Read Zeme Naga EKSODAS 7 Bible Online

EKSODAS 7 - Zeme Naga bible

EKSODAS 7

¹Zai Tingwang ne Mosabe je, “Pie le lau, nang ne Pharaobe hangge Hera gum chang ra I ningchu tew gai de lei; zai ning sipeu Aaronbe zene ning gu kemeu’mpeu gum chang gu lei.

²Ningchu I diegaibe leine nang sa ra lei; zai Pharaobe ne Israelme baudime je pe ram gene peize ’mpat kai be ra ning sipeu Aaronbe ne ranglia ra lei.

³Kane I ne Pharaobe lung tew’nchi gai gu lei, zai Ijipram ge I ne a gu ka’nchetbe ramme benai tâningdaulakbe ramme tewpung gai sede,

⁴Pharaobe ne ning kuâ ’ngking ra mak lei; chidezai Ijip peireige I ne a ba getuapat ze a gu baudime, Israel chaname ramme je samramgaibe tâ-kedibe ramme zene Ijip gene nguapat kai gu lei.

⁵Zai Ijip peireige a ba getuapat ze Israelme baudime je penui ruagene nguapat kai dezai, I â Tingwang lei be Ijipme ne chipat ku lei,” kacheu de lei.

⁶Zai Mosabe benai Aaronbe ne chipau luî ze tew gai de lei; Tingwang ne penai je diegaibeibe luigum ze penai tew gai de lei.

⁷Chunage Pharaobe dage penai ka’mpaube ting ge, Mosabe tingkum riak ze riakdesat chang di de lei, zai Aaronbe tingkum riak ze riakdesat ze kechum chang di de lei.

⁸Zai Tingwang ne Mosabe benai Aaronbe je,

⁹“Pharaobe ne ningnai je, ‘Tâningdaulakbe gene ningnai gu rezie teilia’nchichiak kai lau,’ ze rang gai dezai, nang ne Aaronbe je, ‘Ning gu hetui ze Pharaobe suage henêu mi gai ra tuâ gai be lau,’ ze acheu ra lei” ze kacheu de lei.

¹⁰Chigum ze Mosabe benai Aaronbe ne Pharaobe dage tat ze Tingwang ne diegaibeibe luigum ze tew gai de lei; Aaronbe ne pe gu hetui ze Pharaobe benai pe guâ ka’ngguame suage tuâ gai bei ze chize henêu mi di de lei.

¹¹Dadege Pharaobe ne chikandingme benai kahekame je wang ra sam ’nnâ gai de lei; zai chime ze du, Ijip ge heduaîchime, penui gu hekimtewbe tak gene chipau luîrun ze tew gai de lei.

¹²Ziemmena leine pe gu-gu hetui kedei ge tuâ gai de lei, zai chiramme henêu mi kam di de lei. Kane Aaronbe tui ne penui gu hetui ramme je ’nzua kam ’ndi de lei.

¹³Tingwang ne sagai’ndibe gum ze Pharaobe lungtak chibi-bi ze penai kuâ ’ngkingmeu tai de lei.

¹⁴Dadege Tingwang ne Mosabe je, “Pharaobe lung ze tew’nchi gai ’nde lei, pa ne baudime je peize tat ra peimeu lei.

¹⁵Pharaobe, hechua ge pa hedui bam ’mbe tatbe luage pe dage tat lau; henêu mibe hetui ze tei lu ’nggeukung ge pechu kuâbam lau.

¹⁶Zai nang pe suage acheu sa ra lei, ‘Tingwang Hebraime Rapeu ne ning dage achu lang gai ze, “Hênamkang ge penui ne achu ’nggua ra hang a gu baudime je peize tatchu lau; zai pie le lau, nang ne mâ-rangbe kuâ pheu gai mak lei,” kacheu de lei ze a acheu zeu.

¹⁷Tingwang ne acheu sa lei, “Aige zene I â Tingwang de lei be nang chî gu de lei: pie le lau, Nail ge bambe hedui ze a ba ge bambe hetui ne I lak kai gu lei, zai chize hejai chang du lei,

¹⁸zai Nail ge hekâ ramme ze chai gu lei, zai Nail perîmsia gu, zai Ijipme ne Nail gene hedui sak ra sakterui gu de lei,” acheu zeu’ ze acheu zeu” ze kacheu de lei.

¹⁹Zai Tingwang ne Mosabe je, “Aaronbe je acheu salia lau, ‘Ning gu hetui tei lu Ijip gu hedui ramme peireige, penui gu ’nggeuki ramme peireige, zai penui gu hedui’mpuî ramme peireige, dekuaki ramme peireige zai penui gu heduisungbe ramme leine peireige ning ba getuapat kai be lau, chidezai peize chiramme ze hejai chang kam de ra hang gêu; zai heching benai tingchu ne tewlube mâkuak ramme ge du hejai ne pui kam du de lei,’ acheu zeu” ze kacheu de lei.

²⁰Mosabe benai Aaronbe Tingwang ne diegaibeibe luigum ze penai tew gai de lei; Pharaobe mikngau ge benai pe guâ ka’ngguame mikngau ge pa ne pe gu hetui getuachu lu Nail ge hedui bambe ge lak kai bei ze Nail ge bambe hedui leine hejai chang kam di de lei.

²¹Zai Nail ge bambe hekâ ramme ze chai kam di de lei; zai Nail ze perîmsia-desang di ze Ijipme chigene hedui ze sakdau lak ti de lei; zai Ijipram leine ge hejai bampui di de lei.

²²Ijip gu heduaîchiâmchime du penui gu hekimchibe tak gene chipau luî tew gai de lei; chidadege Pharaobe â pe lung chibi-bi bam di ze, penai kuâ ’ngking ta di de lei; Tingwang ne kerangbe luigum zeu.

²³Zai Pharaobe ’nreiwang lu pe ki lam tat ti de lei, zai aize ’nsangdu pe lung ge mâ de kai mak tai de lei.

²⁴Zai Ijipme leine ne Nail hia-hia hedui sakrabe hangge suguârua ze bam de lei, Nail geuki dui ze penui sakdaulaktibe ziegeneu.

²⁵Tingwang ne Nail geuki lakkaibe ze hezie senane chang di de lei.