Read Zeme Naga JOB 1 Bible Online

JOB 1 - Zeme Naga bible

JOB 1

¹Uz kedei ge ziemmena hangkatpeu pe ji Jobbe kacheupeu bam de lei; zai chipau peu ze â heziâk ga zai helung ka’nzeibe kau, Hera je hingchibe kau, zai kesiabe gene ’mbiadibe kau ziemmena de lei.

²Pe name ’mpeumi hangsena zai ’mpuimi hangchum bam de lei.

³Pe dage pe gu meli chang sena, put-hu chang chum, getumsei pechin haî mengeu, zai pe guâ ka’ngguame kie-desang ze bam de lei; chipauziegene aipau peu zene naimik pat ’mbia gu ziemmena leine ruage lungyilangpeu chang ze bam de lei.

⁴Pe na ’mpeumi ramme ne penui ki tatkeliawang ze tat ze luube-bâm tew ka’nsui de lei; zai penui dage nguateu ze nguasak ra hangge penui sikiname ’mpuimi hangchum je du kelau ze ’nnâ gai de lei.

⁵Zai luube naimikpui ramme kam dezaine Jobbe ne penui je kûwang gai lu penui je tew’nchi gai gai de lei, zai hechuasûn pa chu lu pe na penui ’nteumena riak luî gene kerube-râtewbe ramme tew gai gai de lei; Jobbe ne acheu sa ze, “A na ’mpeumi ramme ne hemui tâ tew gai, zai penui lung gene Hera je deset kai ’ndi laleu gu mei,” ze kacheu daseu. Aigum ze Jobbe ne tew ze bam de lei.

⁶Chunage mai kat â Tingwang masuage saplia ra Hera name wangka’nduibe luage, Satan du penui ruage wang de lei.

⁷Tingwang ne Satan je, “Nang ’ndai’mbene wang gai lau?” kacheu de lei. Satan ne Tingwang kuâ kak ze, “Kedeirei gene tatpat tatgut, zai chige tat-hang tatkeube gene wang gai lei,” ze kacheu de lei.

⁸Zai Tingwang ne Satan je, “A guâ ka’ngguapeu Jobbe je mî de kedeirei ge pa gumbe kau ga lei be, heziâkga zai ziemmena ka’nzeibe kau (kapelingbe kau), Hera je hingchibe kau, zai kesiabe gene bamchâmbe kau lei be nang chîpat mei?” ze kacheu de lei.

⁹Chidadege â Satan ne Tingwang je kak ze, “’Ntakûne Jobbe Hera je hing se mei?

¹⁰Pe peireige zai pe ki benai pe gu kebambe leine pebâm’nsangne ge nang ne rieguagit ’ndi mak se mei? Pe batâ ramme nang ne ’nnam gai bei de lei, zai heram ge pe heurâ ramme pungpat ti de lei.

¹¹Kane chunage ning ba getuapat ze pe gu kebambe leine peireige deî gai be lau, dezai ning masua gene ningchu pa deset kai gu de lei,” kacheu de lei.

¹²Zai Tingwang ne Satan je, “Pie le lau, pe gu kebambe leine ning gu rezie kangge la de lei; kane pe pum gîmsing ge â ning bahuâ kai se lau,” acheu bei de lei. Chidadege â Tingwang dagene Satan zuatat ti de lei.

¹³Chunage mai kat â penui sipeu chînglangpeu ki ge Jobbe name ’mpeumi ramme benai ’mpuimi ramme teu ze sak ze bam de lei,

¹⁴zai Jobbe dage hepâupaupeu hangkat wang lu, acheu sa ze, “Getumsei ramme hening pu ze pe taihia ge hekunmerângne ramme deteu ze bam de lei;

¹⁵zai Sabeanme ne penui je ’nggi ze penui je nîmtat ti de lei, zai ning guâ ka’ngguame je hiazutkie ne bichat ’ndi de lei; zai ningchu pau gai ra a runne pak’mbiapat te lei,” kacheu de lei.

¹⁶Pa sam sa lage kêdapeu chige wang kadai de lei, zai acheu sa ze, “Tinggîm ’mbene Hera gu hemi ’ngngaîkeu ze meli ramme benai ning guâ ka’ngguame je rû ’nde lei, zai penui je rûmut ’ndi de lei; zai ningchu pau gai ra a runne pak’mbiapat te lei,” kacheu de lei.

¹⁷Chipaupeu sam sa lage, kêdapeu chige wang kadai de lei, zai acheu sa ze, “Kaldiame ne bau chum ’nzisa lu ’nggi ze, put-hu ramme sut-tat ti, zai ning guâ ka’ngguame je hiazutkie ne bichat ’ndi de lei; zai ningchu pau gai ra a runne pak’mbiapat te lei,” kacheu de lei.

¹⁸Chipaupeu samsa lage, kêdapeu chige wang kadai de lei, zai acheu sa ze, “Ning name ’mpeumi benai ’mpuimi ramme penui sipeu chînglangpeu ki ge teu ze sak ze bam de lei;

¹⁹zai pie le lau, tingkangram gene tingkai kechibe guipelapat te lei, zai heki mik medai nupkagetie de lei, zai heki ze hename peireige kâukeu gai ze penui â chai di de lei; zai ningchu pau gai ra a runne pak’mbiapat te lei,” kacheu de lei.

²⁰Chidadege â Jobbe sapchu lu pe paîni hit te lei, zai pe peî gut te lei, zai kedei ge kâukeu gai lu kakellum de lei.

²¹Zai pa ne, “A pui gu nebâm gene a pumrua ze I wangkeu de lei, zai a pumrua ze I helatwang dai ra de lei; Tingwang ne pei da, zai Tingwang ne teitat dai di de lei,” kacheu de lei.

²²Airamme leine ge Jobbe ne hemui gai mak, zai Hera je du chau’ngkui gai mak te lei.