Read Zeme Naga JOB 14 Bible Online

JOB 14 - Zeme Naga bible

JOB 14

¹“’Mpuimi dagene lungkeube kau ziemmena kering ting â dui, zai kahereube ne pui lei.

²Mâpâ gum ze pa zuapat, zai hui gai dai di tai lei; kezuikaukeube gum ze pa paktat lei, zai bam bam mak lei.

³Zai chigumbe kau peireige nang ning mik rakpat ze, zai pechu ning dage samrambe ge teiwang gai mei?

⁴Kahebâbe gene châu ne ka’nchibe merua teiwangchi dui lau? Mî de ga lei.

⁵Pe gu keringbe tingnaimikpui ramme hangge die gai ’ndi, zai pe gu hekêu ramme riak â ning dage bam dadege, zai pa tat’ngkapatchi lak ra pe hangge herai ramme nang ne sum’ntip kai ’ndi dadege,

⁶pe dagene ’nrik te lau, zai sâu ne lau, chidezai hiteubepeu gum ze pe gu tingnaimikpui ge pa pe suiyi’nta le ra hangge zeu.

⁷“Hingbang hangge kaheguîbe la daseu, chize kuîkau gai sede, chize puakpat dai gu lei, zai pepuâk tumpatsau ra mak lei be zeu.

⁸Kedei lungge pema ze chîng di, zai pemui ze kedei ge chai gai di sede,

⁹acheusede hedui rîm nam gai dezai chize tumpat kû, zai hingbangkiak poine gum ze bekeî ramme getuapat ku lei.

¹⁰Kane ziemmena chai ze, pechu ’njei gai lei; ziemmena pechui lutud kai lei, zai pa ’ndaige la lau?

¹¹’Ngkiêzai gene hedui gadibe gum, zai ’nggeuki luarit ’ndi ze changkugaidibe gum,

¹²chigum ze ziemmena jeikau gai di, zai chu dai mak lei; tinggîm ramme ga mak tâne pa â chu dai ra mak lei, zai pa kejeibe gene teichu gai dai ra mak lei.

¹³Hei, Kechaiberam ’mbe nang ne achu bai gai bei laîzai, zai ning lumpumbe ’ntua de mak tâne nang ne achu tei’mbai gai bei laîzai, nang ne a hangge pehîtitbe pei gai bei, zai achu chibam bei nung laîzai neu!

¹⁴Ziemmena chai di, zai pa ring dai gu mei? Achu ’mpatkairabe wangchang mak tâne, I tâtewbe naimikpui ramme leine ge I kuâ ze bam gu lei.

¹⁵Nang ne kû gai gu, zai I ne ning kuâ kak ku lei; ning ba ne ’ndamgaibe hangge nang huî gu lei.

¹⁶Chidezai nang ne a pikiâm ramme sei gu lei, nang ne a gu hemui peireige ’nchet bam ra mak lei;

¹⁷a gu hedieka’ngkabe â chiaka lungge kainam gai ’ndu de lei, zai a gu hemui-helut ze nang ne gumchim ’ndu lei.

¹⁸“Kane kedeiloa kâukeu ze meitat lei, zai tingchutum je pebâm gene tei’mbia nan tai lei;

¹⁹tingchu ramme je hedui ne biaktua lei; kedei gu kedeihûp ze duidibe ne biaktua nan tai lei; chigum ze ziemmena kaheguîbe nang ne tewka’ngga lei.

²⁰Betingbeta hangge nang pe peireige ngam lu, zai pa tat te lei; desungra bam ra nang ne pe ju tewkeli gai bei, zai pechu kelitua gai de lei.

²¹Pe na ’mpeumi ramme pengêudibe chang di, zai chize pa â chî mak lei; penui je tewhelêu gai bei de lei, zai chize pa â ngau mak lei.

²²Pe pum ge geteube ted runne pa â chî lei, zai pe hangge runne pa â desui ze bam lei,” kacheu de lei.