Read Zeme Naga EKSODAS 5 Bible Online

EKSODAS 5 - Zeme Naga bible

EKSODAS 5

¹Chipau châng dege Mosabe benai Aaronbe Pharaobe dage tat ze acheu sa ze, “Tingwang, Israelme Rapeu ne acheu sa lei, ‘A gu ziemmename je peize tatchu lau, dezai hênamkang ge a hangge penui kahengîbe reibam ra hangge zeu,’ ze acheu zeu,” ze kacheu de lei.

²Kane Pharaobe ne, “Tingwang ze châu lau, dezai ning kuâ I ’ngking gai lu ze Israelme je I ’mpat kai ra hangge zeu? Tingwang je I â chî me lei, zai chipau peireige du Israelme je I â ’mpat ra mak lei,” kacheu de lei.

³Chidadege penai ne, “Hebraime Rapeu ne anai je kahedau de lei; hênamkang ’mbe hezie kechumne-beî hang zai Tingwang anui Rapeu dage herâtewrabe hangge ka’nggia ze anui je ’mpat kai lau, makchai â herarît benai hiazutkie tei lu pa ne anui peireige wangkeu gai gu de lei” ze acheu bei de lei.

⁴Kane Ijip gu heguang ne penai je, “Mosabai, Aaronbai, ’ndaitew ze ziemmename je penui tâtewbe gene ningnai nguatat ra lau? Ningnai tewrabe tâ ze tew le lau,” kacheu de lei.

⁵Pharaobe ne, “Pie le lau, heram gu ziemmename chuna â kie-desang la de lei, zai ningnai ne penui je tâtewkahereube gene sau ra pei gai bei zeu!” ze kacheu de lei.

⁶Chipau mai gîm ge Pharaobe ne tâtewme je kereîme zai penui peireige besuitewme je acheu ze samdie gai ze,

⁷“Besua-sua’ngkage gum ze, ningnui ne baudime je hegam teleu ra megau pei ta du lau; peize penui run-runne penui hangge tat ze rui’ndui le lau.

⁸Kane hegam riak ze â besua-suage penui tewbe riak luî ze peize tew bam lau, periak ze ningnui tew’ncham gai ra mak lei; penui â kezai-desang di daseu; chipauziegene penui kakeleu de lei, ‘Kei lei, anui Rapeu dage herâtew gai kei lei’ ze acheu zeu.

⁹Ai suadu keritbe tâ ze ’mpeumime peireige tuâsuâ gai lau, dezai chige penui tâtew’nrî ze karasa sam ramme ge peize ’ngking mak ra hangge zeu,” ze kacheu de lei.

¹⁰Chidadege târeime benai tâtewme peireige besuitewme ne pat lu baudime je, “Pharaobe ne acheu sa lei, ‘Ningnui je I ne megau pei ra mak lei.

¹¹Ningnui runne tat ze ningnui ne getaika’ndui-duibe bâm gene getai le lau’ zeu, kane ningnui tatew â kecheîne du tew’ncham ra mak lei;” ze kacheu de lei.

¹²Chigum ze Israelme baudime â Ijipram huâzie leine ge megau hangge megaumui ramme getai’ndui ra kezitrariptat kam di de lei.

¹³Târeime ramme ne gechu-desang ze acheu sa ze, “Nai’nsangne ningnui tewbe tâ ze tew kam gai kelua du lau, megau ga de lei” ze kacheu de lei.

¹⁴Zai Israelme ruage tâtewme peireige besuitewme, Pharaobe gu târeime penui peireige sumgai’ndime je lakgetie ze sam ’nneu ze, “’Ndaitew ze nemai riâ du ningnui gu hegam kateleube tâ ze ningnui ne tew gai makse bam lau?” ze kacheu de lei.

¹⁵Dadege Israelme ruage kanguame besuitewme Pharaobe dage wang lu, “’Ndaitew ze ning guâ ka’ngguame peireige acheu ze kangua lau? ze acheu ze penui hap te lei.

¹⁶Ning guâ ka’ngguame je megau mâ de pei mak ze, penui ne anui je, ‘Hegam teleu gai du lau!’ ze kacheu de lei. Zai pie le lau, ning guâ ka’ngguame je lakgetie bei de lei; kane ning gu ziemmename ne maube kau lei,” ze kacheu de lei.

¹⁷Kane pa ne, “Ningnui kakezai lei, ningnui kakezai lei; chipauziegene ningnui ne, ‘Anui tat ze Tingwang dage herâtew gai kei lei’ ze kacheu de lei.

¹⁸Chuna ningnui tat ze tâtew du lau; megau â ningnui je pei be ra mak daseu, acheusede hegam â tingtie gu riak luî ze ningnui lupat kai bam ra lei” ze kacheu de lei.

¹⁹“Ningnui nai’nsangne hegam tewpatbe riak ze tew’nsîn ra peichi lak lei,” ze penui ne acheubeibe luage, Israelme tatew peireige besuitewme, (chize Israelme) ne penui â penui runne betedka’nsîbe ge bambe hang ngaupat kai ’ndi de lei.

²⁰Penui Pharaobe dagene pat dege, penui je kuâbamme hangna Mosabe benai Aaronbe je penui kahedau de lei;

²¹dadege penui ne penai je, “Ningnai ne anui je Pharaobe benai pe guâ ka’ngguame mikngau hangge ka’nggibe kedibe tewgaibe ze anui je tewchat ra penui ba ge hiazutkie kaichanggaidibe ziegene Tingwang ne ningnai peireige pie ze samram la lei,” ze kacheu de lei.

²²Chidadege Mosabe ze Tingwang tailam ’nrik kai dai lu acheu sa ze, “Hei Tingwang gau, ’ndaitew ze ai baudime dage nang ne mâ-kesiabe tew gai bei lau? ’Ndaitew ze nang ne achu ’nziene lang gai gai lau?

²³Ning ji gene mâ-’mpau ra hang Pharaobe tailam I wangbe gene seuze, pa ne aime bau dage mâ-kesiabe tew gai bei de lei, zai nang ne ning gu baudime je lupat kai mak lei,” ze kacheu de lei.