Read Zeme Naga EKSODAS 38 Bible Online

EKSODAS 38 - Zeme Naga bible

EKSODAS 38

¹Pa ne rûkambe-râtewbe hang akasia ching ne herâtewbe-kaira teleu gai de lei, chize petâ benai pedit ze sâu mengeu lei; chi herâtewbe-kaira ze pedit-petâ ’nsamrap ze tew gai lei, zai pehut ze â sâu chum lei.

²Zai chi pemik medai ge bekie ramme pa tew gai de lei; chi bekie ramme ze herâtewbe-kaira ge tewhelua gai lei, zai chize kangngâgeî ne pa kûm gai lei.

³Zai herâtewbe gu heli kerua ramme, heli ramme, zai mâ-tuakbe ’ngkualipi ramme mâkuak ramme, zai hegeîrang ramme, zai hemikuak ramme pa ne tewgaibe ramme ze: heli kerua ramme leine ze pa ne kangngâgeî ne tew gai lei.

⁴Dadege kangngâgeî ne perak hangge pa ne teleu gai de lei, zai chize herâtewbe-kaira tû kangge kai gai de lei, chidezai chi perak ze herâtewbe-kaira pa’mpi riâ ge ’nrakhangchang le ra hangge zeu.

⁵Kangngâgeî ne chipau ra hang tewbe pemik medai ge râchapuabe kang hang kaigimrabe hangge mâ-gua medai pa ne kai gai de lei;

⁶râchapuabe kang ze pa ne akasia ching ne teleu gai de lei, zai chige kangngâgeî ne kûm gai de lei.

⁷Zai chiramme pua ra pemik mik medai ge mâ-gua ramme lungge chi bekang ze pa ne keripela gai de lei; chize pa ne bepakpi ramme ne kûm ze pebung hang tewpat kai de lei.

⁸Dadege ka’nduibe-paîki kemui ge ’mpuimi tâka’ngguame gu judageî ramme bambe gene pa ne kangngâgeî gu heduikuak benai kangngâgeî ne tewbe bepî ze tew gai de lei.

⁹Zai pa ne hetiampaîki tew gai de lei, tingpî ’mbia hangge sâu haî kat, banutlangkie ’nneulube ne kakellumbe-paîki gu paîlîmbe hang tew gai de lei;

¹⁰kechia ’ngkai zai bechia dungrabe kuiki ramme ze du ’ngkai kangngâgeî ne tew gai de lei, kane kechia ramme gu peguak ramme benai bepeirei gu paichiekang ramme ze â gepût ne tew gai de lei.

¹¹Chipau luigum ze tingpeî ’mbia hangge sâu haî kat, kechia ramme ’ngkai zai dungrabe kuiki du ’ngkai kangngâgeî ne tew gai de lei, kane kechia ramme gu peguak ramme bepeirei gu paichiekang ramme ze â gepût ne tew gai de lei.

¹²Zai naimikkeu ’mbia ge pedit hangge â sâu rengeu lîm gai de lei, chige kechia kereu benai dungrabe bekuiki kereu bam de lei.

¹³Kiziêsua ’mbia naimikpat ’mbia ge pedit ze sâu rengeu lei.

¹⁴Kemuiki gene kat lam’mbia ge sâu kereu ze mengeu lîmnam gai de lei, zai chige kechia kechum benai dungrabe kuiki kechum kai de lei.

¹⁵Kêda ’mbia ge du sâu kereu ze mengeu lîmnam gai de lei, chige kechia kechum benai dungrabe kuiki kechum kai de lei.

¹⁶Rieguabe gu kemuiki lîmnambe paî ze petâ sâu ’ngkai lei, chize ka’nzaibe, gieremangbe, zai tologie, ze banutlangkie ’nneuzunlube ne dak lu ze ’ngngim ne heziak tewzunlube ne tew de lei; chige kechia medai benai dungrabe kuiki medai bam de lei.

