Read Zeme Naga EKSODAS 36 Bible Online

EKSODAS 36 - Zeme Naga bible

EKSODAS 36

¹“Hera gu hekitewbe ge ’ndaigum ze tâ zat gechâm-châmbe tew ra mei ze tâtewchibe benai kaningchingbe Tingwang ne peigaibeime, Bezalelbe benai Oholiabbe zai ziemmena leine ne, Tingwang ne ranggai’ndibe leine luigum ze tew ra lei,” kacheu de lei.

²Zai Bezalelbe benai Oholiabbe zai tâtewchiduibe hangge pe lung ge Tingwang ne kaibeibe kau leine, chipau tâ tew ra wangrabe hangge pe lung ge ka’nchâbe kau leine je Mosabe ne kû gai de lei;

³zai Tingwang gu heki tewrabe hangge Israelme ne hesuiyibe kela peipatkaibe leine Mosabe dagene penui ngau de lei. Hechua ’nsangne penui ne Mosabe dage hesuiyibe kela teiwang ze bam rei de lei,

⁴chipauziegene penui tew ze bambe bâm ramme gene, Tingwang gu heki ge tâ zat gechâm-châmbe tew ze bamme tâtewchime leine wang de lei,

⁵zai penui ne Mosabe je, “Tingwang ne anui je tew ra ranggaibe tâ tewbe hangge baudime ne ka’nnangbe suadu kie ze teiwang de lei,” kacheu de lei.

⁶Chidadege Mosabe ne samde pei gai de lei, zai tejeîbâm luî ge chipau sam ze rangba gai ze, “Tingwang gu heki hangge peipatbe tâ ze ’mpeumi du zai ’mpuimi du peize tewsuâ ta lau,” kacheu de lei. Chigum ze teiwangrabe gene baudime je tew’nsau ’ndi de lei;

⁷tâtewrabe leine hangge penui dage merua bambe zene bui di, zai mêkeu bam di dadegeu.

⁸Zai liambepaî kereu zene tâtewme ruage tewbuibe ziemmename ne kakellumbe-paîki tew gai de lei. Chipau liambe-paî ramme ze â ’nneulube banutlangkie yibe zai ka’nzaibe benai gieremangbe zai tologie ramme zene kerubme luî tewzunlube ne tew gai de lei.

⁹Liambe-paî kat gu petâ ze â sâu ’ngkai ze desat, zai pedit ze â sâu medai lei; liambe-paî leine chipau riâ kam lei.

¹⁰Zai liambe-paî mengeu ze pa ne ’ntukhelua gai de lei, zai kêdabe paî mengeu ze du pa ne ’ntukhelua gai de lei.

¹¹Zai pa ne paî kat heruiheluagaibe ge peritûn ge ka’nzaibe paî ne heriakigua ramme tew gai de lei; zai chigum ze kêdabe paî heruiheluagaibe ge du peritûn ge heriakigua ramme put kai de lei;

¹²pa ne heriakigua ramme paî kat kung ge rengeu tew gai lei, zai pakenabe paî kung ge du heriakigua ramme rengeu tew gai lei; chipau bekiputbe ze paî na lam gu kak kat je teida gai lei.

¹³Zai paî kat ne chipau kakellumbeki ze liâmtuipik le ra hangge gechâk ne peguak ramme rengeu pa ne tew gai lu ze chize ne paî kat ne kêdabe paî ze zuhelua gai lei.

¹⁴Kakellumbe paîki peireige kup kai ra hangge kemei geûpaî pa ne tew gai de lei; pa ne chi paî ramme ze kereu ze kat tew gai lei.

¹⁵Paî kat hangge petâ sâu himreu zai pedit hangge sâu medai-dai tew gai lei; chi paî kereu ze kat ze pedit-petâ riâ kat tew gai lei.

¹⁶Pa ne paî mengeu ze kat hangge heruihelua gai de lei, zai kêdabe seruk ze paî kat hangge heruihelua gai de lei.

¹⁷Zai pa ne paî heruiheluagaibe nâlangbe tûn ge hezun-gaibeki ramme rengeu put kai de lei, zai kêdabe paî ge du bekung hezun-gaibeki ramme rengeu bam de lei.

