Read Zeme Naga JOB 15 Bible Online

JOB 15 - Zeme Naga bible

JOB 15

¹Chidadege Teman’mpeu Eliphazbe ne kak te lei:

²“Ziemmena kaningchingbe kau mâ-chî’nchuimakbe gene samkak ku semei? Zai tingbia ’mbia gu tingkai ne pe runne pechu tewpui gai gu semei?

³Pemîgabe samsa gene pa sam ’mpau ze, zai pa ne mâ de keyibe tewchilakbe sam ramme gene sa gu semei?

⁴Kane nang â Hera je kehingbe lungtak tuâpat kai ze, zai Hera masuage ’nningkahekuîbe ze tewnam lei.

⁵Ning mui ne aigum sa ze ning gu hemui-helut ne geteilia bei de lei, zai pe lungriaksiabe kau leiria nang ne kakelâng de lei.

⁶Ning mui ne ningchu tew’ngkui gai de lei, zai chize I ne mak lei; ning mui gîmsing ne ningchu chau’ngkui gai de lei.

⁷“Nang ze lungkeuraibe ziemmena mei? Nune kedeiloa ramme sua â nang â bam raî semei?

⁸Hera gu wangka’nduibeki ge nang mâ-’ngking gai de mei? Zai ning peireige kaningchingbe gadibe hangge nang â chak kai mei?

⁹Nang chilube anui chimakbe ’ndaikau la lau? Anui ne chîdesimakbe nang ne chi’nchilube ’ndaikau la lau?

¹⁰Ning peu sua gechîngme, pe peîpûme benai gechîngme du anui ruage la lei.

¹¹Hera gu tumgaibe sam ramme benai ningchu ’mpauzun-gaibe sam ze, ning hangge cheizû di mei?

¹²’Ndaitew ze ning lung ne ningchu tei’ndeu ’ndi lau, zai ’ndaitew ze ning mik piereking bam lau,

¹³chidezai ning lungka’nningbe ne Hera je tingkang ra, zai aigumbe sam ramme ning mui gene zuapatrabe hangge zeu?

¹⁴Ziemmena ze ’ndaikau lau, pa ’nchichi le ra hangge zeu? Nune pa kapelingbe kau changchi le ra hangge, ’mpuimi ne lungkeube kau châu la lau?

¹⁵Pie le lau, Hera ne pe gu ka’nchime dage pa ’nnumtewbe kai mak lei, zai tinggîm ramme du pe mikngau ge â ka’nchime chang mak lei;

¹⁶mi ngaukatenatbe benai telingmakbe kau, pe gu hemui-helut ze hedui gum ze sakbe ziemmena ze, ’ndaizeuge kecheibe kau chang ra lau?

¹⁷“A kuâ seu le lau, I ne ningchu teilia gu lei; zai ’ndaikau I ngau lu mei be I rangba gai gu lei.

¹⁸(Ziemmena kaningchingme ne rangliabeibe, zai penui peume ne teikebaimakme,

¹⁹chigumbe kau dage runne heram pei gai ze, zai hesangme penui dage tat’ngguakmakme zeu).

²⁰Ziemmena kesiabe kau â, pe gu keringbe ting tâluî beted’nsî ze bam lei, katîmphime hangge kaibe tingkum ramme leine gezeu.

²¹Kehingbe kuâ ramme pe kun ge bam lei; lungyi ze bambe luage pe peireige tewka’nsiapeu wang gu lei.

²²Kemuibe gene pa helatwang dai gu lei be pa â ’nnum gai mak lei, zai pechu â hiazutkie chit hang diepat kai ’ndi lei.

²³Pa â hetak hanggene, ‘Chize ’ndaige la lau?’ acheu sa ze kezitruatui lei. Kemuibe tingnaimikpui kenahia ge pechu kuâ la de lei be pa â chî lei;

²⁴mi duânggabe benai lungkahereube ne pechu tewkakehei de lei; heguang hangkat herei kedâlube gum ze chiramme ne pechu duî ’ndi de lei.

²⁵Pa ne Hera je pe ba ne tingkang bei, zai Reziechipeu je ’nzûm’nna ze,

²⁶hinggei kaheseube tei lu pechu ’nggi ra gua’nchubeibe ziegeneu;

²⁷pa ne pechâ ne pechu chûm lu, zai pe kia ’nrei ge pe sûn kêulolia ze,

²⁸gua’mpie’ndibe namdi ge lung ze, ziemmena bammakrabeki ramme tew’nsia kam gai ’nde ra, diepatkai’ndibeki ramme ge lungbe ziegeneu;

²⁹pa â lungyibe kau chang ra mak, zai pe heurâ bam bam ra mak lei, zai kedei ge pema hiam’ntip ze bam ra mak lei;

³⁰kemuîbe gene pa pak’nreipat ra mak lei; pe gu besûne ramme ze hemimelei ne ’nggalai ’ndu lei, zai pe pâ pabe ze tingkai ne guitua ’ndu lei.

³¹Pe runne pechu duai ze, perua ge peize pa ’nnumtew se lau; pe runne pe hangge peiruîgaibe chang gu daseu.

³²Beting chang makge ge pechu peipui gai bu lei, zai bekeî ring’ndiakri bam ra mak lei.

³³Grepchî hiâm je gum ze pe gu grepchî ka’nggeibe pa ne kenutkeu ’ndu lei, zai olib bang je gum ze pepâ pabe ramme ze tew’ngngaîkeu ’ndu lei.

³⁴Hera je chimakme bau â pe rachî ’nchi mak daseu, zai henimteube-paîki â hemi ne rû ’ndi tai lei.

³⁵Penui â tewkakeleube ’mpungpat ze kesiabe lungkeu lei, zai penui lung ne gechoa-keduai chiampat lei,” kacheu de lei.