Read Zeme Naga EKSODAS 40 Bible Online

EKSODAS 40 - Zeme Naga bible

EKSODAS 40

¹Tingwang ne Mosabe je rang gai ze,

²“Railangbe kêu gu naimikpui raîlangbe ge kakellumbe-paîki ze nang tew’nsap kai ra lei.

³Zai nang ne chige samhatkaibe gu hingdebung kai ra lei, zai chipau hingdebung ze lîmnambe paî ne nang bienam gai ra lei.

⁴Zai kela peipatbe kaibe kaira chige nang teigut kai ra lei, zai pebâm-bâm ge reheîzun gai ra lei; zai kachâ-kaira nang teigut kai ra lei, zai kachâbung ramme teichu ze kai ra lei.

⁵Zai samhatkaibe hingdebung suage gechâk ne tewbe mâ-perîmyibe rube-kaira nang kai ra lei, zai kakellumbe-paîki kemuiki hangge lîmnambe paî nang kai ra lei.

⁶Kakellumbe-paîki gu kemuiki suage rûkambe herâtewbe-kaira nang kai ra lei,

⁷zai kakellumbe-paîki benai herâtewbe-kaira kakge heduikuak kai lu ze chige nang hedui kai ra lei.

⁸Zai nang ne chipau bâm pung ze lîamguatuipik kai ra lei, zai chi rieguabe kemuiki hangge lîmnambe paî lîm gai ra lei.

⁹Zai suanggaibe taudui nang tei ra lei, zai kakellumbe-paîki benai pelung ge bambe leine ge ’nnuk kai ra lei, zai chipau ki benai pamerua leine ze diepat’nchi gai ra lei; dezai chize ka’nchibe chang gu lei.

¹⁰Rûkambe-râtewbe-kaira benai chige teibe merua ramme leine ge nang ’nnuk kai ra lei, zai herâtewbe-kaira ze nang tew’nchi gai ra lei; zai herâtewbe-kaira ze ’nchilangbe chang ra lei.

¹¹Heduikuak benai pahereigua ze du nang ’nnuk kai ra lei, zai tew’nchi gai ra lei.

¹²Chidezai Aaronbe benai pe name je kakellumbe-paîki kemuiki ge nang nguawang gai ra lei, zai hedui ne penui je hui ra lei,

¹³zai ka’nchibe puâ ramme ze Aaronbe pum ge luak kai be lau, zai pechu nang ’nnuk kai ze tew’nchi gai ra lei, chidezai tingkupeu chang ze pa a guâ ’ngguachi le ra hangge zeu.

¹⁴Pe name je du nang nguawang ze penui pum ge mechuapui ramme luak kai ra lei,

¹⁵zai penui peu je nang ’nnukkai’ndibe gum ze penui je ’nnuk kai be lau, chidezai tingkume chang ze penui a guâ ’ngguachi le ra hangge zeu; zai penui je ’nnukkaibe zene penui gu rehei ramme leine ge betingbeta tingku tâ tewrabe hangge penui je teigutkaibe chang ra de lei,” kacheu de lei.

¹⁶Chipau luigum ze Mosabe ne tew gai de lei; Tingwang ne pechu ranggaibe luigum ze pa tew de lei.

¹⁷Zai hekêu gu naimikpui raîlangbe ge, pakenabe kum gu raîlangbe kêu ge, kakellumbe-paîki ze teichu gai de lei.

¹⁸Mosabe ne kakellumbe-paîki ze tew’nsapchu gai de lei; pa ne kechia pîkam ramme kai de lei, zai pa’ngra ramme teichu gai de lei, zai chingkang ramme la gai de lei, zai bechia ramme teichu gai lei;

¹⁹zai pa ne kakellumbe-paîki peireige paî lim gai de lei, zai chipau peireige paîki ’mpûm ge kupsuâgaibe-paî ze pa ne kai de lei, Tingwang ne Mosabe je ranggaibe luigum zeu.