¹⁸Zai pa ne ’mpûmlim kat hangge chang le ra hangge heruihelualube paî kena ze kangngâgeî ne peguak ramme rengeu tew lu ze hezun-gaibeki ramme gene guakherua gai de lei.

¹⁹Zai pa ne paîki liâmrabe hangge meli’nsei gei naichiê ne pukî-gierialube ramme benai kemei-gei ramme ne tew gai de lei.

²⁰Zai pa ne akasia ching ne paîki-’ngra hangge ’nrangchu gai lei.

²¹Bechia ze petâ sâu kereu zai pedit ge sâu kat ze bepi lei.

²²Pa’ngra kat-kat ge pediang kena-na bam de lei, tei’ntukkamrabe hangge zeu; kakellumbe-paîki gu pa’ngra ramme leine hangge aize pa ne tew gai de lei.

²³Kakellumbe paîki hangge bechia ramme aigum ze teleu gai de lei; tingpî ’mbia hangge bechia ’ngkai sum gai de lei.

²⁴Bechia ’ngkai pî ge bechia ’nsangne gu pediang kena bambe hangge gepût ne tewbe kechia dungrabe ramme hedai pa ne teleu gai de lei, zai kêdabe chia ramme ze du chigum ze tew gai de lei.

²⁵Zai kakellumbe-paîki katlam ’mbia tingpî ’mbia hangge bechia ’ngkai pa ne tew gai de lei,

²⁶zai bechia ’nsangne ge kena-na kairabe hangge gepût ne tewlube gechia dungrabe kuiki hedai tew gai de lei.

²⁷Kakellumbe paîki chai ’mbia naimikkeu ’mbia hangge bechia seruk pa ne tew gai de lei.

²⁸Zai kakellumbe-paîki bechai ’mbia ge pemikchia kena pa ne tew gai de lei.

²⁹Heki mik ge bechia ramme bambe ze bepî ’mbe tewhelua gai de lei, bepeirei ’mbe â pegua ramme zene guak kai de lei, chipau luigum ze pemik kena lam ge kena ze pa ne tew gai de lei.

³⁰Chize pelane bechia desat lei, chige gechia dungbe kuiki gepût ne tewbe du kereu ze seruk bam lei, bechia kat ge kena zai kêdabe ge du kena zeu.

³¹Zai akasia ching ne bechâp ramme hangge pa ne tew gai de lei, kakellumbe-paîki kat lam ’mbia hangge mengeu,

³²zai kakellumbe-paîki kêdabe lam ’mbia gu bechia hangge du bechâp mengeu, zai kakellumbe-paîki naimikpat ’mbia kichai ’ndang gu bechia ramme hangge du bechâp mengeu kai de lei.

³³Zai sûngngang ’nreibe, bechia pa’mpi riâ ge bambe bechâp ze â katlam ’mbia gene kêdabe lam ’mbia gu riâ chang ze pa ne teipelapat chang gai de lei.

³⁴Bechia ramme ze gechâk ne pa kûm gai de lei, zai bechâp ramme guakgimrabe hangge bechia ramme ge gechâk gua ramme tewgua gai de lei, zai bechâp ramme ze gechâk ne pa kûm gai de lei.

³⁵Zai lîmnambe paî hangge ka’nzaibe benai gieremangbe zai tologie zai banut paî gu kelangkie ’nneuzunlube ne pa tew gai de lei; chige kerubme luî reming ze tew gai de lei.

³⁶Zai chipau hangge gechâk ne kûmlube akasia chia medai pa ne tew gai de lei; chize peguak ramme â gechâk ne kateleu lei, zai pa ne chiramme hangge gepût ne tewlube gechia dungbe kuiki medai kai de lei.

³⁷Zai ’ngngim ne heziak tewlube ka’nzaibe zai gieremangbe zai tologie zai banutlangkie ’nneulube ne dakzunlube zene paîki gu kemuiki paî hangge pa ne tew gai de lei;

³⁸zai bechia ramme ge peguak ramme mengeu kai ze pa ne tew gai de lei. Gechia peî ramme benai paichiekang ramme ze pa ne gechâk ne kûm gai de lei, kane bechia dungbe kuiki mengeu ze â kangngâgeî ne kûm gai de lei.