Read Zeme Naga JOB 16 Bible Online

JOB 16 - Zeme Naga bible

JOB 16

¹Chidadege Jobbe ne kak ze;

²“Chigumbe ramme misongga ze I â seu lu de lei; ningnui ’nteumena tumgaime, mâ-tâuhanggabe kau ramme de lei.

³’Nchuimakbe sam ramme betun-gaibe la mei? Nune ’ndaikau ne ningchu tew’mpum gai bei ze nang kak lau?

⁴A bâm ’nchui ge ningnui ne bam nung laîzai â, ningnui sa gum ze I du sachi duî lei. I du sam ramme tei’ntuk kai ze ningnui peireige sa, zai ningnui je a peî kezitliâchi duî lei.

⁵A mui gene ningnui ran tew’nchi gai dui, zai a sam karenuabe gene ningnui geteube ted ze tew’ncha gai le duî lei.

⁶“I ne sa bei leusede I geteube ted liebe â yi sua mak lei, I ne gesut kai leusede chize ’ndaizeuge a dagene tew’ncha gai bei lau?

⁷Pelingsing ze chuna â Hera ne achu tuâpat kai ’ndi de lei; a gu pebaume put-hâmmuî bam de ra pa ne tew gai bei de lei.

⁸Zai pa ne achu tewherut kai bei, chize ne achu chau’ngkui gai lei; zai a râsiabe ne achu ka’nggi de lei, chize ne a sua sing gene achu chau’ngkui gai lei.

⁹Pe lumpumbe gene pa ne achu chaktappriu gai bei, zai achu ngaugailak ti de lei. Pa ne achu pe gêu kegitliâ gai de lei; a teureipeu ne a peireige pe mik piereking bam lei.

¹⁰Ziemmename ne achu penui muiki ’ngngaletla gai de lei, ’nzûmka’nnabe gene penui ne a biapi gepei bei de lei, achu ’nggi ra penui baudi wangka’ndui de lei.

¹¹Hera je chimakme dage Hera ne achu peipat kai de lei, zai ziemmena kesiame ba ge achu tuâpat kai de lei.

¹²I â lungtemichai ze bam de lei, zai pa ne achu tewpângdesuirui gai bei de lei; pa ne a guang hekit lu achu getaudesuirui gai bei de lei. Pe gu ka’nchetbe hangge pa ne achu teichu ze da gai bei de lei,

¹³pe gu hetubaimpi kapme ne achu tuagua de lei. Pa ne a ’ngkei ramme bipâng gai lei, zai mâ de gesutmeluisui lei; pa ne a ’mmâu kedei ge ruîpat kai lei.

¹⁴Pa ne achu tewputrin gai ze achu tewpâng gai lei; heteureipeu gum ze pa ne a peireige kuttat lei.

¹⁵A pum peireige I â miseigiriapaî herui lu kai de lei, zai kedeinia ge a ranchibe kai ’ndi de lei.

¹⁶Kehapbe ne a masuânggie la de lei, zai a mikkûm â hemangtang la de lei;

¹⁷a ba gene ’nggî-kahegeibe tewgaibe ’ngga, zai I kakellumbe â ka’nchibe chang leusedu.

¹⁸“Hei Kedei gau, a jai kâmchim se lau, zai I kehapbe ze peize saugairabe bâm peize ga lau.

¹⁹Chunage ’nsangdu pie le lau, a gu sakki â tinggîm ge la lei, zai achu sagupeu â kehube ge la lei.

²⁰A kangme ne achu ngauka’nna de lei; Hera dage a mik ne hemikdui ramme ruîpat kai lei,

²¹chidezai Hera dage ziemmena ngaurabe hedam ze pa ne tei’nsap kai be ra hangge zeu, ziemmena mige pe kining’mpeu dage bambe gum zeu.

²²Patingkum mâtiege mak ze wangchang dezai, I helatwangdaimakrabe bâm tatbe ’mpuî ’mbe I tat tu daseu.