Read Zeme Naga EKSODAS 8 Bible Online

EKSODAS 8 - Zeme Naga bible

EKSODAS 8

¹Chidadege Tingwang ne Mosabe je, “Pharaobe dage tat ze pechu, ‘Tingwang ne acheu ze rang lei, “A gu ziemmena je tat ra pei be lau, dezai penui ne a guâ ’nggua ra hangge zeu.

²Kane penui tat ra nang ne lun maktizai â pie le lau, ning ram dei luî hegau lungwang ra I ne tew gai gu de lei;

³Nail geuki ge hegau lung ze chize ne ning ki ge, zai ning jeiki ge gut ze ning jeî ge chu ze, zai ning guâ ka’ngguame benai ning gu ziemmena ki ramme ge gut ze, zai ningnui gu ’mmang ramme benai dekuî kakeneibe kuak ramme ge gut ku lei;

⁴hegau ramme zene ning peireige benai ning gu ziemmename peireige zai ning guâ ka’ngguame leine peireige ’nsakchu gai gu lei,” acheu zeu’ ze acheu ze rang gai lau” ze kacheu de lei.

⁵Zai Tingwang ne Mosabe je, “Aaronbe je rang gai be lau, ‘’Nggeuki ramme peireige, zai hedui’mpuî ramme peireige, zai hezaisungbe ramme peireige ning gu hetui tei lu ze ning ba getuapat kai be lau, zai Ijipram dei ge hegau lungwang ra tew gai be lau!’ ze acheu zeu” ze kacheu de lei.

⁶Chidadege Ijip gu hedui ramme peireige Aaronbe ne pe ba getuapat kai bei de lei; zai hegau ramme ne pat ze Ijipram dei lungpuigit ze bam di de lei.

⁷Kane heduaîtewme ze du penui hechiâm tewchibe tak gene chigum ze tew gai ze Ijipram ge hegau lung ra tew gai bei de lei.

⁸Chidadege Pharaobe ne Mosabe benai Aaronbe je kûwang lu, zai acheu sa ze, “I benai a gu ziemmena dagene hegau ramme tei’mbia ’nde ra hangge Tingwang je kiam gai lau; dezai Tingwang dage herâtewbe pei gai ra ziemmename je tat ra I ’mpat kai gu lei,” ze kacheu de lei.

⁹Mosabe ne Pharaobe je, “Nang benai ning ki ramme gene hegau ramme tew’ngga kam gai bei ze Nail ge runne bam de ra nang benai ning guâ ka’ngguame zai ning gu ziemmena hangge ’ndaigumbe luage I kellum gai ra mei be ning suiyi ze achu samdie gai lau,” ze kacheu de lei.

¹⁰Zai pa ne, “Nchumai ge lau,” ze kacheu de lei. Mosabe ne, “Nang ne rangbe luigum ze peize acheu ra de lei, chidezai Tingwang anui Rapeu gumbe kau mî de ga lei be nang chî le ra hangge zeu.

¹¹Hegau ramme ze nang benai ning ki ramme, zai ning guâ ka’ngguame benai ning gu ziemmename dagene ’mbia kam du de lei; Nail geuki ge runne penui bam du de lei,” ze acheu bei de lei.

¹²Chidadege Mosabe benai Aaronbe ze Pharaobe dagene zuapat ti de lei; zai Pharaobe dage pa hezuâgailube luigum ze Mosabe ne Tingwang dage hegau ramme deu ge pe laîpat ze kie gai de lei.

¹³Zai Tingwang ne Mosabe kiebe kuâ luî ze tew gai bei de lei; hegau ramme ze heki ramme benai kedei lung gene zai helu ramme gene chai kam di de lei.

¹⁴Zai penui ne petum-tum tew ze kuai’ndui gai de lei; petiam rîm ne heram luî nampuigit ti de lei.

¹⁵Kane chize saugaidibe Pharaobe ngau lu dege â pa pe lungran tew’nchi dai lu, penui kuâ ’ngkingmeu dai di de lei; Tingwang ne ranggai’ndibe luigum zeu.

¹⁶Chidadege Tingwang ne Mosabe je, “Aaronbe je acheu ze rang gai be lau, ‘Ning gu hetui getuapat ze kedeiniamoîne lak kai be lau, chidezai Ijipram kedei leine ge chize ne mairiêne mi gai de ra hang gêu,’ acheu zeu,” ze kacheu de lei.

¹⁷Zai penai ne chigum ze tew gai de lei; Aaronbe ne hetui tei lu pe ba getuapat ze kedeiniamoîne lak kai bei de lei, chidadege ziemmena benai hekaune peireige mairiêne lungwang chu di de lei; Ijipram dei luî ge kedeiniamoîne leine zene mairiêne chang di de lei.

