Read Zeme Naga JOB 18 Bible Online

JOB 18 - Zeme Naga bible

JOB 18

¹Chidadege Shuah’mpeu Bildadbe ne kak ze:

²“’Ndaitie ge sam ramme nang peurua bam ra rei lau? Mâ-’nning gai lau, chidezai anui samsa gu lei.

³’Ndaitew ze anui je kaurui hangge riam gai lau? ’Ndaitew ze ning mikngau ge anui je kemiebe kau hangge riam gai lau?

⁴Nang ning lumpumbe gene ning runne ningchu tewpângbe kau, ning hanggene kedei ze put kai ’nde ra de mei, nune tingchu je pebâm gene kelattua ’nde ra de semei?

⁵“Eu lei, ziemmena kesiabe kau gu kebabe â tew’mmut kai lei, zai pe gu hemimelei â pa’mbi sireba mak lei.

⁶Pe gu paîki lungge kebabe â muîgit bam lei, zai pe peireige kachâbung bambe ze â tew’mmut kai de lei.

⁷Pe pikiâm peranchibe ramme â tew’ndui gai, zai tâtew ra ’nranggaibe ramme ne pechu tuâkeu gai lei.

⁸Pechu â pe pî ne pe gu chîak ge mi ra tuâpat kai lei, zai pa â hûm peireige tatruabe chang de lei.

⁹Pe pîmesui gene ’mpia ne pechu rap lei, ’mpia ne pechu mî de lei.

¹⁰Kedeikang ge pe hangge ’mpiareu bai gai ze bam lei, ’mpuîki ge pe hangge ’mpia chang lei.

¹¹Kehingbe ramme ne pebâm’nsangne pechu tewkakehei lei, zai pe pîpa chai guaka’nsa lei.

¹²Pe ranchibe ze kemei-mei de lei, zai pausiabe zene pa kâurabe hangge kuâ bam de lei.

¹³Herarît ne pe gei â teu kam ’ndi de lei, kechaibe ’nnakeuraibe zene pe pumkeî ramme teu ’ndi de lei.

¹⁴Pa ’nnumtewbe paîki gene pechu tew’nsia gai bei de lei, zai chiramme heguang gu mi kehingme dage teiwang gai bei de lei.

¹⁵Pe gu makbe ramme ’nnia zene pe gu paîki ge bam de lei; pa lungbe bâm peireige hemiheu ne ’nrukrarip kai bei de lei.

¹⁶’Ngkang ’mbe pema ramme changkeu di, zai ’nrei ’mbe bekeî ramme chaikeu di de lei.

¹⁷Pechu chibe ze kedeirei gene ga gai di, zai puidi ge pe ji ga di de lei.

¹⁸Pechu â kebabe gene kemuîbe ge tuâpat kai de lei, zai kedeirei gene kelitua gai ’ndi de lei.

¹⁹Pe gu ziemmena ruage pa â pe haîhik mei nune pe chaname mei ze ga lei, zai tingtie pa lung ze bambe bâm ge ’nsakkaibe kau ga lei.

²⁰Tingrun ’mbia gu ziemmename ne pe gu tingnaimikpui ze ’nningdaulak te lei, zai tingbia gu ziemmename dage kehingbe ne pui di de lei.

²¹Pelingsing ze Hera je chimakbe kau kelungbe bâm ramme â chigum lei, Hera je chimakbe kau bâm ze â chigum lei,” kacheu de lei.