Read Zeme Naga EKSODAS 37 Bible Online

EKSODAS 37 - Zeme Naga bible

EKSODAS 37

¹Bezalelbe ne akasia ching ne hingdebung tew gai de lei; petâ hangge sâu na ze bepi riâ zai pedit hangge sâu kat ze bepi riâ zai pehut hangge sâu kat ze bepi riâ zeu.

²Zai pa ne chize gechâk ’nchichiakbe ne pelung ge benai hela ge kûm gai de lei, zai gechâk ne bekunghia kûmhiâ gai de lei.

³Zai gechâk ne tewlube heriagua medai tew lu ze bepî medai ge, gua na ze kat lam’mbia hang, zai gua na ze kêda ’mbia hang kai de lei.

⁴Akasia ching ne puabe cha hangge pa tew gai de lei, zai gechâk ne chize kûmtui gai lei,

⁵zai puarabe hangge penui ne becha ramme ze pebung hiage gechâk riagua bambe lungge kerigut kai de lei.

⁶Zai gechâk ka’nchibe ne ka’nggiabe bâmra pa tew gai de lei; petâ ze sâu kat ze bepi lei, zai pedit ze sâu kat ze bepi lei.

⁷Zai gechâk ka’nchibe ne kerub kena luî hang pa tew gai de lei, ka’nggiabe bâmra tû kena ge chipau kena ze tew gai de lei,

⁸tû kat lam’mbia ge kerub kat tew gai, zai kêdabe tû kat lam’mbia ge kerub kat tew gai zeu.

⁹Kerub kena zene bepeirei ge penai kan liâmpat ze ka’nggiabe bâmra ze lîmsung gai de lei, penai ju ze kat-kat lam’mbia ’nsua lu zeu; kerub kena ju ze ka’nggiabe bâmra ’mbia piezua lei.

¹⁰Akasia ching ne tewbe kai ra du pa ne tew gai de lei; petâ hangge sâu na pedit hangge sâu kat, zai pehut hangge sâu kat ze bepi zeu;

¹¹zai chize gechâk ’nchichiakbe ne pa kûm gai ze gechâk ne pelung kûmguâ gai de lei.

¹²Zai chize sâu kat riâ bekung tewgua gai lei, zai gechâk ne bekung kûmguâ gai lei.

¹³Zai chipau kaira hangge gechâk riagua medai tew lu pemik pî medai ge kai de lei.

¹⁴Bechâp ne chipau kaira puarabe kerigairabe bâm hangge bekung tewgaibe hiage gechâk riagua ramme bam de lei.

¹⁵Akasia ching ne bechâp ramme hangge tew de lei, zai chize gechâk ne kûm gai lei, zai chipau châp ramme ne chipau kaira ze pua de lei.

¹⁶Zai perîmyibe ’ntaurabe hang hekuak poine benai hekuak ramme, zai wain ruîkeugairabe hangge hepiak benai mâkuakpoine ramme pa tew gai de lei.

¹⁷Gechâk ’nchichiakbe ne tewbe kachâbung-kaira pa tew gai de lei. Bepî benai bechia ze gechâk ne heki gai lei, mâpâ ne bepuâ tewbe pengûmne benai pepâkua ramme ze chige kûmgit kai lei.

¹⁸Pebia-bia ge bekeî seruk getuapat lei, kat lam’mbia kechum-chum zeu, chipau kat lam’mbia gu gene hemibung-kaira gu bekeî kechum zai kêda ’mbia gu gene hemibung-kaira gu bekeî kechum zeu.

¹⁹Pekeî ’nsangne ge almond pâ luigumbe pâ chum-chum, pengûmne benai pepâkua luigumbe tew gai lei.

²⁰Kachâbung-kaira chia ge â almond pâ luigumbe pepâ-ngûmne benai pepâkua ramme bambe medai tew gai lei.

²¹Pekeî ’nsangne kangge mâpâ-ngûmne kat-kat bam lei.

²²Mâpâ-ngûmne ramme bekeî ramme, zai kachâbung-kaira ze pelane dâng kat gechâk ’nchichiakbe ne hekihelua gai de lei.

²³Zai pa ne chipau gu hemibung sena benai kachâ paîrie chiapbe tegîne, zai ka’ngkingbe kuak ramme ze gechâk ka’nchibe ne pa ne tew gai de lei.

²⁴Zai pa ne gechâk ka’nchibe hit himreu ne chipau ze tew gai de lei.

²⁵Mâ-perîmyibe rûgairabe hangge herâtewbe-kaira pa tew gai de lei; akasia ching ne chize pa tew gai de lei, petâ hangge sâu kat zai pedit hangge sâu kat zeu; chize pedit benai petâ ’nsamrap ze, zai pehut ze sâu na na tew gai de lei, bekeî ramme chige tewhelua gai de lei.

²⁶Zai bepeirei benai pehia dangguabe ramme benai bekeî ramme gechâk ka’nchibe ne pa kûm gai de lei; zai gechâk ne bekunghia pa kûmguâ gai de lei.

²⁷Zai chipau hangge gechâk ne tewbe riagua kena pa tew gai de lei; bepeirei ’mbia bekung kûmgaibe kangge kena lam’mbia kena-na pa tew gai de lei, zai chipau gua ramme zene puarabe chingkang ramme ruagaibe hang chang de lei.

²⁸Akasia ching ne puabe chingkang pa tew gai lu, zai chige gechâk ne kûm gai de lei.

²⁹Zai mâ-perîmyibe tewme ne kaikakebutbe gum ze airamme gene suanggaibe taudui ka’nchibe hangge pa tew gai de lei; aize ne tew’ntipkaibe ’nnukkaibe taudui ka’nchibe chang de lei.