Read Zeme Naga JOB 12 Bible Online

JOB 12 - Zeme Naga bible

JOB 12

¹Chidadege Jobbe ne kak ze,

²“Chipau ziemmena ze ningnui lau sing de lei, zai ningnui dage kaningchingbe nguachai gai du lei.

³Kane ningnui suadu I â mâ-chî’mmi ka’nteu lei; I â ningnui suadu kecheibe chang mak lei. Airamme gumbe châu chimakbe kau la lau?

⁴A kangme hangge I â teihenuitewbe chang lei; I, Hera je kû gai bei ze pa ne a kuâ kakkaibeipeu, ka’nzeibe benai heziâkgapeu ze, teihenuitewpeu chang de lei.

⁵Temichai ze bambe kau lung ge ’nninggaibe ge â, pausiabe je ngaugailak lei; chize pe pîgim peulakbe kau hangge sêulane bam lei.

⁶Hegasut-teume gu paîki ramme â lungzeunetew ze la lei, zai Hera lumpum tewme penui ba gene penui rapeu je teilume â katenangbe ga ze lung lei.

⁷“Kane hekaune ramme je ’nneu gai ni lau, dezai penui ne ningchu geteilia gu lei; liamruabe ’nruine ramme je ’nneu gai ni lau, dezai penui ne ningchu ranglia gu lei;

⁸makchai kedei gu hingbang ramme je ’nneu gai ni lau, dezai ningchu geteilia gu lei; zai sungkling gu hekâ ne ning dage ranglia’nchi gai gu lei.

⁹Airamme leine ruage châu Tingwang ba ne tew gai de lei be chimakbe kau la lau?

¹⁰Mâ-keringbe zat leine keringbe benai ziemmena zat leine chuilu â pe ba ge la lei.

¹¹Mi hak ne hetak ka’ndâu gum ze mi kun ne sam ramme ’ngkingheda mak semei?

¹²Chîngdime dage kaningchingbe â bam lei, zai ringtiedime dage mâ-gechîbe â bam lei.

¹³“Kaningchingbe benai reziechibe â Hera dage bam lei; pe dage geteiliachibe benai mâ-gechîbe bam lei.

¹⁴Pa ne tewpâng gai ’ndizai â, mî de tei’nsapchudaichi lak lei; pa ne ziemmena je kainam ’ndizai â, mî de letpatchi lak lei.

¹⁵Pa ne sungkling gu hedui ramme tew’nsau ’ndizai â penui changku gai di tai lei; pa ne chiramme langpat kai dizai â penui ne kedei naî nan tai lei.

¹⁶Heranchibe benai kaningchingbe pe dage bam lei; duaikau’ndime benai keduaime ze pe gu kam lei.

¹⁷Geteiliaka’mmime je pa ne penui pumrua gepâutua gai lei, zai samramme je pa ne teihenuitew lei.

¹⁸Heguangme gu pibe-ria ramme pa ne heipat kai, zai penui kia ge ka’ngkangbe paî ramme pa ne ’ngkang gai lei.

¹⁹Pa ne tingkume je penui pumrua langtua gai lei, zai peranchibe kau je tewkau gai lei.

²⁰Ziemmena ’nnumtewbe kau mâ-sachibe pa ne tewka’ngga lei, zai gechîngme keyi-kesia ’ndakchibe pa ne lutua lei.

²¹Heguangsinme peireige pa ne ngauka’nnabe ruî gai lei, zai peranchibe kau kiakâk pa ne heihelui gai lei.

²²Muîgitbe gene gechukbe ramme pa ne letpat kai, zai muîgitbe ze kebabe chang ra tew gai lei.

²³Heramzat kedibe chang ra pa ne tew gai, zai chiramme pa ne tewka’nsia lei: heram ramme pa ne tew’ndipat kai, zai penui je gepâutua gai lei.

²⁴Kedeirei ge ziemmename gu besuitewme dagene mâ-gechîbe pa ne lutua lei, zai ’mpuigabe heram perua ge penui kezitrua bam ra pa ne tew gai lei.

²⁵Kebabe ga ze kemuîbe ge penui kemitrua bam lei; kameneupeu gum ze kezitliang bam ra pa ne penui je tew gai lei.