Read Zeme Naga EKSODAS 6 Bible Online

EKSODAS 6 - Zeme Naga bible

EKSODAS 6

¹Kane Tingwang ne Mosabe je, “Chunage Pharaobe je I ’ndaikau tew gu mei be nang ngau gu de lei; heranchibe ba ne pa ne penui je langpat kai gu daseu, eu lei, heranchibe ba ne pa ne pe ram gene penui je kelipat kai gu lei,” kacheu de lei.

²Zai Hera ne Mosabe je, “I â Tingwang de lei.

³I ne Hera Dilangpeu chang ze Abrahambe, Isaakbe zai Jakobbe dage liâ gai de lei, kane a ji Tingwang kacheube zene penui dage I sing ne chî ra liâ gai mak lei.

⁴Hesangme lunggaileume gum ze penui bambe heram, Kanaanram ze penui je pei gai ra hangge penui dage I ne a gu samhatkaibe ze du tew’ntip kai de lei.

⁵Chipau peireige du Ijipme ramme ne kebang hang chuigaime Israelme bau huaipun bambe kuâ ze I seu lu de lei, zai I ne a gu samhatkai’ndibe ze ’nningdau de lei.

⁶Chidaze Israelme baudime je acheu ze salia lau, ‘I Tingwang lei, zai Ijipme gu heputkeritbe kang gene I ne ningnui je nguapat kai gu de lei, zai penui kebang changbe gene ningnui je I ne lupat kai gu lei, zai a ba getuapatbe ba zene zai samramgaibe tâtewchibe kedibe ramme zene ningnui je I ne ’nripat kai gu lei,

⁷zai a gu ziemmena hangge ningnui je I lu gu lei, zai I ne ningnui Rapeu chang gu lei; zai I ze Tingwang ningnui Rapeu, Ijipme gu heputkeritbe tuagaibe gene ningnui je nguapatkaibeipeu lei be ningnui chî gu de lei.

⁸Zai Abrahambe, Isaakbe zai Jakobbe dage I pei ra hatkai’ndibe heram ge I ne ningnui je nguachang gai gu lei; ningnui ne chipau heram ze ’nram ra hangge I pei gu lei, I â Tingwang de lei,’ ze acheu zeu” kacheu de lei.

⁹Mosabe ne acheu ze Israel baudime je salia de lei; kane penui ne Mosabe kuâ ze ’ngking mak tai de lei, penui lung pangdibe benai penui hereu zai kebang chang ze bambe ziegeneu.

¹⁰Zai Tingwang ne Mosabe je,

¹¹“Gutchu lau, Ijip gu heguangpeu Pharaobe je pe ram gene Israelme baudime je ’mpat kai ra hangge rang gai be lau,” kacheu de lei.

¹²Kane Mosabe ne Tingwang je, “Pie le lau, Israelme baudime ne a kuâ ’ngking mak lei; chidaze ’ndaigum ze Pharaobe ne a kuâ ’ngking ra lau, ziemmena pe muikuâng rumgetenmakbe kau jeu?” ze kacheu de lei.

¹³Kane Tingwang ne Mosabe benai Aaronbe je die gai ze Israelme benai Ijip gu heguang Pharaobe deu ge salia ze Israelme je Ijipram gene nguapat kai ra hangge die sing gai de lei.

¹⁴Aime bau ze penai kiduîme peî changme bau de lei: Israelbe na meraipeu Reubenbe na ramme: Hanokbe, Pallube, Hezronbe, zai Karmibe; aime â Reubenbe kiduîme de lei.

¹⁵Simeonbe na ’mpeumi ramme: Jemuelbe, Jaminbe, Ohadbe, Jakinbe, Zoharbe, zai Kanaan’mpui na Shaulbe; aime ze Simeonbe kiduîme de lei.

¹⁶Aime bau ze Lebibe na ’mpeumi ramme de lei; penui rehei piakeube luigum zeu: Gershonbe, Kohathbe zai Meraribe, Lebibe ringbe tingkum ze haî kat ze himreu ze sena lei.

¹⁷Gershonbe na ’mpeumi ramme: Libnibe benai Shime-ibe, penai kiduîme luigum zeu.

¹⁸Kohathbe na ’mpeumi ramme: Amrambe, Izharbe, Hebronbe zai Uzzielbe, Kohathbe ringbe tingkum riak ze haî kat ze himreu ze kechum lei.

¹⁹Meraribe na ’mpeumi ramme: Mahlibe benai Mushibe. Aime bau ze penui rehei piakeube luî gene Lebibe kiduîme lei.

²⁰Amrambe ne pe peu kinapui Jokebedle je pe nâu hang lu lu de lei, zai pe dagene Aaronbe benai Mosabe je lungkeu gai de lei, zai Amrambe tingkum riak haî kat ze himreu ze sena lei.

²¹Izharbe na ’mpeumi ramme: Korabe, Nephegbe, zai Zikribe.

²²Zai Uzzielbe na ’mpeumi ramme: Mishaelbe, Elzaphanbe, Sithribe.

²³Aaronbe ne Amminadabe na zai Nahshonbe kinapui Elishebale je pe nâu hang lu de lei; zai pe dagene Nadabbe, Abihube, Eleazarbe Ithamarbe je lungkeu de lei.

²⁴Korabe na ’mpeumi ramme: Assirbe, Elkanabe, zai Abiasaphbe; aime bau ze Korabe kiduîme lei.

²⁵Aronbe na Eleazarbe ne Puti-elbe na ’mpuimime ruage hangkat je pe nâu hang lu de lei, pe dagene Phinehabe je lungkeu gai lei. Lebibe zat kiduîme pei ramme â chime ze de lei.

²⁶Aime Aaronbe benai Mosabe ze Tingwang ne, “Ijipram gene Israelme je penui bau-bautew ze nguapat kai be lau,” ze acheu ranggaibeipeu kena de lei.

²⁷Aime hangna Mosabe benai Aaronbe ze Ijip ge Ijip gu heguang Pharaobe dagene Israel baudime je nguapat kai ra ka’mpaube kena de lei.

²⁸Ijipram ge Tingwang ne Mosabe je ka’mpaube mai ge,

²⁹Tingwang ne Mosabe je, “I Tingwang lei; Ijip gu heguang Pharaobe je ningchu I rangbe leine ze ranglia gai be lau,” ze kacheu de lei.

³⁰Kane Mosabe ne Tingwang je, “Pie le lau, I â a lei rumgetenmakbe kau de lei; chidaze ’ndaigum Pharaobe ne a kuâ ’ngking gai ra lau?” kacheu de lei.