Read Zeme Naga JOB 10 Bible Online

JOB 10 - Zeme Naga bible

JOB 10

¹“I â ringgailak te lei; sarau-meluisui ze a herêu I ’nra gu lei; A keringbe lungkahereube gene I samsa gu lei.

²Hera je I ne, Achu kesia’ndam gai se lau; ’ndaitew ze achu nang ka’nggi mei be I chî ra pei lau, ze acheu salia gu lei.

³Deisâ gai ze ning batâ tewgaibe je ngau’nna ze, ziemmena kesiabe kau ne kesiabe chiamgaibe ramme je ka’nchâbe ze keyibe hangge nang ’nning gai mei?

⁴Nang hemeipum mik pung mei? Ziemmena ne ngaube gum ze nang ngau mei?

⁵Ning gu naimikpui ramme ze ziemmena gu naimikpui ramme gum mei, nune ning gu tingkum ramme ze ziemmena gu tingkum ramme gumbe kau mei?

⁶A gu hemui-helut ramme ze nang ne peupat, zai a gu hemui je nang ne peube zeu,

⁷a mâu ga lei be nang chikâ lu, zai ning ba gene mî de ’nripatchi lak lei be nang chikâ lu zeu?

⁸Ning ba ne achu teihebîn ze ’ndam gai de lei; zai chunage â nang keli dai di ze achu tewka’nsia de lei.

⁹Depung ne nang ne achu ’ndam gai lei be chibam lau; zai nang ne achu kemût hangge tew gai dai ’nde ra de mei?

¹⁰Nang ne achu tungdui gum ze ruîpat kai, zai tungduikâng je gum ze kebit kai mak mei?

¹¹Nang ne achu a gei ramme benai a chie ramme ne a pum kûmchim gai, zai a ra ramme benai a ’nnaria ramme ne a pum rethelua gai bei de lei.

¹²Nang ne achu keringbe benai hungka’ntipbe pei gai bei de lei; zai nang katinggeube ne a herui tei’nggim bei de lei.

¹³Sede airamme ning lung ge nang tei’mbai gai de lei; aize nang tew ra ka’nningbe kau de lei be I chî lei.

¹⁴I ne hemui tâ tew zai â, nang achu ’nchet bam lei, zai a gu hemui-helut gene nang ne achu ’mpatpat kai mak lei.

¹⁵I ziemmena kesiabe kau dizai â a duângga be de lei! I kapelingbe kau chang lêuzai du, I a peî ze ’ngngûchu lak te lei, I â kahelêube ne puigit ti, zai I kahereube liebe ngau bam daseu.

¹⁶I ne a runne achu teichu gai dizaine du, duilui ne gum ze nang ne achu tewchat ne ra peu lei, zai a peireige tâningdaulakbe ramme tew gai kadai de lei;

¹⁷nang ne a peireige kesia’ndamrechi gai kadai lei, zai a peireige ning râtabe tewpung gai de lei; nang ne ning gu pebau karchibe ramme achu ’nggi ra teiwang gai de lei.

¹⁸“’Ndaitew ra achu nebâm gene nang lupat kai lau? Mî de achu ngau makge I chai di nung laîzai,

¹⁹zai I lung gai mak ze, nebâm gene heraw ’mbe tat ti nung laîzai neu.

²⁰I ringbe naimikpui ramme gechâmne runne mak semei? Achu sâu gai lau, dezai kecheîne I bamtemi gai le ra hang.

²¹I helatwangdaitarabe bâm, kemuîbe benai muiterîngberam ’mbe I tat makge zeu,

²²kemuîbe benai kebuakchuakberam, kebabe ’nsangdu kemuîbe gum bambe heram ’mbe I tat makge zeu, acheu sa gu lei,” kacheu de lei.