Read Zeme Naga EKSODAS 39 Bible Online

EKSODAS 39 - Zeme Naga bible

EKSODAS 39

¹Dadege pebâm ka’nchibe ge tâ’ngguarabe hangge ka’nzaibe benai gieremangbe zai tologie ’nneulube zene penui ne tingku puâ hangge teleuzun gai de lei; penui ne Aaronbe hangge hepuâni ka’nchibe teleu gai de lei; Tingwang ne Mosabe je diegaibe luigum zeu.

²Zai pa ne gechâk, ka’nzaibe benai gieremangbe zai tologie merua ramme, zai linenlangria ’nneulube ne ephod teleu gai de lei.

³Zai penui ne gechâk niakhepeurî-patlube heria hangge tew’nchiâm lu ze ka’nzaibe benai gieremangbe zai tologie zai linen langkie ’nneulube ge reming ze tewherua gai de lei.

⁴Mechua-leipak hang kena teleu lu ze ephod mechua gu mi keîtoa kena chui ge heruihelua gai de lei.

⁵Zai mechua kak’ntiprabe reu hangge reming ze dakzun-gaibe ze gechâk benai ka’nzaibe, gieremangbe zai tologie zai banut langkie ’nneulube ne teleu gai de lei; Tingwang ne Mosabe je samdiegaibe luigum zeu.

⁶Oniks chu kena teleugailube ze gechâk ne pepuâ tewzunlube lungge chize ling gai de lei, zai Israelbe name ji leine baroine ge ling gai gum ze ling gai de lei.

⁷Pa ne chiramme ze ephod gu mi keîtoa ge ka’nchiebe ge Israelbe name ji chibamrabe chu kena hangge chi tingchukâng kena ze kai de lei. Tingwang ne Mosabe dage samdiegaibe luigum zeu.

⁸Tewremingzunlube gene gechâk, ka’nzaibe, gieremangbe zai tologie lang zai banut langkie ’nneulube ne ephod hangge teleugaibe luigum ze pa ne mi gapuâ teleu gai de lei.

⁹Chize pedit-petâ ’nsamrap ze tew gai de lei; mi gapuâ ze kena tewdesua gai lei, kena desua gai dege petâ ge benai pedit ge tingkeu kat-kat lei.

¹⁰Chige tingchu ’nria medai penui kai de lei. Keraîbe ’nria ge sardias chu, topaz chu, zai karbiunklel chu bam de lei.

¹¹Zai pakenabe ’nria ge, Emerald chu, sapphir chu zai diamond chu bam de lei;

¹²zai pakechumbe ’nria ge, jasinth chu, agat chu, zai amethist chu bam de lei;

¹³zai pamedaibe ’nria ge, beril chu, oniks chu zai jaspar chu bam de lei; chiramme ze gechâk pepuâ teleuzunlube ge ling gai de lei.

¹⁴Israel name ji pesin-perin ze rawgailube tingchu kereu ze kena chige bam de lei; chiramme ze baroine ge gum ze tingchu ’nsangne ge hangkat-katne ji raw gai ze Israelme zat kereu ze kena ji raw gai de lei.

¹⁵Zai gechâk ’nchichiakbe ne kitlube zene heria gum ze mi gapuâ hangge tew gai de lei.

¹⁶Zai gechâk ne bepuâ teleuzunlube kena benai gechâk riagua kena penui ne tew gai de lei, zai heriagua kena ze mi gapuâ mik na lam ge kai de lei;

¹⁷zai gechâk ria kena ze mi gapuâ ge mik na lam gechâk riagua kena bambe ge penui ne za gai de lei.

¹⁸Peria kena leitûn ze bepuâtewbe-ritûn kena ge ’ntuk’mpam gai de lei; aigum ze ephod gu mi gapuâ mechua hela ’mbia ge chize tew’mpam gai de lei.

¹⁹Dadege penui ne gechâk riagua kena tew gai de lei, zai chize mi gapuâ mechuatûn kena ge, ephod chaige pelung ge bambe leitûn ge kai de lei.

²⁰Zai gechâk riagua kena penui ne tew gai de lei, zai ephod gu heziak tewzunlube ne daklube kiakâk kakhelakkaibe peireige, ephod gu mi gapuâ kena ’ngkang ’mbia ge chibe kena kai de lei.

²¹Zai ka’nzaibe peritûn ge ephod gu heriagua ze mi gapuâ gu heriagua ramme zene penui ’ntuk kai de lei, dadege chize ephod gu dakzunlube kiakâk peireige bam di de lei; zai chi ephod gene chi mi gapuâ ze heluihiak ze pat lak ti de lei; Tingwang ne Mosabe je samdiegaibe luigum zeu.