²⁰Zai pa ne samhatkaibe hingde ze tei lu pebung lungge kai ’ndi de lei, zai chipau bung ge chingkang ramme kai de lei, zai hingdebung peireige ka’nggiabe bâmra kai bei de lei.

²¹Zai pa ne hingdebung ze kakellumbe-paîki lung ’mbe teigut kai de lei, zai bielangbe lîmnambe paî pa ne kegâuchu gai de lei, zai samhatkaibe hingdebung ze lîmsung gai de lei; Tingwang ne Mosabe je ranggaibe luigum zeu.

²²Zai kakellumbe-paîkilung ge, tingpeî ’mbia lîmnambe hela ge kelapeipatbe kaira pa ne kai de lei,

²³zai chipau kaira peireige Tingwang masuage tingku kai’ntiaria gai bei de lei; Tingwang ne Mosabe je ranggaibe luigum zeu.

²⁴Zai pa ne kachâ-kaira ze kakellumbe-paîki ge kela peipatbe kaibe-kaira gene kêda ’mbia ge, kakellumbe-paîki gu tingpî ’mbia ge kai bei de lei,

²⁵zai Tingwang suage kachâbung ramme teichu ze ’ntau gai de lei; Tingwang ne Mosabe je ranggaibe luigum zeu.

²⁶Zai kakellumbe-paîki ge lîmnambe suage gechâk ne tewbe herâtewbe-kaira pa ne kai bei de lei,

²⁷zai mâ-perîmyibe ramme chipau peireige ’ntau gai de lei; Tingwang ne Mosabe je ranggai’ndibe luigum zeu.

²⁸Zai kakellumbe-paîki kemui hangge lîmnambe paî pa ne kai bei de lei.

²⁹Zai pa ne kakellumbe-paîki kemui ge rûkambe-râtewbe-kaira kai de lei, zai chipau kaira peireige rûkambe-râtewbe benai mâ-himlei kela peipatbe-râtewbe pei gai de lei; Tingwang ne Mosabe je ranggai’ndibe luigum zeu.

³⁰Zai pa ne kakellumbe-paîki benai herâtewbe-kaira kakge heduikuak kai de lei, zai huirabe hangge chige hedui kai de lei,

³¹chigene Mosabe benai Aaronbe zai pe name penui pî-ba hui de lei;

³²kakellumbe-paîki ge penui gutbe lua zai herâtewbe-kaira hiage penui wangbe luage penui hui de lei; Tingwang ne Mosabe je ranggai’ndibe luigum zeu.

³³Zai pa ne kakellumbe-paîki benai herâtewbe-kaira ze bieguâ gai de lei, zai chi rieguabe gu kemuiki ge lîmnambe paî kai de lei, chigum ze Mosabe ne tew kam gai de lei.

³⁴Chidadege kakellumbe-paîki ze kemua ne chûm ’ndi de lei, zai Tingwang ngeudibe ne kakellumbe-paîki ze puigit ti de lei.

³⁵Zai Mosabe â kakellumbe-paîki ge gutchi ta di de lei, chipau bâm peireige kemua ne chûmgit’ndibe ziegene, zai Tingwang ngeudibe ne kakellumbe-paîki ze puigittibe ziegeneu.

³⁶Penui tebeîtew ze bambe ting tâluî ge, kakellumbe-paîki peirei gene kemua ze teichu’ndibe luage, Israelme tebeîtew-’nduâtat te lei;

³⁷kane kemua ze teichu mak ze bam zai â teichugaibe mai chang mak tâne tebeîtew-’nduâtat mak te lei.

³⁸Penui tebeîtewtat bambe ting tâluî Israelme kibau leine mikngau ge ’nrîmbeting ge Tingwang gu kemua ze kakellumbe-paîki peireige bam, zai tingmuî ge â chige hemi bam bam de lei.