Read Zeme Naga JOB 13 Bible Online

JOB 13 - Zeme Naga bible

JOB 13

¹“Pie le lau, a mik ne aipau ramme leine ngau lu de lei, a kun ne seu lu chiramme ’nningchi lu de lei.

²Ningnui ’ndaikau chî mei be I du chî lei; I â ningnui sua â cheibe kau mak lei.

³Kane Reziechibe Rapeu je I ’mpau nei lei, zai Hera dage a deu ze tu gai nei lei.

⁴Ningnui ze â ’nchoâ ne telingchi ze bam lei; ningnui â tewka’mmime pemîgabe kau ramme kam lei.

⁵Hei, ningnui kuâneu ta di, zai ningnui kaningchingbe chang nung laîzai neu!

⁶Chunage I pedeu tak chibe ze ’ngking le lau, zai a kiamsam ramme ’ngking le lau.

⁷Hera hang ningnui karasa sa, zai pe hangge kechoa-keduai sam sa gai ra mei?

⁸Ningnui pechu kehung-ka’nrie teilia ra, zai Hera hangge pedeu tak ze sagaihâ ra mei?

⁹Hera ne ningnui je peupat kai dezai ningnui yi ze bam gu mei? Nune mige ne ziemmena je duaibe gum ze pechu ningnui duai dui mei?

¹⁰Hekim ne ningnui kehung-ka’nrie teilia gai ’ndizai â, pa ne ningnui je ’ngngiam himchang gu lei.

¹¹Pa pengêudibe ne ningnui je tewhingrim, zai pechu kehingbe ningnui peireige wangchang mak ta ra semei?

¹²Ningnui gu sam’nda ramme â timbunzeu gu samrekum ramme lei, ningnui gu rienambe ramme â depungdei gu rienambe ramme lei.

¹³“Zîng ze bam ra achu pei lau, dezai I sam sa gu lei, zai a peireige ’ndaikau wangchang ra mei be peize wangchang zu lau.

¹⁴A geu ne a ji I teu gu lei, zai a ba ge a keringbe kai gu lei.

¹⁵Pie le lau, pa ne achu tewchat ku lei; a dage kaheguîbe ga de lei; sede pe masuage a ’mpuî ramme I sagu gu lei.

¹⁶Aize a gu tewka’nringbe chang ra de lei, neimakbe kau â, pe suage wang ra mak lei be zeu.

¹⁷A sam ramme ’ngking’mmi le lau, zai I ne ranglia’nchigaibe ze peize ningnui kun ge seu le lau.

¹⁸Pie le lau, a tûdeu hangge I kedâ lu de lei; a hang râm’nzei gai gu lei be I chî lei.

¹⁹Chige achu tingkangrabe kau châu la lau? Chigum dizai â, I zîng ze chai du de lei.

²⁰Achu mâ-kena gap runne pei lau, chidezai ning masuage a runne achu tei’mbai ra mak lei:

²¹a dagene ning ba tei’ndeu ne lau, zai ningchu kehingbe ne peize achu tewhingrim gai se lau.

²²Chidezai kû gai lau, dezai I kak ku lei; makchai achu samsa ra pei lau, zai nang ne a kuâ kak kai lau.

²³A gu hemui-helut ramme benai a gu hemui ramme ’ndaikie la lau? I hedieka’ngkabe benai a gu hemui I chî ra tew gai lau.

²⁴’Ndaitew ze nang ning ju tei’mbai ze, zai ning teureime hangge achu riam gai lau?

²⁵Guitua’ndibe mâ-neu je nang ne tewhingrim gai ze, chêurie changbe je gua’nsa ra de mei?

²⁶Nang ne a peireige mâ-kesiabe ramme raw gai lei, zai I rehang’ngka gu hemui-helut ramme I nguaheu ra tew gai lei.

²⁷Hekai ramme ge nang ne a pî ramme kai bei, zai a ’mpuî ramme leine pie bam lei, a pîdei riâ chang ze pirabe nang ne kai bei de lei.

²⁸Mâ-merua huibe gum ze ziemmena ’ntîtat lei, ’nsungkau ne teu’ndibe paî gum zeu.