²²Chidadege ephod gu mechuatiebe ze ka’nzaibe ’nnia ne pa tew gai de lei;

²³zai chipau mechua ze peize hakmakrabe hangge mechua ge putkaibe ge gum ze mi guangkiputbe kung ge paîdip hezun-guâ gai lu ze mi guangki hangge put kai de lei.

²⁴Mechuatûn ge ka’nzaibe benai gieremangbe zai tologielang ne, zai linen langkie ’nneulube ne turiechî luî tew gai de lei.

²⁵Kiakâk ka’nchibe ramme ze du penui ne teleu gai de lei, zai mechuatûn ge turiechî luî tewbe ramme kakge kakezitbe ’ntoî ramme kakcheiguâling gai de lei;

²⁶’ntoî kat benai turiechî ramme, ’ntoî benai turiechî ze tâka’ngguabe gu mechua-leitûn ge kakcheiguâling gai de lei, Tingwang ne Mosabe je samdiegaibe luigum zeu.

²⁷Penui ne linen langkie ne dak lu ze Aaronbe benai pe name hang mechuapui ramme hang du teleu gai de lei,

²⁸zai linenlangkie yibe ne hepeî’nggau, peichûp ramme, zai pelungtelong ramme linen langkie yibe ’nneulube ne teleu gai de lei,

²⁹zai linen langkie yibe ’nneulube benai ka’nzaibe, gieremangbe, tologie ramme ne litok tewlube kiakâk hang teleu gai de lei; Tingwang ne Mosabe je samdiegaibe luigum zeu.

³⁰Zai gechâk ’nchichiakbe ne kraun peichûp ruabe zat penui ne teleu gai de lei, zai chige, “Tingwang dage ka’nchibe” kacheube sam ze baroine ge ling gai gum ze ling gai de lei.

³¹Dadege ’nrei ’mbe hepeî’nggau ge ka’nzaibe ria ne penui ne kak’ntip kai de lei; Tingwang ne Mosabe je samdiegaibe luigum zeu.

³²Chigum ze kakellumbe-paîki gu hetiamki gu tâ ramme leine tewkam’nchichiak kai de lei; zai Tingwang ne Mosabe je samdiegaibe luigum ze Israelme ne tew gai de lei; chigum ze penui ne tew gai de lei.

³³Zai kakellumbe-paîki benai hetiamki ge teibe helikerua ramme peguak ramme benai pa’ngra ramme, bechâp ramme, bechia ramme, bekuiki dungbe ramme;

³⁴meli’nsei gei tewkîgierialube, bielangbe ge lîmnambe paî;

³⁵samdiebung, chige mâ-puabe chingkang benai ka’nggiabe bâmra bambe;

³⁶kela teiwangbe kaibe kaira zai chige chipau kaira gu merua leine zai Tingwang hangge peigaibe tingku;

³⁷gechâk ka’nchibe ne tewbe hemibung-kaira ramme, zai chige kachâbung ka’ntaube merua ramme benai chige teibe helikerua ramme, zai bapatrabe hang ’ntaurabe taudui;

³⁸gechâk ne tewbe herâtewbe-kaira, suanggaibe taudui benai mâ-perîmyibe ka’ntaube, zai hetiamki kemui ge lîmbe-paî;

³⁹kangngâgeî ne tewbe herâtewbe-kaira zai chige puabe rak kangngâgeî ne tewbe benai chize puabe chingkang ramme, zai chipau gu helikerua ramme, heduikuak benai pahereigua

⁴⁰rieguabe ge lîmbe-paî ramme, bechia ramme benai bekuiki ramme, rieguabe gu kemuiki hangge lîmnambe paî, chige gingbe ria ramme, zai chige heriachakbe ’ntung ramme; kakellumbe-paîki ge tâtewbe hangge helikerua teibe zat leine;

⁴¹ka’nchibe bâm ge ’ngguarabe hangge heziak tewzunlube puâ ramme, tingkupeu, Aaronbe hangge ka’nchibe puâ ramme, pe name tingku chang ze ’ngguarabe hangge penui puâ ramme ze penui ne Mosabe dage teiwang gai de lei.

⁴²Tingwang ne Mosabe je samdiegaibe zat leine ze Israelme ne tew kam gai bei de lei.

⁴³Zai tâtewgaibe leine Mosabe ngau de lei, zai pie le lau, Tingwang ne diegaibe luigum ze penui ne tew gai bei de lei; chize penui ne tew gai bei de lei. Dadege Mosabe ne penui je ’nnam gai bei de lei.