lei.

²⁴Zai I ne penui je, ‘Mi-mige du pe dage gechâk bambe kau â luakpat kai zu lau,’ acheu bei de lei; chidadege â chize achu penui ne pei de lei, zai chize I ne hemi ge tuâ gai bei de lei, zai aipau getumseipoine pat ti de lei,” ze kacheu de lei.

²⁵Zai ziemmena baudime penui sui-sui tew ze deuzietew ze bam di de lei, zai chize penui teureime ne teihenuitew ze bamrabe hangge Aaronbe ne penui je peipat kai bei de lei be Mosabe ngau di de lei,

²⁶chidadege tejeîbâm gu keriekemui ge Mosabe sap lu, zai pa ne sa ze, “Tingwang lam châu la lau? A dage wang lau,” kacheu de lei. Zai Lebibe name leine pe dage wang’ndui gai de lei.

²⁷Zai pa ne penui je, “Israelme Rapeu Tingwang ne aigum ze rang lei, ‘Ziemmena leine peize pe bia ge hiazutkie reupung le lau, zai keriekemui kat gene kêdabe keriekemui kakge tatpat tatgut ze tejeîbâm lung luî ge tat’nrui satket kai lau, zai ziemmena leine, pe sikina karai, pe kang karai, zai kat-kat kirei-kikangme je gîchat ra lei,’ ze acheu zeu” ze kacheu de lei.

²⁸Zai Mosabe ne ranggaibe luigum ze Lebi name ne tew gai de lei; zai chipau mai ge baudime ruagene ziemmena chang chum riâ hepum kâu di de lei.

²⁹Zai Mosabe ne sa ze, “Ningnui ’nteumena pe na-na benai pe sikina karai je tewchatlube gene, Tingwang guâ ’ngguarabe hangge ningnui runne ningnui je tew’ntip kai ’nde lei, chidezai nemai ge ningnui peireige pa ne ’nnam gai be ra hangge zeu,” ze kacheu de lei.

³⁰Bechaibe mai hechua ge Mosabe ne ziemmena baudime je, “Ningnui hemui tâ kedibe tew gai ’ndi de lei. Zai chunage Tingwang dage I hang ra de lei; ningnui gu hemui hangge I ne tewkuak kai le leu gu lei,” kacheu de lei.

³¹Chidadege Tingwang dage Mosabe helatwang dai ze acheu sa ze, “Hei aipau ziemmena ne hemui tâ kedibe tew gai ’ndi de lei; penui ne penui hangge gechâk ne hera ramme tew gai ’ndi de lei.

³²Kane chunage ning suiyi ze penui gu hemui lun gai lau—zai chi acheu makchai â nang ne rawgaibe leisikuak gene a ji ze lutua ’nde ra I kie lei,” kacheu de lei.

³³Kane Tingwang ne Mosabe je, “Mige a dage hemui tâ tewgaibe kau je a gu leisikuak gene pechu lutua gu lei.

³⁴Kane chunage â tatchu lau, I ne ningchu rangliagaibe bâm ’mbe ziemmename je nguatatchu lau; pie le lau, a gu tinggîm angel’mpeu ne ning suage tat ku lei. Acheuleusede, I ’ngkiâmiebe mai ge â penui peireige penui gu hemui bambe I ’ngkiâmie gu lei,” kacheu de lei.

³⁵Zai Tingwang ne ziemmename peireige herarît keteube lang gai bei de lei, Aaronbe ne getumseipoine tew gai ra penui ne tewgaibeibe ziegeneu.