¹⁸Heduaîtewchime ne penui gu hekimchiâm ramme ne mairiêne ramme tewpat kai ra hangge chiam de lei, kane penui tewchi lak ti de lei. Chigum ze mairiêne ramme ne ziemmena benai hekaune peireige lungwang ze bam di de lei.

¹⁹Dadege hemikduaîchime ne Pharaobe je, “Aize â Hera ba tatew de lei,” ze kacheu de lei. Kane Pharaobe lung ze â chibi-bi bam di de lei, zai pa ne penui kuâ ’ngkingmeu tai de lei; Tingwang ne ranggaibe luigum zeu.

²⁰Chidadege Tingwang ne Mosabe je, “Hechuasûn chu lu ze ’nggeuki ’mbe pa zuapatbe luage Pharaobe je piekua le lau, zai pechu, ‘Tingwang ne acheu ze rang lei, “A gu ziemmena je peize tatchu lau, dezai penui a guâ ’nggua le ra hangge zeu.

²¹Acheu makse nang ne a gu ziemmename je tat ra pei maktizai â pie le lau, nang benai ning guâ ka’ngguame zai ning gu ziemmename, zai ningnui ki ramme peireige temaine dung ramme I ne lang gai gu lei; dezai Ijipme ki ramme ge zai penui sapbe kedei ’nsangdu temaine dung ne lungpuiting ze bam gu lei.

²²Kane chipau mai ge a gu ziemmename lungbe bâm Goshenram ze â I ne tei’mbiapat kai bu lei, chidezai chige temaine dung lungwang mak ra hangge zeu; chidezai kedeirei zuilung ge I â Tingwang lei be nang chî le ra hangge zeu.

²³Chigum ze a gu ziemmename benai ning gu ziemmename kakge I ne ’nzipâng gai bu lei. ’Nchumai ge aipau ka’nchetbe wangchang gu lei,” ze acheu zeu’ ze acheu rang gai be lau” ze kacheu de lei.

²⁴Zai Tingwang ne chipau luigum ze wangchang ra tew gai bei de lei; Pharaobe benai pe guâ ka’ngguame ki ramme ge temaine dung ramme lungwang di de lei; zai Ijipram kedei leine ge temaine lungwangbe gene heram ze tew’nsia gai bei de lei.

²⁵Chidadege Pharaobe ne Mosabe benai Aaronbe je kû lu, zai acheu rang gai ze, “Tat chu lau, heram lung gene ningnui Rapeu dage herâtew gai le lau,” kacheu de lei.

²⁶Kane Mosabe ne, “Chigum ze tew ra hangge tâu mak ku lei; Ijipme ne ngaukatenetbe kaurui ramme zene Tingwang anui Rapeu dage herâtew gai gu daseu. Ijipme ngaukatenetbe kaurui ramme zene anui ne penui mikngau gene herâtew gai bei dezai penui ne tingchu ne anui je tuâ mak ra mei?

²⁷Hênamkang ’mbe hezie kechumne-beîtew ze pa ne anui je samdiegaibe luigum ze Tingwang anui Rapeu dage herâtew himchang ra ’nnang di de lei,” acheu bei de lei.

²⁸Chidadege Pharaobe ne sa ze, “Ningnui tat’ndeu ’mpia mak ra zai â hênamkang ge Tingwang ningnui Rapeu dage herâtew gai ra tat ra ningnui je I pei gu lei. A hangge kellum gai lau,” kacheu de lei.

²⁹Chidadege Mosabe ne kak ze, “Pie le lau, ning dagene I zuapat ze temaine dung je Pharaobe dagene, pe guâ ka’ngguame dagene zai pe gume ziemmename dagene ’nchuamai ge tei’mbia ’nde ra hangge Tingwang dage I kie gu lei; kane Tingwang dage herâtew gai ra ziemmena je tat ra peimeube gene kechoabe tâ ze Pharaobe ne peize tew gai dai ta lau,” kacheu de lei.

³⁰Chigum Pharaobe dagene Mosabe zuapat lu Tingwang dage kie gai de lei.

³¹Chidadege Mosabe ne kiegaibe luigum ze Tingwang ne tew gai bei de lei, zai Pharaobe dagene, zai pe guâ ka’ngguame dagene, zai pe gu ziemmename dagene temaine dung ramme je tei’mbia gai bei de lei; katte ’nsak kai mak lei.

³²Kane Pharaobe â chuna hî ge du pe lung tew’nchibi-bi di de lei, zai ziemmename je tat ra pei mak te lei