Read Zeme Naga EKSODAS 33 Bible Online

EKSODAS 33 - Zeme Naga bible

EKSODAS 33

¹Tingwang ne Mosabe je, “Aipau bâm sâu ze, Abrahambe Isaakbe, zai Jakobbe je I ne hat kai ze, ‘Ning chaname je chige I pei gai gu lei,’ kacheube ram ’mbe nang benai nang ne Ijipram gene nguapatlume bau hang de zu lau.

²Zai tinggîm angel’mpeu je I ne ning sua ’mbe lang gai gu lei, zai Kanaanme, Amorme, Hethme, Perizme, Hibme, zai Jebusme je I ne guatua gu lei.

³Tungdui benai ’ngkuidui ne luaberam ’mbe hang zu lau; kane ningnui ruage I â hang ra mak lei, makchai â nang â hekuâpheumeube ziemmena zat changbe ziegene ’mpuîki ge I ne ningchu tew’ngga gai gu de lei,” kacheu de lei.

⁴Baudime ne aigum ze kesiabe rasam ramme seu lu dege â desui ze bam de lei; zai mî de pe gu pemîhungbe kakerube merua ramme pe pum ge kai ta di de lei.

⁵Tingwang ne Mosabe je rang gai ze, “Israelme je rang gai be lau, ‘Ningnui â hekuâpheumeube zat te lei; luakat runne leusede ning dage I nguatat ra dizai â I ne ningchu tew’ngga kam gai be leu gu de lei. Chidaze ning dage ’ndaikau tew gai ra mei be I chî le ra hangge ning dagene ning gu pemîhungbe kakerube puâ ramme luakpat ’ndu lau,’ acheu zeu,” ze kacheu de lei.

⁶Chipauziegene Horeb Loa (Sinai) gene seu ze Israelme penui pum gene pemîhungbe kakerube puâ ramme luaktua kam ’ndi de lei.

⁷Chunage Mosabe tejeîbâm ze hela ’mbe, tejeîbâm gene deutau ’mbe paîki liâm gai ka’nzie de lei; zai chipau paîki je kahedaube paîki ze pa ne ku de lei. Zai Tingwang dagene mâ-’mmêtneibe kau leine â tejeîbâm gene hela ’mbe bambe, kahedaube paîki (kakellumbe-paîki) ’mbe tat-tat te lei.

⁸Kakellumbe paîki ’mbe Mosabe tatpat ti tânege baudime sapchu ze, zai ziemmena ’nteumena pe ki kemui-mui gene Mosabe je pa paîki lung ’mbe gut temak tâne pechu pie bam ka’nsui lei.

⁹Paîki lung ’mbe Mosabe guttibe luage, kemâukang ne wangkeu ze paîki kemui ze sapkua ka’nzie de lei, zai Tingwang ne Mosabe je ’mpau ka’nsui de lei.

¹⁰Zai paîki kemui ge kemâukang bambe ziemmename leine ne ngaugap dezai, ziemmename leine zuachu ze pe ki kemui-mui gene kellum ka’nsui de lei.

¹¹Aigum ze Tingwang ne Mosabe je, ziemmena ne pe kangpeu je ka’mpaube gum ze, hejû ne hejû hedau ze ’mpau ka’nsui de lei. Tejeîbâm ’mbe Mosabe helatwangdaidibe luage, Nunbe na pe guâ ka’ngguapeu Joshuabe â kakellumbe-paîki gene rimna mak ze bam bam de lei.

¹²Mosabe ne Tingwang je, “Pie le lau, nang ne achu rang gai ze, ‘Aipau ziemmename je nguahang lau,’ kacheu de lei; kane a dage ngua’mpamtat ra hangge châu je nang lang gai ra mei be achu nang rang gai mak te lei. Sede nang ne rang ze, ‘Ning ji I chî’mmi lei, zai ning peireige I a suiyibe ngau de lei,’ kacheu de lei.

¹³Chidaze chunage ning dage I kie lei, a peireige ning suiyibe lazai â chunage ning ’mpuî ramme achu ranglia lau, chidezai ningchu I chî le ra zai nang luneibe I tewchi le ra hangge zeu. Aipau zatme ze â ning gu ziemmename lei be hang du ’nning gai lau,” kacheu de lei.

¹⁴Zai Tingwang ne kak ze, “I ne ning dage nguatat ku lei, zai I ne ningchu saukatemibe pei gu lei,” kacheu de lei.

¹⁵Zai Mosabe ne Tingwang je, “A dage nang nguatat mak ra zai â aigene anui je langtua gai se lau.

¹⁶Anui dage nang nguatat maktizai â I benai ning gu ziemmename peireige nang ning suiyi lei be ’ndaigum ze chî le ra lau? Nang ne anui je nguatatbe gene kedeirei ge ziemmename bamme leine gene I benai ning gu ziemmename â chamcheîbe kau zat chang gu de zeî lau,” ze kacheu de lei.

¹⁷Zai Tingwang ne Mosabe je, “Nang ne kiebe singbe ze I ne tew gai gu lei; ning peireige a suiyibe bam, zai ningchu I ne chika’mmibe ziegeneu,” ze kacheu de lei.

¹⁸Mosabe ne sa ze, “Ning dage I kie lei, ning ngeudibe achu teilia lau,” kacheu de lei.

¹⁹Zai Tingwang ne kak ze, “I keyibe leine ning suage tatpelapat ra I ne tew gai gu lei, zai ningchu a ji ‘Tingwang’ kacheube ze rang’nchi gai gu lei; zai I ne ngau’nggiarame je I ne ngau’nggia gai gu, zai I ne lunrame je I ne lun gai gu lei.

²⁰Kane a ju ze nang ngauchi lak lei; ziemmena ne achu ngau dizai â ring mak gu daseu,” kacheu de lei.

²¹Zai Tingwang ne rang ze, “Pie le lau, tingchukâng peireige nang saprabe hang a hiage pebâm lamui lei;

²²zai a ngeudibe tatpelapatbe luage tingchulimki ge ningchu I ne kai ’ndu lei, zai I ne tatpelatat temak tâne ningchu a ba ne kebachim ’ndu lei;

²³chipau châng dezai a ba letpat kai gu lei, a chai ’nnuktattibe nang ngau gu lei, kane a ju â ngau ra mak lei,” kacheu de lei.