Read Zeme Naga JOB 17 Bible Online

JOB 17 - Zeme Naga bible

JOB 17

¹A lungka’nningbe ze â pâng de da, a gu tingnaimikpui â cham de lei, heram a hangge kuâ la de lei.

²Pelingsing ze achu teihenuitewme ne guâgit la de lei, zai penui ne ngaugailakbe ge a mik â pie bam de lei.

³“Ning dage a hangge samhatkaibe pei gai lau; a hangge ’ngngâgaibe peiduibe kau châu larei lau?

⁴Mâ-gechîbe lam ge nang ne penui lung ramme kainam ’ndi da, chidaze nang ne penui je kengambe pei ra mak lei.

⁵Penui heurâ lurabe hanggene pe kangme rasam pauka’nsiabe kau â, pe name mik ramme kezim gu lei.

⁶“Ziemmename ne teisarabe hangge pa ne achu tew gai bei de lei, zai I â pe suage ziemmename ne ’nchai’ntuigaibe kau ziemmena de lei.

⁷A suisiabe gene a mik â kezim di de lei, zai a pum taura ramme â kezui gum bam di de lei.

⁸Aipau deu ge ziemmena kapelingme â ’nningdaulak ti de lei, zai pemâugabe kau â, Hera je chimakme peireige pe lunggailak lei.

⁹Acheusede kapelingbe kau â, pe gu ’mpuî tei’ntiprip ze bam lei, zai pe ba ka’nchibe kau â, pe ranchibi-bi ze bam lei.

¹⁰Kane ningnui ’nteumena wang gai dai lau, dezai ningnui ruage kaningchingbe kau katte I â ngaudau ra mak lei.

¹¹A ting â ’ntua de lei, I tew ra ’nninggaibe ramme â sia kam de lei, a lung gene ka’nchâbe ramme zeu.

¹²Penui ne tingmuî je ’nrîmbeting hang tew gai lei; ‘Chi kebabe’ ze muî zi gu de lei,’ ze penui ne kacheu de lei.

¹³A ki hangge Kechaiberam je I ne peu dizai â kemuîbe ge a jeî I ne kâm gai dizai â

¹⁴hûm kuiki je I ne, ‘Nang ze a peu de lei,’ acheu, zai tingsîpui je, ‘A pui,’ kacheu mei, nune, ‘A sipui,’ kacheu mei dizai â

¹⁵I kaheguîbe ’ndaige larei lau? I kaheguîbe châu ne ngau ra lau?

¹⁶Chize Kechaiberam keriekemui riâ wangkeu gu mei? Anai hangna kedeinia ge wangkeuherua gai de ra de mei?” kacheu de lei.