¹⁷Rieguabe kechia ramme leine gepût ne tewbe paichiekang ramme ne ’ntukguâ gai de lei; pegua ramme ze du gepût ne tewbe ’nnia lei, zai kechia dungrabe kuiki ramme ze kangngâgeî ne tew gai de lei.

¹⁸Rieguabe lung gu kemuiki paî ze banutlangkie yibe benai ka’nzaibe tologie benai gieremangbe ne tew gai lei. Chi paî ge heziak ramme tew gai lei. Zai chipau paî ze petâ ge sâu ’ngkai zai pehut ze sâu mengeu lei, zai chi rieguabe ze pehut â ’nzuâ kam lei.

¹⁹Chipau paî ze bechia kangngâgeî ne tewbe medai benai bekuiki medai kai ze chakgîng lei; zai chi bechia ramme ge guakbe ze gepût ne tew lei, zai kechia ramme peî ge gepût ne kûm gai lei, zai paichiekang ze du gepût ne tew lei.

²⁰Zai kakellumbe-paîki gu heria chakbe ’ntung ramme benai rieguabe heria chakbe ’ntung ramme leine ze kangngâgeî ne tew gai de lei.

²¹Aize kakellumbe-paîki hingdebung kaibe paîki ge kerua pemîhungbe ramme teibe riak te lei, tingkupeu Aaronbe na Ithamarbe ne geteiliabe kang gene Lebime tâtewrabe hang Mosabe gu hingde gene teleupatkaibe luigum zeu.

²²Juda kiria gene Hurbe chapeu, Uribe na Bezalelbe ne Tingwang ne Mosabe dage diegaibe ramme leine teleu gai de lei;

²³zai pe dage mâ-chiamchipeu, peluiyi ra reming ze tewchipeu zai ka’nzaibe, gieremangbe zai tologie, zai banutlangkie ne ’nneuzunlube ne dakbe paî ge litok tewchipeu, Danbe kiria gene Ahisamakbe na Oholiabbe bam lei.

²⁴Ka’nchibe hetiampaîki hangge gechâk peipatkaibe pelane ge kakellumbeki ge teibe mâ-ka’ndeube riâ gene pehit haî kat lei.

²⁵Gepût ze pebaume gu ’mpuâhâ gene meiwangbe ze kakellumbeki ge mâ-ka’ndeube riâ gene pehit chang chum ze haî medai ze himreu lei.

²⁶Aige ngaube riak ze kakellumbeki gu mâ-ka’ndeube sie gene hepiaurawbe ge heji bamdime, ’nteumena peiwangbe riak benai ’nzuâ lei. Hepiaurawbe ge heji guttime ziemmena kum ’ngkai benai bepeirei kau ze chang haî seruk ze kechum ze haî mengeu ze rengeu lei.

²⁷Gepût pehit chang chum ze haî medai zene ka’nchibe hetiampaîki benai paîlîmsungbe hang kechia dungbe kuiki ramme hangge tew gai de lei, kechia dungrabe kuiki hangge tewgaibe kat ge gepût pehit himreu ze medai gut ti de lei.

²⁸Gepût pehit himreu ’nsakpatbe zene Bezalelbe ne bechia kang ramme bechia gu peguak ramme, zai kechia peî ramme hangge kateleu de lei.

²⁹Tingwang hang kangagei peipatkai’ndibe ze pehit chang na ze haî mengeu ze ’ngkai ze mengeu lei.

³⁰Chize ne pa ne Tingwang bambe paîki ge gutbe kemui hang bechia pî dungrabe kuiki ramme, kangngâgeî ne tewbe kangngâgeî gu herâtewbe-kaira benai pera hang tewbe herâtewbe hangge ka’ngngâbe kerua zat leine hang,

³¹perie rieguabe gu bechia dungbe kuiki ramme hang, zai paîki benai perie rieguabe lungge paîgingbe ria gu pa’ntung ramme hangge tew gai de lei.